ក្រុមការងាររបស់ក្រសួងការងារ ចុះសម្របសម្រួល និងតាមដានការទទួលយកបងប្អូនពលករខ្មែរមកពីថៃ ក្នុងខេត្តក្រចេះ
ខេត្តក្រចេះ ៖ ឯកឧត្តម ម៉ុល វិបុល អនុរដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី២៨ ខែសីហា ឆ្នាំ២០២៥…
ខេត្តក្រចេះ ៖ ឯកឧត្តម ម៉ុល វិបុល អនុរដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី២៨ ខែសីហា ឆ្នាំ២០២៥ បានដឹកនាំក្រុមការងារសម្របសម្រួលផ្គូរផ្គងទីផ្សារការងារជូនពលករ នៅក្នុងក្រុមហ៊ុនអ៊ីសធើន រ៉ាប់ប៊ើរ(ខេមបូឌា) ស្ថិតនៅឃុំក្រញូង ស្រុកស្នួល ខេត្តក្រចេះ ដើម្បីសម្របសម្រួល តាមដានការទទួលយកបងប្អូនពលករខ្មែរដែលទើបវិលត្រឡប់មកពីប្រទេសថៃ ។
ក្រុមការងារនេះមានការចូលរួមពីលោក សុខ ប៊ុនវីរៈ លោក សំអុន បូរមី លោក យីម ពិសិដ្ឋ ដោយមានកិច្ចសហការសម្របសម្រួលពីលោក ម៉ី គង្គា អនុប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្ត លោកស្រី ឈ ផារី ប្រធានការិយាល័យមុខរបរ លោក ប៊ួរ រតនា អនុប្រធានការិយាល័យមុខរបរ និងលោក លី ខឡេល អភិបាលរងស្រុកស្នួលផងដែរ ។
ឯកឧត្តម ម៉ុល វិបុល អនុរដ្ឋលេខាធិការបានមានប្រសាសន៍ថា ក្រុមហ៊ុនអ៊ីសធើន រ៉ាប់ប៊ើរ(ខេមបូឌា) មានតម្រូវការកម្លាំងពលកម្មបន្ថែមចំនួន ១៨០០នាក់(ស្រី៩០០នាក់) ទៅតាមផ្នែក និងជំនាញដូចជា ផ្នែកវេចខ្ចប់ចេក ផ្នែកថែទាំចម្ការចេក ផ្នែកផ្សារដែក ផ្នែកសំណង់ ផ្នែកជាងទឹក/ភ្លើង ផ្នែកបើកគ្រឿងចក្រ ផ្នែកចិញ្ចឹមគោ ផ្នែកចុងភៅ ផ្នែកអនាម័យ ផ្នែកដាំទុរេន ផ្នែកចិញ្ចឹមត្រី ផ្នែកបកប្រែ ភាសាវៀតណាម និងភាសាអង់គ្លេស ។
លើសពីនេះ ឯកឧត្តមបានពន្យល់ណែនាំដល់ក្រុមហ៊ុនឱ្យទទួលយកបងប្អូនពលករខ្មែរដែលទើបត្រឡប់មកពីប្រទេសថៃ ដែលខ្វះអត្តសញ្ញាណបណ្ណឱ្យសម្ភាសន៍ចូលធ្វើការ និងសន្យាសហការជាមួយនឹងក្រុមការងារមន្ទីរ ក៏ដូចជា ទីភ្នាក់ងារជាតិមុខរបរ និងការងារ (NEA) ធ្វើការរួមគ្នាឱ្យមានភាពស្អិតរមួត ដើម្បីពន្លឿនប្រសិទ្ធភាពការសម្ភាសការងារតាមអនឡាញ និងទទួលយកបងប្អូនកម្មករនិយោជិតឱ្យចូលធ្វើការ ។
ឯកឧត្ដមបានពាំនាំនូវការផ្តាំផ្ញើសួរសុខទុក្ខពីសំណាក់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និងពីសំណាក់ឯកឧត្តមរដ្ឋមន្ត្រី ហេង សួរ និងបានណែនាំដល់រដ្ឋបាលរោងចក្រឱ្យបន្តយកចិត្តទុកដាក់ដល់បងប្អូនពលករខ្មែរដែលត្រឡប់មកពីប្រទេសថៃ តាមរយៈការប្រើប្រាស់នូវពាក្យសំដីសមរម្យ ត្រឹមត្រូវ ទន់ភ្លន់ និងគ្មានការរើសអើងបងប្អូនពលករដែលមកពីប្រទេសថៃ ៕ អត្ថបទសហការ
ចែករំលែកព័តមាននេះ