សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី ស្វាគមន៍ភាគហ៊ុនិក ABA សម្រាប់ជំនួបកំពូល
រាជធានីភ្នំពេញ ៖ កាលពីថ្ងៃទី 20 ខែមីនា ឆ្នាំ 2025 គណៈប្រតិភូធនាគារជាតិកាណាដា និងធនាគារ ABA…
រាជធានីភ្នំពេញ ៖ កាលពីថ្ងៃទី 20 ខែមីនា ឆ្នាំ 2025 គណៈប្រតិភូធនាគារជាតិកាណាដា និងធនាគារ ABA បានចូលជួបសម្តែងការគួរសមជាមួយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ។ ជំនួបកំពូលនេះ បានបញ្ជាក់ជាថ្មី ចំពោះការគាំទ្រដ៏មុតមាំរបស់គ្រឹះស្ថានហិរញ្ញវត្ថុទាំងពីរ ក្នុងការរួមចំណែកអភិវឌ្ឍសេដ្ឋកិច្ចកម្ពុជានាពេលបច្ចុប្បន្ន និងអនាគត ។
គណៈប្រតិភូ ដែលដឹកនាំដោយលោក Laurent Ferreira អគ្គនាយក និងជានាយកប្រតិបត្តិនៃធនាគារជាតិកាណាដា បានអញ្ជើញមកដល់វិមានសន្ដិភាព ។ កិច្ចសន្ទនាជាមួយសម្ដេចបវរធិបតី នាយករដ្ឋមន្ដ្រី បានផ្ដោតលើការពិភាក្សាជុំវិញប្រធានបទ សំខាន់ៗជាច្រើនដូចជា ការពង្រឹងសក្ដានុពលវិនិយោគ ការជំរុញកំណើនសេដ្ឋកិច្ចប្រកបដោយចីរភាព និងការវិនិយោគ ហេដ្ឋារចនាសម្ព័ន្ធ និងគម្រោងនានាដែលនាំមកនូវចីរភាព ខណៈដែលធនាគារជាតិកាណាដា ត្រូវបានទទួលស្គាល់ជាវិនិយោគិនផ្ទាល់ពីបរទេសដ៏ធំបំផុតមួយនៅកម្ពុជា ។
មានចំណាប់អារម្មណ៍នាឱកាសនោះ លោក Laurent Ferreira បានសាទររាជរដ្ឋាភិបាលកម្ពុជា ចំពោះការរក្សាបាននូវកំណើនសេដ្ឋកិច្ចរយៈពេលវែង និងវឌ្ឍនភាពជាបន្ដបន្ទាប់របស់ប្រទេសជាតិ ។ លោកក៏បានកោតស្ញប់ស្ញែង ចំពោះការយកចិត្តទុកដាក់របស់រាជរដ្ឋាភិបាលក្នុងការផ្ដោតសំខាន់លើការរីកចម្រើនផ្នែកឌីជីថល និងការពង្រីកភាពជាដៃគូរបស់រដ្ឋាភិបាលឲ្យកាន់តែរីកចម្រើនរឹងមាំបន្ថែមទៀត ។
លោក Laurent Ferreira មានប្រសាសន៍ថា «ខ្ញុំសូមថ្លែងអំណរគុណយ៉ាងជ្រាលជ្រៅបំផុតចំពោះរាជរដ្ឋាភិបាលកម្ពុជាដែលបានប្តេជ្ញាចិត្តយ៉ាងមុតមាំ ដែលធានាបាននូវភាពរីកចម្រើនផ្នែកសេដ្ឋកិច្ច និងការអភិវឌ្ឍផ្នែកសង្គម» ។ លោកបានបន្ថែមថា «សេដ្ឋកិច្ចដ៏រស់រវើក និងបរិយាកាសធុរកិច្ចប្រកបដោយអំណោយផលល្អរបស់កម្ពុជា បានបង្កើតលក្ខខណ្ឌដ៏ប្រសើរសម្រាប់ភាពរីកចម្រើនរបស់ ABA ។ ធនាគារជាតិកាណាដា សូមធ្វើការវាយតម្លៃខ្ពស់ និងសូមសម្ដែងនូវអំណរគុណចំពោះឱកាសក្នុងការធ្វើប្រតិបត្តិការធុរកិច្ចនៅកម្ពុជា និងជាគំរូដ៏ល្អមួយនៃការវិនិយោគប្រកបដោយជោគជ័យនៅកម្ពុជា» ។
