រាជធានីភ្នំពេញ៖ មន្ត្រីជាន់ខ្ពស់គណបក្សប្រជាជនកម្ពុជា បានអះអាងនៅចំពោះមុខប្រជាជន និងសមាជិក សមាជិកាគណបក្សប្រជាជន ក្នុងឃុំទីពោ ថាកិច្ចសហប្រតិបត្តិការតំបន់ត្រីកោណ អភិវឌ្ឍន៍កម្ពុជា-ឡាវ-វៀតណាម គឺមិនមានការខាតបង់ប្រយោជន៍នានា ជាពិសេសទឹកដី…
រាជធានីភ្នំពេញ៖ មន្ត្រីជាន់ខ្ពស់គណបក្សប្រជាជនកម្ពុជា បានអះអាងនៅចំពោះមុខប្រជាជន និងសមាជិក សមាជិកាគណបក្សប្រជាជន ក្នុងឃុំទីពោ ថាកិច្ចសហប្រតិបត្តិការតំបន់ត្រីកោណ អភិវឌ្ឍន៍កម្ពុជា-ឡាវ-វៀតណាម គឺមិនមានការខាតបង់ប្រយោជន៍នានា ជាពិសេសទឹកដី ដូចជាសាធារណជនព្រួយបារម្ភនោះឡើយ ។
ការបញ្ជាក់របស់លោកជំទាវ ជា សិរី សមាជិកគណៈអចិន្ត្រៃយ៍ គណៈកម្មាធិការកណ្តាល គណបក្សប្រជាជនកម្ពុជា អនុប្រធានទី២ ក្រុមការងារថ្នាក់កណ្តាល ចុះមូលដា្ឋនខេត្តកំពង់ធំ និងជាប្រធានក្រុមការងារចុះមូលដ្ឋាន ស្រុកសន្ទុក ដូចនេះ ខណៈដែលលោកជំទាវអញ្ជើញជាអធិបតីភាព នៅក្នុងពិធីសម្ពោធដាក់ឱ្យប្រើប្រាស់ ទីស្នាក់ការគណបក្សឃុំ ទីពោ ស្ថិតស្រុកសន្ទុក ខេត្តកំពង់ធំ ដែលធ្វើឡើងនារសៀលថ្ងៃទី៧ ខែកញ្ញា ឆ្នាំ២០២៤ ។
លោកជំទាវ ជា សិរី បានបន្តទៀតថា៖ «តាមពិតទៅ គម្រោងកិច្ចសហប្រតិបត្តិការតំបន់ត្រីកោណ អភិវឌ្ឍន៍កម្ពុជា-ឡាវ-វៀតណាម នេះគ្រាន់តែ អនុញ្ញាតឱ្យប្រទេសទាំងបី ធ្វើសហប្រតិបត្តិការជាមួយគ្នា ក្នុងនាមប្រទេសជិតខាង ដើម្បីពន្លឿន ការអភិវឌ្ឍ ដោយប្រទេសនីមួយៗ គ្រប់គ្រងតែទឹកដីរបស់ខ្លួនឯងប៉ុណ្ណោះ មិនមានការបាត់បង់ ទឹកដី ដូចការបំភ្លៃព័ត៌មានមួយចំនួន ពីអ្នកវិភាគគ្មានមូលដ្ឋាននោះទេ ព្រោះទឹកដីកម្ពុជា នៅតែជារបស់កម្ពុជា ។ ម្យ៉ាងទៀត គម្រោងនេះនឹងជួយផ្តល់អត្ថប្រយោជន៍ជាច្រើន ដែលជួយលើកស្ទួយ វិស័យសេដ្ឋកិច្ច វិស័យពាណិជ្ជកម្ម វិស័យទេសចរណ៍ និងវិស័យហេដ្ឋរចនាសម្ព័ន្ធ រួមទាំង វិស័យផ្សេងៗជាច្រើនទៀត ជាពិសេសជួយសម្រួលដល់ជីវភាពបងប្អូនប្រជាពលរដ្ឋ ដែលរស់នៅខេត្តជាប់ព្រំដែន ឱ្យកាន់តែមានភាពប្រសើរឡើង ។
