ខេត្ដកណ្ដាល ៖ ការរំជើបរំជួលពាក់ព័ន្ធនឹងការប្រតិបត្ដិមិនប្រក្រតីរបស់បុរសម្នាក់ឈ្មោះធាន វុទ្ធី ដែលមានងារជាព្រះគ្រូធម្មាចារ្យ តាំងខ្លួនឯងជាតាបសស្លៀកស ពាក់សបានធ្វើឱ្យមានប្រតិកម្មយ៉ាងខ្ទខ្ទារជាង១ខែកន្លងមកហើយ ដោយសារតែការធ្វើឱ្យប៉ះពាល់ដល់វិស័យព្រះពុទ្ធសាសនាយ៉ាងធ្ងន់ធ្ងរបំផុត ។ ដូចជាការតាំងខ្លួនឯងជាព្រះអរិយមេត្ដេយ្យ(សិអារ្យមេត្រិយ)និងតាំងខ្លួនជាបុគ្គលខ្ពស់លើសង្ឃទាំងឡាយ នៅក្នុងវត្ដទួលព្រះរាជា ធ្វើឱ្យសង្ឃទាំងនោះក្រាបសំពះខ្លួនជាដើម ។
ដោយសារតែមានការផ្សព្វផ្សាយយ៉ាងទូលំទូលាយ ដែលជាប្រតិកម្មមិនខុសពីគ្រាប់បែកបរមាណូនោះនារសៀលថ្ងៃទី២៧ កក្កដា កន្លងទៅ លោក មិន ឃិន រដ្ឋមន្ដ្រីក្រសួងធម្មការនិងសាសនា និងនិមន្ដរួមដំណើរដោយសម្ដេចព្រះឧត្ដមចរិយា ឈឹង ប៊ុនឈា សមាជិកថេរសភាសង្ឃ ព្រះញាណវង្ស ឃឹម សន ព្រះមេគណរាជធានីភ្នំពេញ ព្រះឃោសធម្ម ញ៉ែម សុភ័ក្ដ្រ ព្រះបាឡាត់គណខេត្ដកណ្ដាល បានដឹកនាំមន្ដ្រីសង្ឃខេត្ដ និងមន្ដ្រីសង្ឃស្រុកកោះធំ ចុះសិក្សាស្វែងយល់រកការពិតចំពោះហេតុការណ៍ដែលបានកើតឡើង ធ្វើឱ្យប៉ះពាល់ដល់សេចក្ដីថ្លៃថ្នូររបស់ព្រះពុទ្ធសាសនា ក៏ដូចជាពុទ្ធបរិស័ទនៅវត្ដទួលព្រះរាជា ដែលមានទីតាំងស្ថិតនៅភូមិកំពង់គរ ឃុំពោធិ៍បាន ស្រុកកោះធំ ។ ទោះបីជាបែបណា ប្រតិភូថ្នាក់រដ្ឋមន្ដ្រី និងមន្ដ្រីសង្ឃជាន់ខ្ពស់មិនបានជួបជាមួយបុគ្គល ធាន វុទ្ធី នោះទេ ។
សម្ដេចព្រះឧត្ដមចរិយា ឈឹង ប៊ុនឈា មានថេរដីកាថា ការចុះមកពិនិត្យនាពេលនេះគឺឃើញថា សកម្មភាពរបស់លោកគ្រូធម្មាចារ្យ ធាន វុទ្ធី ដែលបានតាំងខ្លួនជាព្រះទី៥ ទ្រង់ព្រះនាមព្រះសិអារ្យមេត្រិយ ពិតជាបានប្រព្រឹត្ដខុសឆ្គងធ្ងន់ធ្ងរដែលធ្វើឱ្យមានចលាចលនៅទូទាំងប្រទេស ។ សម្ដេចព្រះឧត្ដមចរិយា បានមានថេរដីកាបញ្ជាក់ទៀតថា ដូចដែលប្រជាពុទ្ធបរិស័ទបានជ្រាបហើយ ព្រះសិអារ្យមេត្រិយគឺជាបុគ្គលដែលបានត្រាស់ដឹងក្នុងផែនកប្បជាព្រះពុទ្ធមួយព្រះអង្គ ហើយពុទ្ធបរិស័ទនៅទូទាំងពិភពលោក ទាំងថេរវាទ និងមហាយាន មានការគោរពបូជាជាទីសក្ការៈចំពោះព្រះសិអារ្យមេត្រិយយ៉ាងខ្លាំង ។ ហេតុដូច្នេះ ចំពោះលោកគ្រូធម្មាចារ្យ ធាន វុទ្ធី ត្រូវតែបញ្ឈប់សកម្មភាពទាំងនេះដែលប្រាសចាកទៅនឹងច្បាប់នៃព្រះរាជាណាចក្រកម្ពុជា ក្នុងន័យបម្រើមហិច្ឆតារបស់ខ្លួនបោកប្រាស់មហាជនជាពុទ្ធបរិស័ទឱ្យដើរខុសផ្លូវព្រះពុទ្ធសាសនា ។
ទោះជាយ៉ាងណា ព្រះញាណវង្ស ឃឹម សន បានសម្ដែងព្រះហឫទ័យកោតសរសើរនិងវាយតម្លៃខ្ពស់ចំពោះសមិទ្ធផលទាំងឡាយដែលផុសឡើងក្នុងបរិវេណវត្តទួលព្រះរាជា ដែលបានរួម ចំណែកធ្វើឱ្យព្រះពុទ្ធសាសនាមានការរីកចម្រើននិងជាទីមោទនៈពីប្រជាពុទ្ធបរិស័ទ ក៏ប៉ុន្តែត្រូវដើរទន្ទឹមគ្នាចំពោះការប្រតិបត្តិត្រឹមត្រូវរបស់អ្នកបួស ។ ក្នុងនាមគណៈសង្ឃនាយក សូមប្រតិបត្តិឱ្យបានត្រឹមត្រូវហើយអ្វីដែលខុសឆ្គងសូមបញ្ឈប់កុំឱ្យប៉ះពាល់ដល់សិទ្ធិជំនឿរបស់ប្រជាពុទ្ធបរិស័ទដោយសារតែការចង់បានប្រយោជន៍ខ្លួនឯង ប៉ុន្តែបែរជាបំផ្លាញប្រយោជន៍អ្នកដទៃ ។ យោងតាមប្រភពពីមន្ត្រីក្រសួងធម្មការនិងសាសនា បញ្ជាក់ថា រដ្ឋមន្ត្រីក្រសួងធម្មការ និងសាសនា លោក មិន ឃិន បានព្រមានចាត់វិធានការតាមផ្លូវច្បាប់ទៅលើគ្រូធម្មាចារ្យ ធាន វុទ្ធី ដែលតាំងខ្លួនជាព្រះទី៥ ព្រះនាមព្រះសិអារ្យមេត្រិយ ដែលបង្កឱ្យមានការភ្ញាក់ផ្អើល ។
ប្រភពដដែលនោះបានអះអាងទៀតថា ក្នុងនាមក្រសួងដែលជាអាណាព្យាបាល បានចាត់ទុកទង្វើរបស់ គ្រូធម្មាចារ្យ ធាន វុទ្ធី ថាជាទង្វើបែកឆ្វេងមួយ ធ្វើឱ្យប៉ះពាល់ដល់ព្រះពុទ្ធសាសនាដែលជាសាសនារបស់រដ្ឋ ក៏ដូចជាជំនឿរបស់ប្រជាពុទ្ធបរិស័ទ ដែលគោរពស្រលាញ់ព្រះពុទ្ធសាសនាតាំងពីដើមរៀងមក ។ ជាចំណាត់ការជំហានដំបូង ក្រសួងនឹងកោះហៅ បុគ្គល ធាន វុទ្ធី ទៅសួរនាំ និងអប់រំមិនឱ្យប្រព្រឹត្តទង្វើបោកប្រាស់បែបនេះបន្តទៀត ហើយក្នុងករណីដែលការកោះហៅបុគ្គល ធាន វុទ្ធី ម្តងជាពីរដងនៅតែមិនព្រមចូលមកទៀតនោះ ក្រសួងនឹងធ្វើលិខិតមួយជូនទៅរាជរដ្ឋាភិបាល ដើម្បីចាត់វិធានការតាមផ្លូវច្បាប់ ចាប់ខ្លួនតែម្តង ។