ក្នុងនាមជាធនាគារដ៏ធំមួយក្នុងចំណោមធនាគារធំៗនៅកាណាដា និងជាភាគហ៊ុនិករបស់ធនាគារ ABA ធនាគារជាតិកាណាដា បានបញ្ជាក់ជាថ្មីនូវការគាំទ្ររបស់ខ្លួន ក្នុងការលើកកម្ពស់ការវិនិយោគ និងផ្សព្វផ្សាយកិត្តិនាមរបស់កម្ពុជាជាគោលដៅវិនិយោគ និងធុរកិច្ចដ៏សុវត្ថិភាព និងទាក់ទាញ ។ លោក Laurent Ferreira បានសង្កត់ធ្ងន់ថា ភាពជោគជ័យរបស់ធនាគារ នៅក្នុងគ្រឹះស្ថានហិរញ្ញវត្ថុកម្ពុជា បានលើកមុខមាត់របស់កម្ពុជានៅប្រទេសកាណាដា ក្នុងនាមជាគោលដៅវិនិយោគដែលមានអំណោយផលល្អ ។ ធនាគារជាតិកាណាដា ចូលរួមយ៉ាងសកម្មក្នុងការណែនាំអំពីកម្ពុជាដល់អតិថិជនរបស់ខ្លួនដែលស្វែងរកការពង្រីកវិសាលភាពទៅក្រៅប្រទេស ដោយពង្រឹងទំនុកចិត្តបន្ថែមទៀតចំពោះសក្តានុពលរបស់ព្រះរាជាណាចក្រកម្ពុជា ។
គួររំលឹកផងដែរថា កាលពីខែសីហា ឆ្នាំ 2024 ធនាគារជាតិកាណាដា បានរៀបចំកិច្ចប្រជុំកំពូលរវាងគណៈប្រតិភូរាជរដ្ឋាភិបាលកម្ពុជា និងបណ្ដាធុរជន និងវិនិយោគិនឆ្នើមរបស់កាណាដា ។ កម្មវិធីជំរុញ និងទាក់ទាញវិនិយោគិន (Investment Roadshow) ដែលដឹកនាំដោយឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី 1 ក្រុមប្រឹក្សាអភិវឌ្ឍន៍កម្ពុជា បានបង្ហាញពីឱកាសវិនិយោគដ៏ទាក់ទាញរបស់កម្ពុជា នៅសហរដ្ឋអាមេរិក និងកាណាដា ។
ចំណុចសំខាន់មួយទៀតនៃកិច្ចពិភាក្សានេះ ផ្ដោតលើភាពជាដៃគូយូរអង្វែងរវាង ABA និងរាជរដ្ឋាភិបាលកម្ពុជា ក្នុងការលើកកម្ពស់ វឌ្ឍនភាពឌីជីថល ។ ធនាគារបានសង្កត់ធ្ងន់លើការយកចិត្តទុកដាក់របស់ខ្លួន ក្នុងការគាំទ្ររដ្ឋាភិបាលដើម្បីអនុវត្តដំណោះស្រាយ សេវាឌីជីថលនវានុវត្ត ពង្រឹងប្រសិទ្ធភាព និងលទ្ធភាពចូលប្រើប្រាស់សម្រាប់វិស័យនានា ។
ធនាគារ ABA ៖ ការជំរុញការអភិវឌ្ឍសេដ្ឋកិច្ច
