រាជធានីភ្នំពេញ ៖ បដិវត្តន៍ខែសីហា និងការបង្កើតសាធារណរដ្ឋប្រជាធិបតេយ្យវៀតណាម ក្នុងឆ្នាំ ១៩៤៥ គឺជាព្រឹត្តិការណ៍ប្រវត្តិសាស្ត្រដែលមិនត្រឹមតែមានសារៈសំខាន់សម្រាប់ប្រជាជនវៀតណាមប៉ុណ្ណោះទេ ថែមទាំងជាប្រភពនៃការលើកទឹកចិត្តដល់ប្រជាជាតិ និងប្រជាជនដែលបាត់បង់ឯករាជ្យភាព និងសេរីភាពរបស់ពួកគេនៅតំបន់អាស៊ី…
រាជធានីភ្នំពេញ ៖ បដិវត្តន៍ខែសីហា និងការបង្កើតសាធារណរដ្ឋប្រជាធិបតេយ្យវៀតណាម ក្នុងឆ្នាំ ១៩៤៥ គឺជាព្រឹត្តិការណ៍ប្រវត្តិសាស្ត្រដែលមិនត្រឹមតែមានសារៈសំខាន់សម្រាប់ប្រជាជនវៀតណាមប៉ុណ្ណោះទេ ថែមទាំងជាប្រភពនៃការលើកទឹកចិត្តដល់ប្រជាជាតិ និងប្រជាជនដែលបាត់បង់ឯករាជ្យភាព និងសេរីភាពរបស់ពួកគេនៅតំបន់អាស៊ី អាហ្វ្រិក និងអាមេរិកឡាទីន ជាពិសេសសម្រាប់ប្រទេសជិតខាងនៅឧបទ្វីបឥណ្ឌូចិន គឺកម្ពុជា និងឡាវ ។
ការតស៊ូដើម្បីឯករាជ្យជាតិ
ការបង្កើតប្រទេសវៀតណាមក្នុងឆ្នាំ ១៩៤៥ ក្រោមការដឹកនាំរបស់លោកប្រធាន ហូ ជីមិញ បានកត់សម្គាល់ពីការចាប់ផ្តើមនៃដំណើរតស៊ូឆ្ពោះទៅរកឯករាជ្យភាព និងការបង្រួបបង្រួមប្រទេសវៀតណាម ។ ទន្ទឹមនឹងនេះ វាបានបង្ហាញពីសច្ចភាពនៃសម័យកាលមួយដែលបណ្ដាប្រជាជាតិរងការជិះជាន់ និងការឈ្លានពាន, ប្រសិនបើមានឆន្ទៈមុតមាំ និងមាគ៌ាដឹកនាំត្រឹមត្រូវប្រកបដោយការច្នៃប្រឌិត ចេះសាមគ្គីគ្នា ក្នុងការប្រយុទ្ធនោះ,គេនឹងទទួលបាននូវឯករាជ្យ និងសេរីភាព ។ ព្រឹត្តិការណ៍ដ៏សំខាន់នេះបានក្លាយជាប្រភពនៃការបំផុសគំនិតសម្រាប់ចលនារំដោះនៅទូទាំងតំបន់ឥណ្ឌូចិន រួមទាំងប្រទេសកម្ពុជា។ជាទីដែលបណ្ដាអ្នកស្នេហាជាតិ និងជាតិនិយមចែករំលែកគ្នានូវការសម្រេចចិត្តរៀងៗខ្លួន ។
