រាជធានីភ្នំពេញ ៖ នាពេលថ្មីៗនេះ ករណីចោរកម្មលួចកាត់ខ្សែភ្លើង និងឧបករណ៍នៅតាមស្ថានីយអង់តែនសេវាទូរគមនាគមន៍ (BTS) បានកើតឡើងនៅតាមទីតាំងផ្សេងៗ ដែលធ្វើឱ្យប៉ះពាល់ដល់សន្តិសុខ និងសុវត្ថិភាពនៃហេដ្ឋារចនាសម្ព័ន្ធទូរគមនាគមន៍ ព្រមទាំងរំខានដល់សេវាទំនាក់ទំនងផងដែរ ។ ជាការឆ្លើយតប អាជ្ញាធរពាក់ព័ន្ធកំពុងបង្កើនការស៊ើបអង្កេត ស្រាវជ្រាវស្វែងរកចាប់ខ្លួនជនសង្ស័យ និងចាត់វិធានការផ្លូវច្បាប់យ៉ាងម៉ឺងម៉ាត់ចំពោះជនល្មើស ។
យោងតាមអាជ្ញាធរ អំពើចោរកម្មលួចខ្សែភ្លើងមិនត្រឹមតែបង្កឱ្យមានការខូចខាតទ្រព្យសម្បត្តិប៉ុណ្ណោះទេ ប៉ុន្តែថែមទាំងប៉ះពាល់ដោយផ្ទាល់ដល់ប្រតិបត្តិការនៃបណ្តាញទូរគមនាគមន៍ ដែលអាចរំខានដល់សេវាទំនាក់ទំនងរបស់ប្រជាពលរដ្ឋ អាជីវកម្ម និងស្ថាប័នរដ្ឋ ជាពិសេសក្នុងស្ថានភាពអាសន្ន ។
ក្នុងករណីនាពេលថ្មីៗនេះ បុគ្គលមួយចំនួនដែលពាក់ព័ន្ធនឹងសកម្មភាពចោរកម្មលួចខ្សែភ្លើងនៅតាមស្ថានីយ BTS ត្រូវបានកំណត់អត្តសញ្ញាណ និងចាប់ខ្លួន ។ អាជ្ញាធរបានថ្លែងថា ការស៊ើបអង្កេតនឹងបន្តពង្រីកបន្ថែមទៀត ខណៈដែលបុគ្គល ឬអង្គភាពណាដែលរកឃើញថា បានសមគំនិតជួយជនល្មើស ឬទិញ និងទទួលផលចោរកម្ម ក៏នឹងត្រូវប្រឈមមុខនឹងវិធានការផ្លូវច្បាប់យ៉ាងម៉ឺងម៉ាត់ផងដែរ ។
យោងតាមច្បាប់ជាធរមាន អំពើចោរកម្មលួចទ្រព្យសម្បត្តិអាចត្រូវផ្តន្ទាទោសដាក់ពន្ធនាគារពី ៣ ឆ្នាំ ទៅ ១០ ឆ្នាំ និងពិន័យជាប្រាក់ពី ១ លាន ទៅ ៣ លានរៀល ។ អំពើធ្វើឱ្យខូចខាតដោយចេតនានូវទ្រព្យសម្បត្តិ អាចត្រូវផ្តន្ទាទោសដាក់ពន្ធនាគារពី ២ ឆ្នាំ ទៅ ៥ ឆ្នាំ និងពិន័យជាប្រាក់ពី ៤ លាន ទៅ ១០ លានរៀល ។ ចំពោះអ្នកដែលពាក់ព័ន្ធនឹងការទិញ រក្សាទុក ឬទទួលផលចោរកម្ម អាចត្រូវប្រឈមមុខនឹងទោសដាក់ពន្ធនាគារពី ៥ ឆ្នាំ ទៅ ១០ ឆ្នាំ និងពិន័យជាប្រាក់ពី ៤ លាន ទៅ ១០ លានរៀល ។ បន្ថែមពីនេះ ជនល្មើសអាចតម្រូវឱ្យសងសំណងពេញលេញនៃតម្លៃទ្រព្យសម្បត្តិ និងការខូចខាតទាំងអស់ដែលកើតមានឡើងស្របតាមបញត្តិ ច្បាប់ ។
អាជ្ញាធរកំពុងណែនាំដល់សាធារណជនកុំឱ្យទិញ ឬទទួលផលខ្សែភ្លើង ឬឧបករណ៍ទូរគមនាគមន៍ដែលគ្មានប្រភពច្បាស់លាស់ ។ សមាជិកសាធារណជនក៏ត្រូវបានលើកទឹកចិត្តឱ្យរាយការណ៍ជាប្រញាប់អំពីសកម្មភាពសង្ស័យទាំងឡាយដែលបានសង្កេតឃើញនៅជុំវិញស្ថានីយអង់តែនសេវា (BTS) ឬហេដ្ឋារចនាសម្ព័ន្ធទូរគមនាគមន៍ផ្សេងទៀតទៅកាន់អាជ្ញាធរពាក់ព័ន្ធ ។
អាជ្ញាធរបានអះអាងថា នឹងបន្តពង្រឹងការល្បាត អនុវត្តវិធានការបច្ចេកទេស និងសហការយ៉ាងជិតស្និទ្ធជាមួយក្រុមហ៊ុនប្រតិបត្តិករទូរគមនាគមន៍ ដើម្បីការពារហេដ្ឋារចនាសម្ព័ន្ធទំនាក់ទំនង និងចាត់វិធានការយ៉ាងម៉ឺងម៉ាត់ចំពោះការល្មើសច្បាប់ទាំងឡាយស្របតាមបញត្តិច្បាប់ ៕ អត្ថបទសហការ
ចែករំលែកព័តមាននេះ