រាជធានីភ្នំពេញ៖ ទីភ្នាក់ងារជាតិមុខរបរ និងការងារ(NEA) នៃក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថានៅខែឧសភា នេះ កម្ពុជាមានការងារប្រមាណជិត ៥ ម៉ឺនកន្លែង សម្រាប់ប្រជាពលរដ្ឋក្នុងវិស័យធំៗ ចំនួន៣ រួមមាន៖ វិស័យឧស្សាហកម្ម វិស័យសេវាកម្ម និងវិស័យកសិកម្ម ។
ទីភ្នាក់ងារនេះ បានលំអិតថា ឱកាសការងារក្នុងស្រុកសរុបទាំង ៤៨,៦០៤ កន្លែងនោះ មាន៣៥, ៨១៤ កន្លែងក្នុងវិស័យឧស្សាហកម្ម, ២,៧៨០ កន្លែងវិស័យសេវាកម្ម, និង ១០,០១០ កន្លែង វិស័យកសិកម្ម ហើយក្នុងនោះ របរដែលត្រូវប៉ាន់ច្រើនជាងគេ មានចំនួន១០ គឺអ្នកបញ្ជាម៉ាស៊ីនដេរ ២២ ៨៣២កន្លែង,កម្មករចំការដំណាំ ៩ ៩៤៥កន្លែង,មន្ត្រីឥណទាន និងប្រាក់កម្ចី ៥២៨កន្លែង,កម្មករវេចខ្ចប់ដោយដៃ ៩០៣ កន្លែង,អ្នកបញ្ជាម៉ាស៊ីនត្បាញ និងប៉ាក់ ៥៥៥ កន្លែង,អ្នកតម្លើងបរិក្ខាអគ្គិសនី និងអេឡិចត្រូនិច ៤៣៣ កន្លែង,កម្មករក្នុងផលិតកម្ម ៧ ១៤៤ កន្លែង,អ្នកបញ្ជាគ្រឿងចក្រ និងម៉ាស៊ីនផលិតផលិតផលគីមី ១ ១០០កន្លែង,យន្តការី និងអ្នកផ្ដល់សេវាគ្រឿងអេឡិចត្រូនិច ៤០០ កន្លែង,អ្នកបញ្ជាម៉ាស៊ីនវេចខ្ចប់ច្រកដាក់ដប និងដាក់ផ្លាកសញ្ជា ៦៦១ កន្លែង និងមុខរបរផ្សេងៗ ៤ ១០៣ កន្លែង ។
សូមបញ្ជាក់ថា ទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាលវិជ្ជាជីវៈ ដែលតែងតែផ្គូរផ្គង ស្វែងរកការងារធ្វើជូនប្រជាពលរដ្ឋ និងនិស្សិតរាប់ម៉ឺននាក់ ក្នុងមួយឆ្នាំៗ ហើយទីភ្នាក់ងារក៏តែងតែប្រារព្ឋពិព័រណ៍ការងារ និងមគ្គទេសក៍អាជីពដើម្បីយុវជន សិស្ស/និស្សិត និងអ្នកស្វែងរកការងារ ទទួលបានឱកាសការងារ ។
ជាក់ស្តែងកាលពីថ្ងៃទី ៩-១០ ខែឧសភា កន្លងទៅ ទីភ្នាក់ងារជាតិមុខរបរ និងការងារបានសហការជាមួយសហភាពសហព័ន្ធយុវជនកម្ពុជា ប្រារព្ធពិព័រណ៍ការងារ និងមគ្គទេសក៍អាជីពនៅអគារ Kampus ដែលបានឱកាសការងារសរុបចំនួន ៥ ៤០០ កន្លែងដល់យុវជននិងប្រជាពលរដ្ឋ ៕ អត្ថបទសហការ
ចែករំលែកព័តមាននេះ