ខេត្តបាត់ដំបង ៖ ជុំវិញសកម្មភាពចោរកាច់សោរ.កលួចម៉ូតូនេះ បើតាមមន្ត្រីការិយាល័យជំនាញបាននិយាយថា ពេលនេះកម្លាំងជំនាញកំពុងតាមស្រាវជ្រាវ និងតាមកំណត់មុខសញ្ញាជនល្មើសទាំងនេះបានខ្លះៗហើយ។ គួររំលឹកថា មានការភ្ញាក់ផ្អើលឆោឡោទាំងព្រឹក បន្ទាប់ពីមានជនមិនស្គាល់បានធ្វើសកម្មភាពកាច់សោរ.កលួចយកម៉ូតូមួយគ្រឿងបានដោយសុវត្ថិភាព កាលពីវេលាម៉ោង៨និង៣០នាទី…
ខេត្តបាត់ដំបង ៖ ជុំវិញសកម្មភាពចោរកាច់សោរ.កលួចម៉ូតូនេះ បើតាមមន្ត្រីការិយាល័យជំនាញបាននិយាយថា ពេលនេះកម្លាំងជំនាញកំពុងតាមស្រាវជ្រាវ និងតាមកំណត់មុខសញ្ញាជនល្មើសទាំងនេះបានខ្លះៗហើយ។
គួររំលឹកថា មានការភ្ញាក់ផ្អើលឆោឡោទាំងព្រឹក បន្ទាប់ពីមានជនមិនស្គាល់បានធ្វើសកម្មភាពកាច់សោរ.កលួចយកម៉ូតូមួយគ្រឿងបានដោយសុវត្ថិភាព កាលពីវេលាម៉ោង៨និង៣០នាទី ព្រឹកថ្ងៃទី២៥ ធ្នូ នៅចំណុចខាងមុខផ្សារណាត់ (ផ្សារធំបាត់ដំបង) ដែលស្ថិតនៅចំកណ្ដាលបេះដូង ក្រុងបាត់ដំបង ។
យោងតាមរបាយការណ៍សមត្ថកិច្ចបានឱ្យដឹងថា ម៉ូតូដែលចោរលួចផ្អើលទាំងព្រឹកនោះ ម៉ាកឃ្លីកពណ៌ស ស៊េរីឆ្នាំ២០១៧ (គ្មានស្លាកលេខ) របស់ឈ្មោះ សែម សំណាង ភេទស្រី អាយុ២៣ឆ្នាំ រស់នៅភូមិកម្មករ សង្កាត់ស្វាយប៉ោ ក្រុងបាត់ដំបង ។ សមត្ថកិច្ចបាននិយាយថា ម៉ូតូនោះ ត្រូវម្ចាស់ជិះទៅឈប់នៅខាងមុខផ្សារណាត់ រួចដើរចូលទិញម្ហូបនៅខាងក្នុងផ្សារ លុះត្រឡប់មកវិញក៏មានការផ្អើលឆោឡោតែម្ដង ដោយសារបាត់ម៉ូតូពីកន្លែងដែលខ្លួនទុក ។
បើតាមម្ចាស់ម៉ូតូនោះបាននិយាយប្រាប់សមត្ថកិច្ចថា ខ្លួនមិនបានយកម៉ូតូទៅផ្ញើនៅក្បែរផ្សារនោះទេ ព្រោះគិតថា ចូលផ្សារមួយភ្លេតចេញមកវិញ។ គាត់បានបញ្ជាក់ថា ពេលដើរចេញពីក្នុងផ្សារមកយកម៉ូតូស្រាប់តែមិនឃើញម៉ូតូ ទើបមានការភ្ញាក់ផ្អើលតែម្ដង ។ មានការកត់សម្គាល់ដែរថា ពាក់ព័ន្ធនឹងសណ្ធាប់ធ្នាប់នៅម្ដុំផ្សារណាត់ ឬផ្សារធំបាត់ដំបងនេះ គេពិនិត្យឃើញហាក់មានភាពរញ៉េរញ៉ៃយ៉ាងខ្លាំង គ្មានរបៀបរៀបរយទេ។ អ្នកគ្រប់គ្រងផ្សារបានយកផ្លូវជុំវិញផ្សារស្ទើរពាក់កណ្ដាលរៀបចំឱ្យអាជីវករដាក់ទំនិញលក់ដូរយ៉ាងអនាធិបតេយ្យ។
ជាពិសេស អ្នកលក់ត្រី សាច់ បន្លែ និងផ្ញើម៉ូតូ ដែលនាំឱ្យមានការកកស្ទះចរាចរណ៍រាល់ថ្ងៃ។ ដោយឡែកនៅខាងមុខផ្សារណាត់ (ខាងលិច) គឺមានភាពរញ៉េរញ៉ៃខ្លាំងណាស់ ទាំងអ្នកលក់ដូរទាំងម៉ូតូនិងរថយន្តបានឈប់ព្រោងព្រាតពេញផ្លូវគ្មានរបៀបរៀបរយទេ ដែលជាឱកាសសម្រាប់ជនល្មើសធ្វើសកម្មភាពលួចបានយ៉ាងងាយបំផុត។
ពាក់ព័ន្ធនឹងបទល្មើសកាច់សោរ.កលួចម៉ូតូនេះ បើតាមប្រភពពីសមត្ថកិច្ចបានឲ្យដឹងថា ប៉ុន្មានថ្ងៃកន្លងទៅនេះ ករណីកាច់សោរលួចម៉ូតូនេះបានកើតឡើងជាបន្តបន្ទាប់ មិនថានៅក្នុងក្រុងឬនៅតាមបណ្ដាស្រុកមួយចំនួនទៀត ។ ជាក់ស្ដែង កាលពីថ្ងៃទី២៤ ធ្នូ ជនសង្ស័យចំនួន២នាក់បានកាច់សោរ.កលួចយកម៉ូតូប្រជាពលរដ្ឋម្នាក់មួយគ្រឿង នៅឃុំឈើទាល ស្រុកបាណន់។ ជនទាំង២នាក់បានលួចយកម៉ូតូនោះជិះគេចខ្លួនបានដោយសុវត្ថិភាព។ ប៉ុន្តែរូបភាពជនល្មើសទាំង២នាក់បានបន្សល់ទុកនៅក្នុងកាមេរ៉ាសុវត្ថិភាពយ៉ាងច្បាស់ក្រឡែត តែសមត្ថកិច្ចមិនទាន់វែកមុខក្រុមជនសង្ស័យបាននៅឡើយទេ។
ព័ត៌មាននេះ មិនត្រូវបានគេទម្លាយឱ្យដឹងឡើយ ព្រោះបទល្មើសបែបនេះបានកើតឡើងញឹកញាប់ពេក។ ដោយសារតែសមត្ថកិច្ចមិនទាន់បំបែកមុខសញ្ញានេះបាន ទើបក្រុមជនល្មើសនៅតែអាចដើរធ្វើសកម្មភាពលួចម៉ូតូនៅតាមទីផ្សារឬនៅតាមលំនៅឋាន ឬ នៅតាមទីសាធារណ:ជាបន្តបន្ទាប់បានដោយសុវត្ថិភាព។
ចែករំលែកព័តមាននេះ