ទាំងប្រទេសកម្ពុជា និងវៀតណាមបានស៊ូទ្រាំនឹងការគ្រប់គ្រងរបស់អាណានិគមជាច្រើនទសវត្សរ៍។ ពួកគេមិនត្រឹមតែគ្រប់គ្រងទឹកដីប៉ុណ្ណោះទេ។ប៉ុន្តែថែមទាំងរៀបចំវប្បធម៌ សេដ្ឋកិច្ច និងប្រព័ន្ធនយោបាយផងដែរ។ ដូច្នេះហើយ ការតស៊ូប្រឆាំងនឹងអាណានិគមនិយម មិនមែនគ្រាន់តែជាការតស៊ូនយោបាយប៉ុណ្ណោះទេ ប៉ុន្តែក៏ជាការតស៊ូដើម្បីភាពគង់វង្សនៃអត្តសញ្ញាណជាតិ និងសិទ្ធិក្នុងការកំណត់អនាគតរបស់យើងផងដែរ។ គោលដៅនៃការបញ្ចប់ការត្រួតត្រារបស់បរទេស ការស្ដារអធិបតេយ្យភាពជាតិ និងការកសាងរដ្ឋឯករាជ្យបានក្លាយជាបេសកកម្មរួមរបស់ប្រជាជាតិទាំងពីរ។
អ្នកស្នេហាជាតិកម្ពុជា និងវៀតណាមបានបង្ហាញពីសាមគ្គីភាពជាក់ស្តែងក្នុងមនោគមវិជ្ជា ក្នុងការបណ្តុះបណ្តាល និងក្នុងសកម្មភាពរួមគ្នាតស៊ូ ។ ស្មារតីប្រឆាំងអាណានិគមរួមគ្នានេះ បានក្លាយជាមូលដ្ឋានគ្រឹះដំបូងសម្រាប់ការជឿទុកចិត្ត និងកិច្ចសហប្រតិបត្តិការ ដែលក្រោយមកបានជួយប្រជាជនទាំងពីរឱ្យយកឈ្នះលើបញ្ហាប្រឈមកាន់តែច្រើន ។
សោកនាដកម្មនៃរបបខ្មែរក្រហមពីឆ្នាំ ១៩៧៥ ដល់ឆ្នាំ ១៩៧៩ នៅតែជាផ្នែកដ៏ខ្មៅងងឹត និងឈឺចាប់បំផុតក្នុងប្រវត្តិសាស្ត្រកម្ពុជា ។ វៀតណាមដែលទើបងើបចេញពីសង្គ្រាមរាប់ទសវត្សរ៍ មិនបានបិទភ្នែកមើលទុក្ខរបស់កម្ពុជាទេ ។ កងទ័ពស្ម័គ្រចិត្តវៀតណាម ដែលធ្វើការយ៉ាងជិតស្និទ្ធជាមួយកងកម្លាំងស្នេហាជាតិកម្ពុជា បានបំពេញបេសកកម្មដ៏លំបាក និងគ្រោះថ្នាក់ក្នុងការបញ្ចប់នឹមត្រួតត្រានិងអំពើឃោរឃៅរបស់ខ្មែរក្រហម។បន្ទាប់ពីផ្តួលរំលំរបបខ្មែរក្រហម កងទ័ពស្ម័គ្រចិត្តវៀតណាមនៅបន្តដើរតួនាទីយ៉ាងសំខាន់ក្នុងការធានាសន្តិសុខ និងកសាងប្រទេសកម្ពុជាឡើងវិញ,ការពារតំបន់រំដោះ ការពារប្រជាជនកម្ពុជាពីក្រុមខ្មែរក្រហមដែលនៅសេសសល់ និងរក្សាស្ថិរភាពនៅតាមតំបន់ព្រំដែន ។
ថ្វីត្បិតតែប្រវត្តិសាស្ត្រអាចត្រូវបានបកស្រាយខុសគ្នាក៏ដោយ សម្រាប់ប្រជាជនកម្ពុជា នេះគឺជាទង្វើដែលបង្ហាញពីស្មារតីសាមគ្គីភាព ស្មោះស និងជាក់ច្បាស់របស់វៀតណាម ។ វាបានបន្សល់ទុកនូវសញ្ញាណនៃការដឹងគុណដែលមិនអាចរលុបបាននៅក្នុងដួងចិត្តរបស់ប្រជាជនកម្ពុជា និងបានចាក់គ្រឹះសម្រាប់មិត្តភាពយូរអង្វែង ។
