រាជធានីភ្នំពេញ ៖ ដើម្បីកាត់បន្ថយបរិមាណថង់ប្លាស្ទិកដែលជាសំណល់មិនងាយនឹងរលាយពុកផុយ បង្កឲ្យប៉ះពាលដល់សុខុមាលភាពសាធារណៈ និងសោភ័ណភាពទីក្រុង សាលារាជធានីភ្នំពេញ នឹងចាប់ផ្តើមកែប្រែទីក្រុងស្អាតដោយគ្មានសំរាមថង់ប្លាស្ទិកនៅល្ងាចថ្ងៃសុក្រ ថ្ងៃសៅរ៍ និងថ្ងៃអាទិត្យ ក្នុងសប្តាហ៍ចុងខែកក្កដា នេះ ។
រាជធានីភ្នំពេញ ៖ ដើម្បីកាត់បន្ថយបរិមាណថង់ប្លាស្ទិកដែលជាសំណល់មិនងាយនឹងរលាយពុកផុយ បង្កឲ្យប៉ះពាលដល់សុខុមាលភាពសាធារណៈ និងសោភ័ណភាពទីក្រុង សាលារាជធានីភ្នំពេញ នឹងចាប់ផ្តើមកែប្រែទីក្រុងស្អាតដោយគ្មានសំរាមថង់ប្លាស្ទិកនៅល្ងាចថ្ងៃសុក្រ ថ្ងៃសៅរ៍ និងថ្ងៃអាទិត្យ ក្នុងសប្តាហ៍ចុងខែកក្កដា នេះ ។
នេះបើតាមសេចក្តីណែនាំរបស់សាលារាជធានីភ្នំពេញក្នុងពិធីផ្សព្វផ្សាយក្រុមការងារវាយតម្លៃទីក្រុងស្អាត និងយន្តការឈប់ចែកចាយថង់ប្លាស្ទិកនៅតាមផ្សារទំនើប និងផ្សារម៉ាត កាលពីថ្ងៃទី២៣ កក្កដា នៅសណ្ឋាគារភ្នំពេញ ។ ការប្រកាសផ្សព្វផ្សាយក្រុមការងារវាយតម្លៃទីក្រុងស្អាតរាជធានីភ្នំពេញ ចាប់ផ្តើមអនុវត្តដោយសាលារាជធានីភ្នំពេញ ក្រសួងទេសចរណ៍ និងក្រសួងបរិស្ថាន ព្រមទាំងម្ចាស់ផ្សាររដ្ឋ និងឯកជន ព្រមទាំងម្ចាស់ក្រុមហ៊ុន សហគ្រាសផងដែរ ។
អភិបាលរាជធានីភ្នំពេញលោក ប៉ា សុជាតិវង្ស មានប្រសាសន៍ថា កន្លងមកសាលារាជធានីភ្នំពេញ បានដាក់ចេញវិធានការជាច្រើន ដើម្បីធ្វើយ៉ាងណាសម្អាតទីក្រុងឲ្យបានស្អាត ទាក់ទាញភ្ញៀវទេសចរឲ្យមកទស្សនាទីក្រុងដ៏ល្អផូរផង់មួយនេះ ។ ប៉ុន្តែដើម្បីសម្អាតទីក្រុងឲ្យស្អាតទៅបាន យើងមិនត្រូវពឹងផ្អែកតែលើរថយន្តដឹកសំរាមនោះទេ ពោលគឺត្រូវមានការចូលរួមទាំងអស់គ្នា ។ លោក ថោង ខុន រដ្ឋមន្ត្រីក្រសួងទេសចរណ៍ មានប្រសាសន៍ថា ការយកចិត្តទុកដាក់ពីភាគីពាក់ព័ន្ធទាំងអស់ក្នុងការរួមគ្នាអភិវឌ្ឍន៍ ពិតជាមានភាពចាំបាច់និងមានសារសំខាន់ជាមូលដ្ឋាន ខណៈដែលពិភពលោកទាំងមូលបាននិងកំពុងបោះជំហានទៅមុខនៅក្នុងសម័យកាលបៃតង ។
លោកបន្តថា ការអភិវឌ្ឍរាជធានីភ្នំពេញ និងភាពស្អាតដែលជាជម្រើសដ៏ចាំបាច់និងសក្តិសមបំផុតនាដំណាក់កាលបច្ចុប្បន្ន គឺត្រូវធានាឲ្យមាននិរន្តរភាព និងតុល្យភាពខាងផ្នែកសេដ្ឋកិច្ច សង្គម វប្បធម៌ និងបរិស្ថាន ។ គួរបញ្ជាក់ថា ការវាយតម្លៃទីក្រុងស្អាតនៅរាជធានីភ្នំពេញ គឺវាយតម្លៃនៅក្នុងខណ្ឌចំនួន៩ និងយន្តការឈប់ចែកចាយថង់ប្លាស្ទិក គឺចាប់ផ្តើមទៅលើផ្សារទំនើប និងតាមផ្សារម៉ាត នៅក្នុងរាជធានីភ្នំពេញមុនបណ្តាខេត្តផ្សេងៗ ។
លោក ថោង ខុន បានអះអាងថា អ្វីដែលយើងត្រូវយកចិត្តទុកដាក់រួមគ្នាធ្វើដើម្បីអភិវឌ្ឍន៍ទីក្រុងស្អាតនោះ គឺការគ្រប់គ្រងសំណល់រឹង រាវ គុណភាពសេវាកម្មទេសចរណ៍ និងការផ្តល់សេវាសាធារណៈ ដោយផ្តើមពីការរៀបចំបង្កើតជាសង្កាត់គំរូ ដើម្បីឱ្យខណ្ឌទាំង៩អាចឈានឆ្ពោះទៅទទួលជ័យលាភីជាទីក្រុងស្អាតផ្ការំដួល២ទង ឬ៣ទង។
លោក ព្រុំ ភារុណ ប្រធានផ្នែកទីផ្សារនៃ ផ្សារទំនើបសុរិយា បានសាទរចំពោះចំណាត់ការរបស់សាលារាជធានីភ្នំពេញ ។ លោកថ្លែងថា ដើម្បីចូលរួមមិនឲ្យមានការប្រើប្រាស់ថង់ប្លាស្ទិកនៅថ្ងៃចុងសប្តាហ៍ ផ្សារទំនើបសុរិយា និងបញ្ជ្រាបសេចក្តីណែនាំ និងផ្សព្វផ្សាយសេចក្តីណែនាំរបស់សាលារាជធានីភ្នំពេញដល់បុគ្គលិក អតិថិជន ក្រុមហ៊ុនទាំងអស់ដែលចូលនិងបម្រើការងារនៅផ្សារសុរិយា ឲ្យគោរពតាមសេចក្តីណែនាំរបស់សាលារាជធានីភ្នំពេញប្រកបដោយប្រសិទ្ធភាព ។ សូមបញ្ជាក់ថា បច្ចុប្បន្នរាជធានីភ្នំពេញមានផ្សាររដ្ឋនិងផ្សារឯកជនចំនួន៣០ ខណៈផ្សារម៉ាតមាន២១៧ ៕
ចែករំលែកព័តមាននេះ