រាជធានីភ្នំពេញ ៖ តាមសេចក្តីរាយការណ៍ពីអ្នកឆ្លើយឆ្លងព័ត៌មានកោះសន្តិភាពដែលបានរាយការណ៍នាពេលមុននេះបន្តិចបានឱ្យដឹងថា សមត្ថកិច្ចកងរាជអាវុធហត្ថរាជធានីភ្នំពេញដឹកនាំដោយលោកព្រះរាជអាជ្ញា មាស ច័ន្ទពិសិដ្ឋ បានចុះឆែកឆេរលំនៅឋានជនសង្ស័យពាក់ព័ន្ធដាក់បង្កៃគ្រាប់បែកគំរាមទារប្រាក់ម្ចាស់ភោជនីយដ្ឋានផ្រែម ដោយដកហូតទូរស័ព្ទដៃ ស៊ីមកាត និងឌីសមួយចំនួន រួចនាំខ្លួនជនសង្ស័យទៅកាន់ទីបញ្ជាការដ្ឋានកងរាជអាវុធហត្ថដើម្បីសាកសួរបន្តទៀត។
ទោះជាយ៉ាងណាសមត្ថកិច្ចមិនទាន់ទម្លាយឱ្យដឹងនៅឡើយទេជុំវិញហេតុការណ៍ខាងលើនេះ។
គួររំលឹកថា បុរសម្នាក់ត្រូវកម្លាំងកងរាជអាវុធហត្ថរាជធានីភ្នំពេញឃាត់ខ្លួនយកទៅសាកសួរនៅព្រឹក ថ្ងៃទី២៧ កក្កដា ២០១៤ សង្ស័យពាក់ព័ន្ធដាក់បង្កៃគ្រាប់បែកនៅមុខភោជនីយដ្ឋានមួយកន្លែង ដែលមានយីហោផ្រែម ស្ថិតនៅផ្លូវលេខ៣១៥ សង្កាត់បឹងកក់២ ខណ្ឌទួលគោក ហើយគំរាមទារប្រាក់ពីម្ចាស់ហាងចំនួន៥ពាន់ដុល្លារ។
ជនសង្ស័យត្រូវគេស្គាល់ឈ្មោះសុខ កក្កដា ភេទប្រុស អាយុ២៧ឆ្នាំ ជាអតីតមេការបម្រើការងារក្នុងភោជនីយដ្ឋានខាងលើ។ ប្រភពព័ត៌មានបានឱ្យដឹងថា ជនសង្ស័យត្រូវម្ចាស់ភោជនីយដ្ឋានបណ្តេញចេញពីការងាររយៈពេល៦ថ្ងៃមកហើយ មុនពេលកើតមានហេតុការណ៍ខាងលើ៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