ពូនជ្រុំទំនាក់ទំនងកម្ពុជា-វៀតណាម ប្រកបដោយនិរន្តរភាព
ឆ្លងកាត់ការប្រកៀកស្មាគ្នាជាច្រើនឆ្នាំក្នុងការតស៊ូដើម្បីឯករាជ្យ កសាង និងអភិវឌ្ឍន៍ប្រទេស ទំនាក់ទំនងជាអ្នកជិតខាងល្អ មិត្តភាពជាប្រពៃណី និងកិច្ចសហប្រតិបត្តិការលើគ្រប់វិស័យរវាងប្រទេសទាំងពីរត្រូវបានពង្រឹង និងបន្តវេន ពីមួយជំនាន់ទៅមួយជំនាន់ ហើយបានក្លាយជាទ្រព្យសម្បត្តិរួមដ៏មានតម្លៃបំផុតសម្រាប់ប្រជាជាតិទាំងពីរ ។ ក្នុងបរិបទនៃការបន្តគោលនយោបាយការបរទេស អព្យាក្រឹត និងឯករាជ្យដោយផ្អែកលើច្បាប់ ដោយប្រកាន់ខ្ជាប់នូវគោលការណ៍ពហុភាគីនិយម និងធម្មនុញ្ញអង្គការសហប្រជាជាតិ កម្ពុជាតែងតែចាត់ទុកវៀតណាមជាអាទិភាពចម្បងក្នុងគោលនយោបាយការបរទេសរបស់ខ្លួន ។ ទន្ទឹមនឹងនេះ វៀតណាមអនុវត្តគោលនយោបាយការបរទេសឯករាជ្យ ម្ចាស់ការ ដោយប្រកាន់ខ្ជាប់នូវគោលការណ៍ ពហុភាគី និងការធ្វើពិពិធកម្មទំនាក់ទំនងអន្តរជាតិ ហើយតែងតែចាត់ទុកកម្ពុជាជាជម្រើសចម្បងបំផុតក្នុងគោលនយោបាយការបរទេសរបស់ខ្លួន ។
ដំណើរទស្សនកិច្ចការទូតថ្មីៗនេះ របស់ថ្នាក់ដឹកនាំជាន់ខ្ពស់នៃប្រទេសទាំងពីរបានប្រព្រឹត្តទៅជាទៀងទាត់ ។ ភាគីទាំងពីរតែងតែឯកភាព និងអះអាងឡើងវិញនូវគោលការណ៍ក្នុងទំនាក់ទំនងទ្វេភាគី ឯកភាពលើទិសដៅជំរុញ និងអភិវឌ្ឍទំនាក់ទំនងមិត្តភាព កិច្ចសហប្រតិបត្តិការពហុភាគី និងបង្កើតយន្តការជាក់លាក់ដើម្បីដោះស្រាយបញ្ហារួមដែលជាកង្វល់របស់ភាគីទាំងពីរ បង្កើតលក្ខខណ្ឌអំណោយផលដើម្បីបន្តជំរុញទំនាក់ទំនងរវាងប្រទេសទាំងពីរទៅកាន់ដំណាក់កាលអភិវឌ្ឍន៍ថ្មី ។