ធនាគារ ABA បានពង្រឹងជំហររបស់ខ្លួនជាដៃគូដ៏សំខាន់មួយ នៅក្នុងការអភិវឌ្ឍសេដ្ឋកិច្ចកម្ពុជា ដោយបានបន្ដផ្ដល់ប្រាក់កម្ចីរហូតដល់ 8.6 ពាន់លានដុល្លារ ដល់វិស័យសំខាន់ៗដូចជា វិស័យពាណិជ្ជកម្ម ទេសចរណ៍ កម្មន្ដសាល និងកសិកម្ម ។ លើសពីការផ្ដល់សេវាធនាគារស្ដង់ដារ ABA ក៏បានផ្តល់ហិរញ្ញប្បទានដល់គម្រោងហេដ្ឋារចនាសម្ព័ន្ធនានា ដែលជំរុញដល់ផលិតភាព និងសមត្ថភាពប្រកួតប្រជែងរបស់ជាតិផងដែរ ។
ការផ្ដល់ហិរញ្ញប្បទានថ្មីៗរបស់ធនាគាររួមមាន សញ្ញាបណ្ណបៃតង ដែលគាំទ្រដល់កសិដ្ឋានថាមពលពន្លឺព្រះអាទិត្យ និងពង្រឹងជំហររបស់កម្ពុជានៅក្នុងតំបន់ ។ បន្ថែមពីលើនេះ ABA ក៏បានផ្ដល់ហិរញ្ញប្បទានសម្រាប់គម្រោងអភិវឌ្ឍ អាកាសយានដ្ឋានអន្តរជាតិតេជោ ដែលជាគំនិតផ្តួចផ្តើមដ៏ធំ និងមានសារៈសំខាន់មួយ សម្រាប់បង្កើនការតភ្ជាប់សេដ្ឋកិច្ច និងជំរុញកំណើនទេសចរណ៍ និងភស្តុភារកម្ម ។
កិច្ចសហការរបស់ធនាគារជាមួយរដ្ឋាភិបាល បន្ដពង្រីកជាលំដាប់ ជាពិសេសនៅក្នុងកិច្ចការប្រមូលពន្ធ ។ ក្នុងនាមជាធនាគារដែល ប្រមូលពន្ធជូនរដ្ឋដ៏ធំបំផុតមួយរបស់កម្ពុជា ABA អាចជួយដល់រដ្ឋាភិបាលក្នុងកិច្ចការប្រមូលពន្ធ ដោយក្នុងនោះ 25% សម្រាប់ពន្ធដារគ្រប់ប្រភេទ និង 10% សម្រាប់ពន្ធគយ និងកាតព្វកិច្ចផ្សេងៗតាមរយៈបណ្តាញសាខាទូទាំងប្រទេស និងផ្លែតហ្វម សេវាធនាគារឌីជីថល ដោយពង្រឹងតួនាទីរបស់ធនាគារក្នុងការពង្រឹងប្រតិបត្តិការសារពើពន្ធរបស់ជាតិ។
ABA ក៏លេចធ្លោផងដែរក្នុងនាមជាសហគ្រាសបង់ពន្ធដ៏សំខាន់មួយ ដោយបានរួមចំណែកបង់ពន្ធប្រមាណ 500 លានដុល្លារ ចាប់តាំងពីឆ្នាំ 2009 មក។ ដោយត្រូវបានទទួលស្គាល់ពីការប្តេជ្ញាចិត្តរបស់ខ្លួនចំពោះតម្លាភាព និងឧត្ដមានុវត្តន៍ ធនាគារបានទទួលវិញ្ញាបនបត្រអនុលោមភាពសារពើពន្ធ “ប្រភេទមាស” ពីអគ្គនាយកដ្ឋានពន្ធដារ សម្រាប់រយៈពេលប្រាំបីឆ្នាំ ជាប់ៗគ្នា ។
ការគាំទ្រដល់ទស្សនវិស័យអនាគតរបស់កម្ពុជា
អនាគតសេដ្ឋកិច្ចរបស់កម្ពុជា មានភាពល្អប្រសើរ គួរជាទីរំពឹងខ្ពស់ ។ យុទ្ធសាស្ត្របញ្ចកោណ និងចក្ខុវិស័យរបស់រាជរដ្ឋាភិបាល កម្ពុជា ដើម្បីសម្រេចបានជាប្រទេសដែលមានចំណូលមធ្យមកម្រិតខ្ពស់ត្រឹមឆ្នាំ 2030 បានកំណត់ផែនទីបង្ហាញផ្លូវដ៏ច្បាស់លាស់ និងមោះមុត ។ ABA ត្រៀមរួចជាស្រេច ក្នុងការគាំទ្រដល់បណ្ដាគោលដៅយុទ្ធសាស្ដ្រជាតិ តាមរយៈការលើកកម្ពស់បរិយាបន្ន ហិរញ្ញវត្ថុ ជំរុញនវានុវត្តន៍ និងលទ្ធភាពចូលរួមនៅក្នុងសកម្មភាពសេដ្ឋកិច្ច ។
