រាជធានីភ្នំពេញ ៖ រដ្ឋមន្ត្រីក្រសួងទេសចរណ៍ លោក ថោង ខុន បានថ្លែងលើកទឹកចិត្តចំពោះម្ចាស់មូលដ្ឋានអាជីវកម្មទេសចរណ៍ទាំងឡាយដែលមានឆន្ទៈចូលរួមលើកស្ទួយវិស័យទេសចរណ៍ និងគោលដៅទេសចរណ៍ជាតិ ប៉ុន្តែព្រមានចាត់វិធានការយ៉ាងដាច់ខាតចំពោះ មូលដ្ឋាន អាជីវកម្មណា ដែលបោកប្រាស់ភ្ញៀវ ដើម្បីតែផលចំណេញមួយពេលហើយប៉ះពាល់ដល់គោលដៅទេសចរណ៍នៅកម្ពុជា ។
ការលើកទឹកចិត្ត និងព្រមានបែបនេះរបស់លោករដ្ឋមន្ត្រីក្រសួងទេសចរណ៍ត្រូវបានធ្វើឡើង ក្នុងពិធីបើកសម្ពោធហាងលក់គ្រឿងអលង្ការ ច័ន្ទ គឹមទី ស្ថិតនៅតាមបណ្ដោយមហាវិថី ម៉ៅ សេទុង (ខាងលិចស្ដុបបូកគោ) នាថ្ងៃទី១៥ ខែធ្នូ នេះ ។
ទន្ទឹមនោះ លោករដ្ឋមន្ត្រី ថោង ខុន ក៏បានបង្ហាញនូវសុទិដ្ឋិនិយមខ្ពស់ ចំពោះហាងលក់គ្រឿង អលង្ការ ច័ន្ទ គឹមទី ដែលអាចបម្រើឱ្យគ្រប់សេចក្ដីត្រូវការរបស់ភ្ញៀវជាតិ-អន្តរជាតិ និងចូលរួមលើកស្ទួយវិស័យទេសចរណ៍ជាតិផងដែរ ។ លោករដ្ឋមន្ត្រីបានលើកឡើងថា ក្នុងចំណោមភ្ញៀវទេសចរសរុបនៅលើពិភពលោកក៏ដូចជា នៅកម្ពុជាមានប្រមាណ២៥% តែងតែចូលចិត្តទិញគ្រឿងអលង្កា វត្ថុអនុស្សាវរីយ៍ និងគ្រឿង ចម្លាក់សិល្បៈផ្សេងទៀត ដោយលោកបានដាស់តឿនឱ្យអាជីវកម្មទាំងឡាយដែលប្រតិបត្តិការលើផ្នែកនេះត្រូវពង្រឹងគុណភាពសេវាកម្មធានាគុណភាព បដិសណ្ឋារកិច្ច ពិសេសមិនត្រូវបោកប្រាស់ភ្ញៀវជាដាច់ខាត ។
លោក ថោង ខុន បានថ្លែងបញ្ជាក់ថា នៅពេលមកទស្សនាកម្សាន្តនៅប្រទេសកម្ពុជា ពិសេសនៅគោលដៅសៀមរាប-អង្គរ ភ្ញៀវទេសចរ អឺរ៉ុប ចូលចិត្តទិញវត្ថុអនុស្សាវរីយ៍ និងគ្រឿងចម្លាក់របស់ខ្មែរ ចំណែកភ្ញៀវទេសចរអាស៊ី ពិសេសទេសចរណ៍ចិនចូលចិត្តទិញគ្រឿងអលង្ការដូចជា មាស ពេជ្រ ត្បូងមានតម្លៃ និងគ្រឿងអលង្ការដទៃទៀត ។ នេះជាសក្ដានុពលមួយដែលកម្ពុជាត្រូវបំពេញតម្រូវការជូនភ្ញៀវទេសចរទាំងនោះ និងត្រូវធានាគុណភាពចំពោះផលិតផលរបស់ខ្លួនដាច់ខាតមិនត្រូវបោកប្រាស់ភ្ញៀវ ឬកាត់ថ្លៃហួសហេតុខុសពីតម្លៃពិតនោះឡើយ ។
លោកបានបន្តថា ក្រៅពីផ្ដល់នូវតម្រូវការសម្បូរបែបបជូនភ្ញៀវ និងអតិថិជន ម្ចាស់អាជីវកម្មក៏ត្រូវគិតគូរចំពោះបុគ្គលិកលើការផ្ដល់ភាពកក់ក្ដៅ សេវាកម្មល្អ សុវត្ថិភាព និងបដិសណ្ឋារកិច្ចជូនភ្ញៀវ ព្រោះចំណុចនេះក៏ជាចូលរួមការផ្សព្វផ្សាយកិត្តិនាមល្អរបស់កម្ពុជាទៅកាន់ភ្ញៀវទេសចរបរទេស និងអតិថិជនផ្សេងទៀតរបស់ហាងផងដែរ ដែលស្របទៅនឹងយុទ្ធនាការ «កម្ពុជា៖ ព្រះរាជាណាចក្រអច្ឆរិយៈ ផ្ដល់ភាពកក់ក្ដៅ» ។
ជាមួយគ្នានោះ លោករដ្ឋមន្ត្រី ថោង ខុន ក៏បានលើកឡើងពីការអនុវត្តច្បាប់យ៉ាងតឹងរឹង ចំពោះមូលដ្ឋានអាជីវកម្មទេសចរណ៍ទាំងឡាយដែលលក់ផលិតផល ឬទំនិញអន់គុណភាព ឬក្លែងក្លាយជូនភ្ញៀវ ។ លោករដ្ឋមន្ត្រីបានព្រមានថា «ច្បាប់ថ្មីដែលទើបនឹងដាក់ឱ្យអនុវត្តនោះអាចឈានដល់ការបិទអាជីវកម្មទាំងមូលថែមទៀតផង» ។
លោកស្រី ច័ន្ទ គឹមទី ស្ថាបនិក និងជាម្ចាស់ហាងលក់គ្រឿងអលង្ការនេះបានឱ្យដឹងថា លោកស្រីធ្លាប់មានប្រវត្តិជាជាងទង ហើយការបើកអាជីវកម្មលក់គ្រឿងអលង្ការនេះក៏ដើម្បីចូលរួមលើកស្ទួយកិត្យានុភាពជាតិលើវិស័យគ្រឿងអលង្ការក៏ដូចជា ចូលរួមលើកស្ទួយដល់វិស័យទេសចរណ៍ជាតិផងដែរ ។ លោកស្រីបានប្ដេជ្ញាពីការធានាគុណភាពគ្រឿងអលង្ការ ការផ្ដល់ជូននូវភាពសម្បូរបែប ការយកចិត្តទុកដាក់លើសេវាកម្ម សុវត្ថិភាព និងបដិសណ្ឋារកិច្ចជូនភ្ញៀវ និងអតិថិជនជាដើម ពិសេសហាងគ្រឿងអលង្ការថ្មីនេះ ក៏មានលក់គ្រឿងអលង្ការដែលរចនាតាមសិល្បៈ ខ្មែរបុរាណផងដែរ ៕
ចែករំលែកព័តមាននេះ