ម៉ាដាហ្គាស្កា នឹងស្វែងយល់ពីប្រព័ន្ធទូទាត់ បាគង របស់កម្ពុជា
រាជធានីភ្នំពេញ ៖ ធនាគារជាតិនៃកម្ពុជា និងធនាគារកណ្តាលនៃប្រទេសម៉ាដាហ្គាស្កា កាលពីថ្ងៃអង្គារ ទី ១៨ ខែកុម្ភៈ ឆ្នាំ ២០២៥…
រាជធានីភ្នំពេញ ៖ ធនាគារជាតិនៃកម្ពុជា និងធនាគារកណ្តាលនៃប្រទេសម៉ាដាហ្គាស្កា កាលពីថ្ងៃអង្គារ ទី ១៨ ខែកុម្ភៈ ឆ្នាំ ២០២៥ បាន ចុះអនុស្សរណៈយោគយល់មួយ នៅរាជធានីភ្នំពេញ ដើម្បីផ្តល់លទ្ធភាពដល់សមភាគី ម៉ាដាហ្គាស្កាសិក្សាស្វែងយល់ អំពីប្រតិបត្តិការនៃប្រព័ន្ធបាគង ការគ្រប់គ្រងទុនបម្រុងអន្តរជាតិ និងការអនុវត្តនយោបាយរូបិយវត្ថុ របស់ប្រទេសកម្ពុជា ។
អនុស្សរណៈយោគយល់ទ្វេភាគីនេះត្រូវបានចុះហត្ថលេខាដោយ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា និង ឯកឧត្តម Hon. Aivo H. Andrianarivelo ទេសាភិបាល ធនាគារកណ្តាលម៉ាដាហ្គាស្កា ក្នុងគោលបំណង ដើម្បីបង្កើតក្របខ័ណ្ឌកិច្ច សហប្រតិបត្តិការរវាងធនាគារកណ្តាលទាំងពីរ ដោយផ្តោតលើគម្រោងសិក្សាស្រាវជ្រាវ គម្រោងតភ្ជាប់និងនវានុវត្តន៍ហិរញ្ញវត្ថុ ជាពិសេសប្រព័ន្ធទូទាត់បាគង ជាដើម ។
នៅក្នុងពិធីចុះហត្ថលេខាដែលមានវត្តមានចូលរួមពីមន្ត្រីជាន់ខ្ពស់នៃធនាគារកណ្តាលទាំងពីរ ឯកឧត្តម Hon. Aivo H. Andrianarivelo ទេសាភិបាល ធនាគារកណ្តាលម៉ាដាហ្គាស្កា បាន វាយតម្លៃខ្ពស់ចំពោះការអភវិឌ្ឍសេដ្ឋកិច្ច និងប្រព័ន្ធធនាគារកម្ពុជា ជាពិសេសប្រព័ន្ធទូទាត់ បាគង ព្រមទាំងការគរពូនទុនបម្រុងអន្តរជាតិរបស់ប្រទេសកម្ពុជា ។
ឯកឧត្តម ក៏បានបង្ហាញ សុទិដ្ឋិនិយម ចំពោះកិច្ចសហប្រតិបត្តិការជាមួយធនាគារជាតិនៃកម្ពុជា ដែលនឹងផ្តល់អត្ថ ប្រយោជន៍ទៅវិញទៅមកទាំងផ្នែកសេដ្ឋកិច្ច និងផ្នែកសង្គម ដូចជា វិនិយោគ ពាណិជ្ជកម្ម និងទេសចរណ៍ ជាដើម ។
ជាការឆ្លើយតប លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា បានផ្តល់ បដិសណ្ឋារកិច្ចយ៉ាងល្អដល់គណៈប្រតិភូធនាគារកណ្តាលម៉ាដាហ្គាស្កា និងបានស្វាគមន៍ យ៉ាងកក់ក្តៅដែលធនាគារកណ្តាលម៉ាដាហ្កាស្កា ចាប់អារម្មណ៍សិក្សាស្វែងយល់អំពីប្រព័ន្ធ ប្រតិបត្តិការធនាគារកណ្តាលរបស់ធនាគារជាតិនៃកម្ពុជា ជាពិសេសប្រព័ន្ធទូទាត់បាគង ព្រមទាំងបង្ហាញឆន្ទៈបង្កើនកិច្ចសហប្រតិបត្តិទ្វេភាគីឱ្យកាន់តែប្រសើរបន្ថែមទៀត ។
លើសពីនេះ លោកជំទាវ ទេសាភិបាល ក៏បានជម្រាបជូន សមភាគីម៉ាដាហ្គាស្តាផងដែរថា កន្លងមក ប្រទេសផ្សេងៗទៀតក៏បានមកសិក្សាស្វែងយល់ពីបទពិសោធន៍របស់ធនាគារជាតិ នៃកម្ពុជា លើការអភិវឌ្ឍប្រព័ន្ធ បាគង ហើយលោកជំទាវក៏បានបង្ហាញក្តីសង្ឃឹមថា ធនាគារ កណ្តាលទាំងពីរនឹងអាចតភ្ជាប់ប្រព័ន្ធទូទាត់ឆ្លងដែនទ្វេភាគីជាមួយគ្នានាពេលខាងមុខ ៕ អត្ថបទសហការ
ចែករំលែកព័តមាននេះ