ឮជាមួយការគាំទ្រឥតងាករេពីរាជរដ្ឋាភិបាលកម្ពុជា ធនាគារ ABA នឹងបន្ដចូលរួមចំណែកដើម្បីសម្រេចបាននូវចក្ខុវិស័យរួម ធ្វើឲ្យកម្ពុជាកាន់តែរីកចម្រើន និងបរិយាបន្នហិរញ្ញវត្ថុ ។
អំពីធនាគារ ABA
ABA (www.ababank.com) ជាធនាគារពាណិជ្ជធំបំផុតនៅកម្ពុជា គិតលើទ្រព្យសកម្ម, ប្រាក់បញ្ញើ, កម្ចីដុល និងប្រាក់ ចំណេញផ្អែកលើរបាយការណ៍ត្រួតពិនិត្យប្រចាំឆ្នាំ 2021 ដល់ 2023 របស់ធនាគារជាតិនៃកម្ពុជា ។
ជាមួយបណ្ដាញសាខាចំនួន 99, ទីតាំងស្វ័យសេវាចំនួន 46, ម៉ាស៊ីនស្វ័យសេវាជាង 1700+ នៅទូទាំងប្រទេស, សេវាធនាគារអនឡាញ និងកម្មវិធីធនាគារតាមទូរស័ព្ទដ៏ទំនើប ធនាគារ ABA បម្រើអតិថិជនបានកាន់តែច្រើនឡើងៗ ជាមួយសេវាហិរញ្ញវត្ថុដ៏ទំនើបសម្បូរបែប គ្រប់ពេលវេលា និងគ្រប់ទីកន្លែង ។
ធនាគារ ABA គឺជាបុត្រសម្ពន្ធរបស់ធនាគារជាតិកាណាដាដែលជាគ្រឹះស្ថានធនាគារដ៏ធំបំផុតមួយនៅប្រទេសកាណាដា ។
អំពីធនាគារជាតិកាណាដា
ធនាគារជាតិកាណាដា (www.nbc.ca) គឺជាគ្រឹះស្ថានហិរញ្ញវត្ថុមួយដែលមានទ្រព្យសកម្មប្រមាណ 334 ពាន់លានដុល្លារ គិតត្រឹមថ្ងៃទី 31 ខែមករា ឆ្នាំ 2025 និងមានបណ្តាញធនាគារឆ្លើយឆ្លងដ៏ធំនៅទូទាំងពិភពលោក ធនាគារជាតិកាណាដា ទទួលបានចំណាត់ថ្នាក់ឥណទាន “A” ពី S&P “A+” ពី Fitch និង “A1” ពី Moody’s ។
ធនាគារជាតិកាណាដាមានទីស្នាក់ការកណ្តាលនៅទីក្រុងម៉ុងរ៉េអាល់ ហើយមានសាខានៅស្ទើរតែគ្រប់ខេត្តនៃប្រទេសកាណាដា ដែលបម្រើអតិថិជនចំនួន 2.8 លាននាក់ ។ ធនាគារជាតិកាណាដា គឺជាធនាគារឈានមុខគេនៅខេត្តកេប៊ិច ដែលជាជម្រើសដៃគូ របស់សហគ្រាសធុនតូច និងមធ្យម ។
មូលបត្ររបស់ធនាគារ ត្រូវបានចុះបញ្ជីនៅផ្សារហ៊ុនតូរ៉ុនតូ (TSX: NA)។ ធនាគារមានអតិថិជននៅក្នុងសហរដ្ឋអាមេរិក អឺរ៉ុប និងតំបន់ជាច្រើនទៀតរបស់ពិភពលោក តាមរយៈការបម្រើសេវាពីការិយាល័យតំណាង ក្រុមហ៊ុនបុត្រសម្ពន្ធ និងដៃគូរបស់ខ្លួន ៕ អត្ថបទសហការ
ចែករំលែកព័តមាននេះ