នៅក្នុងឱកាសនោះ លោកជំទាវ ជា សិរីបាន អំពាវនាវដល់បងប្អូនប្រជាជនយើង ក៏ដូចសាធារណជន សុំកុំស្តាប់និងជឿតាមការញុះញង់របស់ក្រុមជ្រុលនិយម ហើយត្រូវចេះរួបរួម សាមគ្គីគ្នា ព្រមទាំងចូលរួម ជាមួយរដ្ឋាភិបាល តាមរយៈមូលនិធិកសាងហេដ្ឋារចនាសម្ព័ន្ធតាម ព្រំដែន និងសូមបន្តជឿជាក់លើរាជរដ្ឋាភិបាលកម្ពុជា ក្នុងការដឹកនាំ និងអភិវឌ្ឍប្រទេសកម្ពុជា ឱ្យកាន់តែរីកចម្រើនខ្លាំងថែមទៀត ក្រោមដំបូលសុខសន្តិភាព ដែលមានសម្តេចតេជោ ជាអគ្គស្ថាបនិកដ៏ឆ្នើម និងក្រោមការដឹកនាំរាជរដ្ឋាភិបាល ដោយសម្ដេចមហាបវរធិបតី ជានាយករដ្ឋមន្ត្រី ។
នៅក្នុងខណៈនោះដែរ លោកជំទាវ ជា សិរី បានថ្លែងអំណរគុណយ៉ាងជ្រាលជ្រៅ និងថ្លែងសរសើរដោយស្មោះ ចំពោះសមាជិក-សមាជិកា គណបក្សប្រជាជនកម្ពុជា ទាំងអស់ដែលបានខិតខំបំពេញភារកិច្ច ប្រកបដោយការទទួលខុសត្រូវខ្ពស់ ជូនជាតិ និងប្រជាជន ។
លោកជំទាវបានចាត់ទុកការសម្ពោធដាក់ឱ្យប្រើប្រាស់ អគារទីស្នាក់ការបក្សឃុំ ទីពោ នាពេលនេះ គឺជាការបង្ហាញពីភាពរឹងមាំ នៃគណបក្ស និងបានឆ្លុះបញ្ចាំងពីស្មារតីសាមគ្គីភាព និងឯកភាពផ្ទៃក្នុងផងដែរ ។ ដូច្នេះគប្បី ត្រូវបន្តស្មារតីសាមគ្គី និងខិតខំអនុវត្តនូវបណ្តាភារកិច្ចចំពោះមុខ ដើម្បីពង្រឹងកម្លាំង និងប្រជាប្រិយភាព ក្នុងការដណ្ដើមប្រៀបឈ្នះរបស់បក្សយើង សម្រាប់ការបោះឆ្នោតខាងមុខៗទៀត ។
សូមបញ្ជាក់ថា អគារទីស្នាក់ការថ្មីបក្សឃុំ ទីពោ ដែលសម្ពោធដាក់ឱ្យប្រើប្រាស់នាពេលនេះមានទទឹង ១០ ម៉ែត្រ បណ្ដោយ ១២ ម៉ែត្រ, និងមានរបងប្រវែង ២០ ម៉ែត្រ និងមានខ្លោងទ្វារទំហំ ៥ ម៉ែត្រ បន្ទប់ទឹកចំនួន ១ខ្នង ២បន្ទប់ ដែលចាប់ផ្ដើមសាងសង់នៅថ្ងៃទី០៧ ខែតុលា ឆ្នាំ២០២២ បញ្ចប់ការសាងសង់នៅថ្ងៃទី០១ ខែមីនា ឆ្នាំ២០២៣ ចំណាយថវិកាចំនួនសរុប ២៨,០០០ ដុល្លារ ។
កើត ចេញពីទឹកចិត្តដ៏ឧត្តុងឧត្តមរបស់ឯកឧត្តមបណ្ឌិត ជា ចាន់តូ និងលោកជំទាវ ខៀវ ស៊ីណា ដើម្បីជាចំណងដៃប្រវត្តិសាស្ត្រ ជូនមន្ត្រី ជូនសមាជិកគណបក្ស និងប្រជាពលរដ្ឋ ក្នុងឃុំសម្រាប់ប្រើប្រាស់ ៕ អត្ថបទសហការ
ចែករំលែកព័តមាននេះ