រាជធានីភ្នំពេញ ៖ បើតាមសេចក្តីរាយការណ៍ពីអ្នកឆ្លើយឆ្លងព័ត៌មានកោះសន្តិភាពដែលបានរាយការណ៍នាពេលមុននេះបន្តិចបានឱ្យដឹងថា ជនសង្ស័យម្នាក់ដែលសមត្ថកិច្ចឃាត់ខ្លួននាំទៅសាកសួរពាក់ព័ន្ធដាក់បង្កៃគ្រាប់បែកគំរាមទារប្រាក់ម្ចាស់ភោជនីយដ្ឋានផ្រែមកាលពីព្រឹកមិញនោះ មកដល់រសៀលថ្ងៃដដែលនេះ ត្រូវបានសមត្ថកិច្ចដោះលែងវិញហើយ បន្ទាប់ពីរកឃើញថា ជនសង្ស័យមិនមានជាប់ពាក់ព័ន្ធនឹងករណីខាងលើនេះ។
បច្ចុប្បន្នសមត្ថកិច្ចកំពុងបន្តស្រាវជ្រាវតាមប្រមាញ់ជនសង្ស័យដែលពាក់ព័ន្ធនឹងករណីបង្កៃគ្រាប់បែកនេះមកចាត់ការតាមផ្លូវច្បាប់។
គួររំលឹកថា បុរសម្នាក់ត្រូវកម្លាំងកងរាជអាវុធហត្ថរាជធានីភ្នំពេញឃាត់ខ្លួនយកទៅសាកសួរកាលពីព្រឹក ថ្ងៃទី២៧ កក្កដា ២០១៤ សង្ស័យពាក់ព័ន្ធដាក់បង្កៃគ្រាប់បែកនៅមុខភោជនីយដ្ឋានមួយកន្លែង ដែលមានយីហោផ្រែម ស្ថិតនៅផ្លូវលេខ៣១៥ សង្កាត់បឹងកក់២ ខណ្ឌទួលគោក ហើយគំរាមទារប្រាក់ពីម្ចាស់ហាងចំនួន៥ពាន់ដុល្លារ។
ជនសង្ស័យត្រូវគេស្គាល់ឈ្មោះសុខ កក្កដា ភេទប្រុស អាយុ២៧ឆ្នាំ ជាអតីតមេការបម្រើការងារក្នុងភោជនីយដ្ឋានខាងលើ។ ប្រភពព័ត៌មានបានឱ្យដឹងថា ជនសង្ស័យត្រូវម្ចាស់ភោជនីយដ្ឋានបណ្តេញចេញពីការងាររយៈពេល៦ថ្ងៃមកហើយ មុនពេលកើតមានហេតុការណ៍ខាងលើ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