ប្រភពដដែលនេះបន្ថែមថា គ្រូធម្មាចារ្យ ធាន វុទ្ធី នឹងទទួលខុសត្រូវចំពោះមុខច្បាប់ ទៅតាមអំពើដែលខ្លួនបានប្រព្រឹត្ត ខណៈពេលចំណាត់ការនៃការដក ធាន វុទ្ធី ចេញពីវត្តទួលព្រះរាជា រួមជាមួយនឹងព្រះសង្ឃចំនួន៦អង្គផ្សេងទៀត ដែលថ្វាយបង្គំ ធាន វុទ្ធី គ្រប់ពេលនោះ គឺជាសមត្ថកិច្ចរបស់គណៈសង្ឃនាយក ។ ដោយឡែក លោក សេង សុមុនី អនុរដ្ឋលេខាធិការ និងជាអ្នកនាំពាក្យក្រសួងធម្មការ និងសាសនា បានលើកឡើងពីចំណាត់ការរបស់ក្រសួង យ៉ាងមុឺងម៉ាត់ ចំពោះការប្រព្រឹត្តខុសឆ្គងរបស់បុគ្គល ធាន វុទ្ធី នាពេលនេះ ។ លោកបញ្ជាក់ថា តាមច្បាប់នៃព្រះរាជាណាចក្រកម្ពុជា មិនអនុញ្ញាតឱ្យមានការក្លែងបន្លំ ឬប្រព្រឹត្តខុសឆ្គងប៉ះពាល់ដល់ព្រះពុទ្ធសាសនាដែលជាសាសនារបស់រដ្ឋ ក៏ដូចជាជំនឿរបស់ប្រជាពុទ្ធបរិស័ទ ដែលគោរពស្រឡាញ់ព្រះពុទ្ធសាសនាតាំងពីដើមរៀងមកនោះទេ ។
គួរបញ្ជាក់ថា កាលពីពេលថ្មីៗនេះតាមបណ្តាញសង្គម«ហ្វេសប៊ុក»បានបង្ហាញរូបភាពគ្រូធម្មាចារ្យ ធាន វុទ្ធី បានតាំងខ្លួនជាព្រះសិអារ្យមេត្រិយ ហើយគង់នៅលើបល្ល័ង្កដ៏ខ្ពស់ ដូចបល្ល័ង្កព្រះ ដោយមានទម្រផ្កាឈូក និងមានរូបភាពព្រះសង្ឃ តាជី យាយជីក្រាបថ្វាយបង្គំ ។ សកម្មភាពនេះ ធ្វើឱ្យសាធារណមតិរិះគន់ថា បុរស ធាន វុទ្ធី ធ្វើដូច្នេះគឺកំពុងធ្វើឱ្យព្រះពុទ្ធសាសនាខ្មែរអាប់ឱន ខណៈព្រះសង្ឃ និងពុទ្ធបរិស័ទខ្មែរទូទៅ គោរពបូជា ។ ហើយសូម្បីតែព្រះមហាក្សត្រ ក៏គោរពថ្វាយបង្គំព្រះសង្ឃដែរ តែបែរជាបុគ្គល ធាន វុទ្ធី នេះឱ្យព្រះសង្ឃថ្វាយបង្គំខ្លួនទៅវិញ ដែលខ្លួនឯងជាបុគ្គលគ្រាន់តែស្លៀកសពាក់សនោះ ៕
ចែករំលែកព័តមាននេះ