ក្នុងជំនួបសន្ទនាតាមប្រព័ន្ធវីដេអូអនឡាញ នាពេលថ្មីៗនេះ រវាងប្រធានព្រឹទ្ធសភា ប្រធានគណបក្សប្រជាជនកម្ពុជា សម្តេចតេជោ ហ៊ុន សែន ជាមួយអគ្គលេខាធិការបក្សកុម្មុយនីស្ត វៀតណាម ឯកឧត្តម តូ ឡាំ ។ មេដឹកនាំកំពូលទាំងពីរបានសម្តែងការពេញចិត្តចំពោះទំនាក់ទំនងដ៏ល្អ និងរឹងមាំរវាងកម្ពុជា និងវៀតណាម ក្នុងបក្ស រដ្ឋាភិបាល និងស្ថាប័ននីតិប្បញ្ញត្តិ ។ មេដឹកនាំទាំងពីរក៏បានសម្តែងការពេញចិត្តចំពោះការកើនឡើងនៃទំហំពាណិជ្ជកម្មរវាងប្រទេសទាំងពីរ ដែលជាចំណុចសំខាន់ដែលប្រទេសទាំងពីរបានខិតខំប្រឹងប្រែងសម្រេចបានរួមគ្នា ។ គោលដៅសំខាន់រវាងកម្ពុជា និងវៀតណាម គឺសម្រេចបានទំហំពាណិជ្ជកម្ម ២០ ពាន់លានដុល្លារ នាពេលខាងមុខ ហើយថ្នាក់ដឹកនាំនៃប្រទេសទាំងពីរបានខិតខំប្រឹងប្រែងយ៉ាងខ្លាំងក្នុងការជំរុញទំហំពាណិជ្ជកម្មរវាងប្រទេសទាំងពីរឲ្យមានការអភិវឌ្ឍន៍ និងកើនឡើងជាបន្តបន្ទាប់ ។
ឆ្លៀតក្នុងឱកាសនេះ សម្តេចតេជោ បានសម្តែងនូវជំនឿថា វៀតណាមនឹងអភិវឌ្ឍយ៉ាងរឹងមាំ ឈានចូលយុគសម័យថ្មីរបស់ប្រទេសជាតិ និងសម្រេចបាននូវគោលដៅទាំងពីរ ដែលបានកំណត់ ១០០ឆ្នាំ ។សម្ដេចបានបញ្ជាក់ថា សម្តេចនឹងអញ្ជើញទៅចូលរួមក្នុងពិធីអបអរសាទរ ខួបលើកទី៨០ នៃទិវាបុណ្យជាតិវៀតណាមផងដែរ ។ ឯកឧត្ដម អគ្គលេខាបក្សកុម្មុយនីស្តវៀតណាម តូ ឡឹម បានចាត់ទុកវត្តមានរបស់សម្តេចតេជោ ក្នុងពិធីអបអរសាទរខួបលើកទី ៨០ នៃទិវាបុណ្យជាតិវៀតណាម ថាជាការឆ្លុះបញ្ចាំងពីទំនាក់ទំនងដ៏រឹងមាំ រវាងកម្ពុជា-វៀតណាម ។
នាពេលខាងមុខ បើទោះបីជាមានការប្រែប្រួលស្មុគស្មាញ និងមិនអាចព្យាករណ៍ទុកជាមុនបានក្នុងពិភពលោក និងក្នុងតំបន់ក៏ដោយ ក៏ទំនាក់ទំនងដែលបានឆ្លងកាត់ឧបសគ្គជាច្រើនឥតគណនារវាងកម្ពុជា និងវៀតណាមបានបង្កើតមូលដ្ឋានគ្រឹះដ៏រឹងមាំ បូកផ្សំនឹងភាពស្រដៀងគ្នា ក្នុងគោលនយោបាយការបរទេស ទំនាក់ទំនងមិត្តភាពជាប្រពៃណី ដ៏យូរអង្វែងរវាងកម្ពុជា និងវៀតណាម នឹងបន្តអភិវឌ្ឍឡើងដល់កម្រិតថ្មីមួយ ដែលកាន់តែជាក់លាក់ ស៊ីជម្រៅ មានប្រសិទ្ធភាពលើគ្រប់វិស័យ ក្លាយជាទ្រព្យសម្បត្តិរួម ដែលមិនអាចកាត់ថ្លៃបាន និងស្ថិតស្ថេរគង់វង្សជាអមតៈ ៕ អត្ថបទសហការ
ចែករំលែកព័តមាននេះ