រាជធានីភ្នំពេញ ៖ ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម ក្នុងនាមរាជរដ្ឋាភិបាលកម្ពុជា បានថ្លែងអំណរគុណ និងវាយតម្លៃខ្ពស់ចំពោះរាជរដ្ឋាភិបាល…
រាជធានីភ្នំពេញ ៖ ឯកឧត្តម លឹម គានហោ រដ្ឋមន្ត្រីក្រសួងធនធានទឹក និងឧតុនិយម ក្នុងនាមរាជរដ្ឋាភិបាលកម្ពុជា បានថ្លែងអំណរគុណ និងវាយតម្លៃខ្ពស់ចំពោះរាជរដ្ឋាភិបាល និងប្រជាជនជប៉ុន តាមរយៈឯកឧត្តមឯកអគ្គរាជទូត ដែលបាននឹងកំពុងបន្តជួយឧបត្ថម្ភ និងគាំទ្រដល់ការអភិវឌ្ឍន៍សេដ្ឋកិច្ចកម្ពុជា ដោយផ្តោតសំខាន់លើវិស័យសំខាន់ៗមួយចំនួនដូចជា ៖ ការកសាងហេដ្ឋារចនាសម្ព័ន្ធជារូបវ័ន្តលើគ្រប់វិស័យ, ការគាំទ្រដល់វិស័យសុខាភិបាល, ការស្តារ និងលើកកម្ពស់វិស័យអប់រំការលើកកម្ពស់ការអភិវឌ្ឍន៍សង្គម និងការពង្រឹងអភិបាលកិច្ចនៅកម្ពុជា ជាពិសេសវិស័យធនធានទឹក ក៏ត្រូវបានពង្រឹង និងធ្វើការអភិវឌ្ឍន៍ជាបន្តបន្ទាប់ ។
ឯកឧត្តមរដ្ឋមន្ត្រីមានប្រសាសន៍បែបនេះនៅក្នុងជំនួបជាមួយ ឯកឧត្តម MIKAMI MASAHIRO ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា និងលោកជំទាវ KAMEI Haruku ប្រធាន JICA ប្រចាំប្រទេសកម្ពុជា នៅថ្ងៃទី ២០ ខែមករា ឆ្នាំ ២០២២ នេះ ។ ឯកឧត្តមបានជម្រាបជូនអំពីសមិទ្ធផល និងការងារដែលក្រសួងសម្រេចបាន និងកំពុងអនុវត្ត ព្រមទាំងកិច្ចការងារចំពោះមុខក្នុងក្របខណ្ឌវិស័យធនធានទឹក និងឧតុនិយម ដើម្បីរួមចំណែកដោះស្រាយនូវបញ្ហាប្រឈមក្នុងបរិបទនៃបម្រែបម្រួលអាកាសធាតុ សំដៅធានានូវសន្តិសុខទឹក សម្រាប់បំពេញតម្រូវការប្រើប្រាស់ និងការអភិវឌ្ឍន៍ប្រកបដោយចីរភាព ។
ឯកឧត្តម MIKAMI MASAHIRO បានបង្ហាញនូវសេចក្តីរីករាយ ដោយបានជួបពិភាក្សាការងារដោយផ្ទាល់ជាមួយឯកឧត្តមរដ្ឋមន្ត្រី នាពេលនេះ និងបានវាយតម្លៃខ្ពស់ចំពោះសមិទ្ធផលការងារលើវិស័យធនធានទឹក និងឧតុនិយម ដែលក្រសួងសម្រេចបាន ក៏ដូចជាកិច្ចការបន្តដែលត្រូវអនុវត្តក្នុងបេសកកម្មរួមចំណែកដល់ការអភិវឌ្ឍ និងការរីកលូតលាស់សេដ្ឋកិច្ចប្រទេសកម្ពុជាឲ្យបានកាន់តែប្រសើរថែមទៀត ។ ឯកឧត្តមឯកអគ្គរាជទូត បានជម្រាបជូនឯកឧត្តមរដ្ឋមន្ត្រី នូវការប្តេជ្ញាចិត្ត បន្តរួមចំណែកជួយរបស់រាជរដ្ឋាភិបាលជប៉ុន ដើម្បីធ្វើឲ្យសេដ្ឋកិច្ចកម្ពុជា ក៏ដូចជាវិស័យធនធានទឹក មានការវិវត្តន៍រីកចម្រើនតទៅមុខ ។
សូមបញ្ជាក់ថា គិតចាប់ពីឆ្នាំ ២០០៥ រហូតមកដល់បច្ចុប្បន្ននេះ រាជរដ្ឋាភិបាលជប៉ុន តាមរយៈទីភ្នាក់ងារសហប្រតិបត្តិការអន្តរជាតិជប៉ុន (JICA) បានជួយដល់កម្ពុជាលើការគ្រប់គ្រង និងការអភិវឌ្ឍន៍វិស័យធនធានទឹក ដែលជាជំនួយឥតសំណង និងក្រោមហិរញ្ញប្បទានសម្បទាន ។ គម្រោងមួយចំនួនត្រូវបានបញ្ចប់ និងមួយចំនួនទៀតកំពុងដំណើរការ មានដូចជា គម្រោងប្រព័ន្ធធារាសាស្ត្រកណ្តាលស្ទឹង ស្ថិតក្នុងខេត្តកណ្តាល, គម្រោងកម្មវិធីកែលម្អសមត្ថភាពទប់ទល់នឹងគ្រោះធម្មជាតិ បង្កឡើងដោយការប្រែប្រួលអាកាសធាតុនៅក្នុងព្រះរាជាណាចក្រកម្ពុជា (ការផ្តល់គ្រឿងចក្រធុនធ្ងន់), គម្រោងប្រព័ន្ធធារាសាស្ត្រធ្លាម្អម ស្ថិតក្នុងខេត្តពោធិ៍សាត់, គម្រោងប្រព័ន្ធធារាសាស្ត្រម្កាក់ ស្ថិតក្នុងខេត្តសៀមរាប, គម្រោងសេវាបច្ចេកទេសប្រព័ន្ធធារាសាស្ត្រនៅកម្ពុជា, គម្រោងប្រើប្រាស់ធនធានទឹកនៅតាមអាងស្ទឹង, គម្រោងស្តារឡើងវិញនូវប្រព័ន្ធស្រោចស្រព និងប្រព័ន្ធដោះទឹកខាងលិចទន្លេសាប, គម្រោងស្តារឡើងវិញនូវប្រព័ន្ធស្រោចស្រព និងប្រព័ន្ធដោះទឹកប៉ែកនិរតីរាជធានីភ្នំពេញ និងបណ្តាគម្រោងថ្មីៗ មួយចំនួនទៀតដែលបាននឹងកំពុងអនុវត្តក្នុងឆ្នាំ ២០២២ ហើយនឹងត្រូវអនុវត្តនាបណ្តាឆ្នាំខាងមុខ ទៀត ដែលរាជរដ្ឋាភិបាលជប៉ុនបានអនុម័តរួចហើយ ៕ ដោយសហការ
ចែករំលែកព័តមាននេះ