រាជធានីភ្នំពេញ ៖ អ្នកជំនាញផ្នែកបណ្ដាញទូរស័ព្ទចល័ត បានទទូចឱ្យប្រជាជនកុំនាំគ្នាប្រើឧបករណ៍ «ចាប់ ឬពង្រីកសេវាទូរស័ព្ទ» (repeater ឬ amplifier) ដើម្បីដោះស្រាយបញ្ហាសេវាទូរសព្ទចល័តខ្សោយ…
រាជធានីភ្នំពេញ ៖ អ្នកជំនាញផ្នែកបណ្ដាញទូរស័ព្ទចល័ត បានទទូចឱ្យប្រជាជនកុំនាំគ្នាប្រើឧបករណ៍ «ចាប់ ឬពង្រីកសេវាទូរស័ព្ទ» (repeater ឬ amplifier) ដើម្បីដោះស្រាយបញ្ហាសេវាទូរសព្ទចល័តខ្សោយ ។ អ្នកជំនាញបាននិយាយថា ឧបករណ៍ចាប់សេវាទូរសព្ទដែលគ្មានការអនុញ្ញាតពីក្រសួងពាក់ព័ន្ធ គឺមិនបានជួយដោះស្រាយបញ្ហាខ្សោយសេវាទូរស័ព្ទនោះទេ ប៉ុន្តែផ្ទុយទៅវិញ ឧបករណ៍ទាំងនោះបង្កការរំខានដល់ស្ថានីយផ្សាយសេវារបស់ក្រុមហ៊ុនបណ្ដាញទូរសព្ទចល័តទៅវិញទេ ។ ជាងនេះទៅទៀត ការទិញ លក់ ដំឡើង និងប្រើប្រាស់ឧបករណ៍ទាំងនេះដោយគ្មានអាជ្ញាបណ្ណ គឺជាទង្វើខុសច្បាប់ ដែលអាចនឹងត្រូវប្រឈមមុខនឹងច្បាប់ស្ដីពីទូរគមនាគមន៍កម្ពុជា ។
បច្ចុប្បន្ន គេឃើញមានការត្អូញត្អែរមួយចំនួននៅលើបណ្ដាញព័ត៌មានសង្គមអំពីការខ្សោយ ឬគ្មានសេវាទូរសព្ទដៃនៅតាមតំបន់មួយចំនួន ដែលជួនកាល សេវាខ្សោយ ឬគ្មានសេវាតែម្ដង ។ អ្នកជំនាញបានពន្យល់ថា អ្នកដែលបានទិញឧបករណ៍ចាប់សេវាទូរសព្ទៃ (ឬហៅថា mobile wave amplifier ឬ repeater) បានដំឡើងប្រើប្រាស់ឧបករណ៍នេះដោយគ្មានការអនុញ្ញាតិដែលនាំឲ្យបង្កការរំខានធ្ងន់ធ្ងរទៅលើស្ថានីយផ្សាយរបស់ក្រុមហ៊ុនបណ្ដាញទូរសព្ទ ដែលនាំឲ្យប៉ះពាល់ដល់គុណភាពសេវាដែលផ្ដល់ដល់អតិថិជន ។ អ្នកជំនាញបានបន្តថា ឧបករណ៍ចាប់សេវាទូរសព្ទនេះត្រូវបានគេរកឃើញថា មានប្រើក្នុងចំនួនដ៏ច្រើនគួរសម នៅក្នុងរាជធានីភ្នំពេញ និងខេត្តកណ្ដាល ។
យោងតាមអ្នកជំនាញ ឧបករណ៍ចាប់សេវាទូរសព្ទនេះវារំខានទៅដល់ស្ថានីយផ្សាយសេវា ដែលនាំឲ្យប៉ះពាល់ទៅដល់គុណភាពសេវា ។ ឧបករណ៍ទាំងនេះរំខានដល់សេវាទូរសព្ទដៃ ធ្វើឲ្យគេមិនអាចកំណត់ហ្វ្រេកង់បាន និងបណ្ដាលឲ្យអ្នកប្រើប្រាស់នៅក្នុងតំបន់ជិតខាងមិនអាចធ្វើការហៅចេញ ឬទទួលទូរសព្ទ ឬប្រើប្រាស់អ៊ីនធឺណិតបាន ។
បើយោងតាមច្បាប់ មានតែសហគ្រាសឬក្រុមហ៊ុនដែលផ្ដល់សេវាទូរសព្ទចល័តប៉ុណ្ណោះ ដែលត្រូវបានអនុញ្ញាតឲ្យប្រើប្រាស់ឧបករណ៍បញ្ជូនសេវាទូរសព្ទចល័តសម្រាប់ការដំឡើងនៅតាមតំបន់នានាដែលមានសេវាខ្សោយ ដើម្បីធ្វើឲ្យគុណភាពសេវាទូរសព្ទមានភាពល្អប្រសើរ និងមិនបង្កផលរំខានទៅដល់បណ្ដាញទូរគមនាគមន៍ចល័តដទៃទៀត ។ ក្នុងករណីដែលសេវាទូរសព្ទនៅក្នុងតំបន់ណា មួយមិនឆ្លើយតបទៅតាមតម្រូវការប្រើប្រាស់ដោយសារតែសេវាខ្សោយពេក អ្នកប្រើប្រាស់ត្រូវធ្វើការទំនាក់ទំនងដោយផ្ទាល់ និងចូលរួមរាយការណ៍អំពីបញ្ហានេះទៅកាន់ក្រុមហ៊ុនផ្ដល់សេវាទូរសព្ទ ដើម្បីសុំការណែនាំ និងការធានាផលប្រយោជន៍របស់អ្នកប្រើប្រាស់ ៕ ដោយសហការ
ចែករំលែកព័តមាននេះ