រាជធានីភ្នំពេញ ៖ នៅទីបំផុតតារាចម្រៀងលោក រិន សាវេត បានសម្រេចចូលរោងការជាមួយស្ត្រីវ័យប្រមាណជាង៣០ឆ្នាំ បន្ទាប់ពីភរិយារបស់លោកបានទទួលមរណភាពដោយសារជំងឺ។ ពិធីមង្គលការរបស់តារាចម្រៀងរូបនេះ បានធ្វើឡើងនៅថ្ងៃទី១៨ ខែធ្នូ ឆ្នាំ២០១៩នេះ នៅបុរីវិមានពិភពថ្មីសែនសុខ ដោយនៅក្នុងនោះគេសង្កេតឃើញមានការចូលពីសាច់ញាត្តិ និងមិត្តភក្តិក្នុងពិភពសិល្បៈជាច្រើននាក់ផងដែរ។
មង្គលការរបស់លោក រិន សាវេត បានកើតមានឡើង បន្ទាប់ពីលោក និងភរិយាបានរៀបចំពិធីភ្ជាប់ពាក្យជាមួយគ្នាកាលពីថ្ងៃទី០២ ខែសីហា ឆ្នាំ២០១៩ ក្រោយពីអ្នកទាំងពីរបានស្វែងយល់ចិត្តគ្នាប្រមាណជាងមួយឆ្នាំមកនេះ។ ស្ត្រីដែលស្ម័គ្រចិត្តចូលខ្លួនមកស្អុំបេះដូងជូនតារាចម្រៀងពោះម៉ាយកូន១រូបនេះ គឺស្ត្រីដែលមានវ័យ៣០ឆ្នាំស្ដើង។
លោក រិន សាវ៉េត ធ្លាប់បានអះអាងថា ពួកគេទាំងពីរទើបតែចាប់ផ្ដើមស្គាល់គ្នា និងស្វែងយល់ចិត្តគ្នាកាលពីពេលថ្មីៗនេះប៉ុណ្ណោះ ដែលដំបូងឡើយគ្រាន់តែរាប់អានគ្នាធម្មតា ប៉ុន្តែក្រោយមកស្វែងយល់ចិត្តគ្នាច្បាស់ ហើយគិតថា នឹងឈានទៅជាគូរអនាគត។ គូរអនាគតរបស់លោកមានឈ្មោះថា kimguech lim មានស្រុកកំណើតនៅរាជធានីភ្នំពេញ មានមុខរបរជាអ្នកច្នៃម៉ូដកាបូប។
តារាចម្រៀងចាស់វង្សារូបនេះ បានបញ្ជាក់ថា មូលហេតុដែលខ្លួនសម្រេចចិត្តជ្រើសរើស នាង kimguech lim ជាគូរអនាគត ក៏ព្រោះតែនាងជាមនុស្សចិត្តល្អ មានការអធ្យាស្រ័យ និងអ្វីដែលជាពិសេសនោះ គឺចេះស្រលាញ់កូនប្រុស និងព្រមទទួលយកអ្វីដែលលោកមានទាំងអស់ ដោយមិនរើសអើង ទោះបីដឹងថា លោកជាពោះម៉ាយ មិនមានជីវភាពធូរធាក្ដី។
យ៉ាងណាក៏ដោយ ដំណឹងពីការចូលរោងការពីសំណាក់លោក រិន សាវេត នាពេលនេះបានធ្វើឱ្យមហាជន ជាពិសេសប្រិយមិត្តគាំទ្រលោកជាច្រើនបានសម្តែងការអបអរសាទរយ៉ាងខ្លាំង និងបានជូនពរឱ្យលោក និងភរិយាស្រឡាញ់គ្នារហូតចាស់កោងខ្នង៕ (កែសម្រួលដោយ ៖ បុប្ផា)
ចែករំលែកព័តមាននេះ