លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអនុញ្ញាតឱ្យគណៈប្រតិភូនៃវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA) ដឹកនាំដោយ ឯកឧត្តមសាស្ត្រាចារ្យ…
លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានអនុញ្ញាតឱ្យគណៈប្រតិភូនៃវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា (ERIA) ដឹកនាំដោយ ឯកឧត្តមសាស្ត្រាចារ្យ Tetsuya Watanabe ជាប្រធានវិទ្យាស្ថាន ចូលជួបសម្តែងការគួរសម និងពិភាក្សាការងារ នារសៀលថ្ងៃទី ១៩ ខែកុម្ភៈ ឆ្នាំ ២០២៥ នៅធនាគារជាតិនៃកម្ពុជា អគារវត្តភ្នំ ។
ក្នុងជំនួបនេះ ឯកឧត្តមសាស្ត្រាចារ្យ បានលើកឡើងពីវឌ្ឍនភាពនៃកិច្ចសហប្រតិបត្តិការល្អរវាង ធនាគារជាតិនៃកម្ពុជា និងវិទ្យាស្ថាន ERIA នាពេលកន្លងមក ដោយមានការចុះអនុស្សរណៈយោគយល់ ស្តីពី កិច្ចសហប្រតិបត្តិការក្នុងការអភិវឌ្ឍយុទ្ធសាស្ត្រសម្រាប់ហិរញ្ញប្បទានឌីជីថលបៃតងនៅកម្ពុជា ព្រមទាំងការអនុវត្តគម្រោងស្រាវជ្រាវរួមគ្នា លើទិដ្ឋភាពហិរញ្ញប្បទានឌីជីថលបៃតង ។
បន្ថែមលើនេះ ឯកឧត្តមក៏បានលើកសរសើរពីការរៀបចំបានយ៉ាងល្អនូវគម្រោងសំណើស្រាវជ្រាវរបស់ក្រុមការងារនៃធនាគារជាតិនៃកម្ពុជា ហើយឯកឧត្តមរំពឹងថា នឹងយកលទ្ធផលនៃការសិក្សាស្រាវជ្រាវនេះសម្រាប់ជាធាតុចូលដ៏សំខាន់ដើម្បីដាក់បញ្ចូលក្នុងកំណត់បង្ហាញនៃកិច្ចប្រជុំប្រមុខថ្នាក់ដឹកនាំនៃប្រទេសសមាជិកសហគមន៍បំភាយឧស្ម័នកម្រិតសូន្យអាស៊ី (The Asia Zero Emission Community Leaders Meeting-AZEC) ។
ជាការឆ្លើយតប លោកជំទាវទេសាភិបាល បានសាទរចំពោះវឌ្ឍនភាពនៃកិច្ចសហប្រតិបត្តិការរវាងភាគីទាំងពីរនាពេលកន្លងមកព្រមទាំងបញ្ជាក់ពីការគាំទ្ររបស់ធនាគារជាតិនៃកម្ពុជា ក៏ដូចជាគោលនយោបាយជាក់លាក់របស់រាជរដ្ឋាភិបាលក្នុងការអភិវឌ្ឍហិរញ្ញប្បទានបៃតងនៅកម្ពុជា ។
ទន្ទឹមនេះ លោកជំទាវក៏បានលើកឡើងពីបញ្ហាប្រឈមទាក់ទងនឹងលទ្ធភាពមានកម្រិតរបស់គ្រឹះស្ថានធនាគារ និងហិរញ្ញវត្ថុក្នុងការទទួលបានប្រភពហិរញ្ញប្បទានបៃតង និងបានរំលេចពីតួនាទីរបស់បច្ចេកវិទ្យាប្លុកឆេន ក្នុងការដោះស្រាយបញ្ហាមួយចំនួនក្នុងដំណើរការអភិវឌ្ឍហិរញ្ញប្បទានឌីជីថលបៃតងនៅកម្ពុជាផងដែរ ។
ជារួម ឯកឧត្តមសាស្ត្រាចារ្យ និងលោកជំទាវ បានពិភាក្សាប្រកបដោយផ្លែផ្កាក្នុងបរិយាកាសរីករាយនិងស្និទ្ធស្នាល ដែលនឹងពង្រឹងកិច្ចសហប្រតិបត្តិការឱ្យកាន់តែល្អប្រសើរថែមទៀត ៕ អត្ថបទសហការ
ចែករំលែកព័តមាននេះ