ខេត្តព្រៃវែង ៖ បើតាមសេចក្តីរាយការណ៍បឋមបានឱ្យដឹងថា ផ្ទះប្រជាពលរដ្ឋចំនួន២ខ្នង ដែល១ខ្នងជាប្រភេទផ្ទះថ្ម និង១ខ្នងទៀតជាប្រភេទផ្ទះឈើ រួមទាំងរបស់របរប្រើប្រាស់នៅក្នុងផ្ទះជាច្រើនទៀតបានបាក់ធ្លាក់ចូលទៅក្នុងទឹកទន្លេអស់ ដោយសារតែការបាក់ដីច្រាំងទន្លេ ។ ជាមួយគ្នានោះដែរ ផ្ទះប្រជាពលរដ្ឋចំនួន២ខ្នងផ្សេងទៀតដែលនៅក្បែគ្នានោះក៏ត្រូវបានម្ចាស់បង្ខំចិត្តរុះរើចេញផងដែរ ដោយសារតែខ្លាចបាក់ស្រុតចូលទៅក្នុងទន្លេទៀត។
សេចក្តីរាយការណ៍បន្តថា ហេតុការណ៍បាក់ដីច្រាំងទន្លេខាងលើនេះ បានកើតឡើងកាលពី ម៉ោង១០ព្រឹក ថ្ងៃទី៧ ខែធ្នូ ឆ្នាំ២០១៩ នៅតាមបណ្តោយដងទន្លេតូច ស្ថិតក្នុងភូមិប្រាសាទកើត ឃុំបន្លិចប្រាសាទ ស្រុកពាមរក៌ ខេត្តព្រៃវែង តែទោះជាយ៉ាង ណាវាមិនបានបណ្តាលឱ្យមាននរណាម្នាក់រងគ្រោះថ្នាក់នោះទេ។
បើតាមការឱ្យដឹងពីលោកមេភូមិបានឱ្យដឹងថា ករណីបាក់ដីច្រាំងទន្លេនៅចំណុចខាងលើនេះ គឺចាប់កើតឡើងតាំងពីម៉ោង១រំលងអធ្រាត្រម្ល៉េះ ដោយពីដំបូងគឺបានបាក់ផ្ទះបាយរបស់ជនរងគ្រោះ ឆេង វណ្ណី អាយុ២៧ឆ្នាំ លិចចូលទៅក្នុងទឹក លុះព្រឹកឡើងជនរងគ្រោះក៏រាយការណ៍ប្រាប់អាជ្ញាធរ និងសមត្ថកិច្ចនាំគ្នាចុះទៅពិនិត្យមើល ហើយអាជ្ញាធរ និងសមត្ថកិច្ច ព្រមទាំងជនរងគ្រោះក៏នាំគ្នាជួយរើជញ្ជូនទ្រព្យសម្បត្តិ និងរបស់ប្រើប្រាស់ក្នុងផ្ទះយកទៅទុកនៅកន្លែងសុវត្ថិភាព ប៉ុន្តែជញ្ជូនមិនទាន់អស់ផង ផ្ទះជនរងគ្រោះ ឆេង វណ្ណី និងផ្ទះជនរងគ្រោះម្នាក់ទៀតឈ្មោះ អឹម សុភណ្ឌ័ អាយុ៣០ឆ្នាំ ដែលនៅក្បែគ្នានោះ បានបាក់ធ្លាក់ចូលទៅក្នុងទន្លេគ្រាំងតែម្តង ដោយមិនអាចជួយសង្គ្រោះទាន់នោះទេ។
លោកមេភូមិបានបញ្ជាក់ថា ដោយផ្ទះបាក់ចូលទៅក្នុងទឹកអស់២ខ្នងទៅហើយ ទើបអាជ្ញាធរឱ្យម្ចាស់ផ្ទះ២ខ្នងទៀតដែលនៅក្បែគ្នានោះផងដែរ រុះរើផ្ទះចេញពីច្រាំងទន្លេជាបន្ទាន់ ដោយទាំងអាជ្ញាធរ និងសមត្ថកិច្ចក៏ជួយរុះរើដែរ។
ដោយឡែកជនរងគ្រោះទាំង៤គ្រួសារ បានឱ្យដឹងថា ពួកគាត់សុទ្ធតែមានជីវភាពក្រីក្រ ហើយអ្វីដែលសំខាន់ គឺពួកគាត់មានតែដីនៅទីតាំងនេះទេ សម្រាប់ធ្វើផ្ទះរស់នៅ ឥឡូវនេះត្រូវមករងគ្រោះបាក់ទាំងដី បាក់ទាំងផ្ទះអស់ទៀត ដូច្នេះចំពោះមុខគឺពួកគាត់គ្មានកន្លែងរស់នៅទេ ដូច្នេះពួកគាត់សំណូមពរឱ្យអាជ្ញាធរ រាជរដ្ឋាភិបាលជួយដោះស្រាយ រកដីកន្លែងណាមួយ ដើម្បីឱ្យពួកគាត់បានរស់នៅផង។
ជាមួយគ្នានោះដែរ នៅរសៀលថ្ងៃកើតហេតុនោះ លោកស្រី សេង ទៀង អភិបាលស្រុកពាមរក៌ ក៏បានដឹកនាំមន្ត្រីកាកបាទក្រហមស្រុក ព្រមទាំងព្រះសង្ឃ និងសប្បុរសជនជាច្រើននាក់នាំយកជំនួយទៅចែកជូនដល់ក្រុមគ្រួសារជនរងគ្រោះទាំង៤គ្រួសារផងដែរ ។
ហើយក្នុងឱកាសនោះលោកស្រីអភិបាល បានណែនាំឱ្យបងប្អូនប្រជាពលរដ្ឋផ្សេងទៀត ដែលមានផ្ទះសង់នៅលើដីច្រាំងទន្លេដូចគ្នា សូមឱ្យមានការប្រុងប្រយ័ត្នឱ្យបានខ្ពស់ ហើយបើឃើញថា ស្ថានភាពមិនស្រួលនោះទេ សូមរាយការណ៍មកសមត្ថកិច្ច និងអាជ្ញាធរភ្លាម ដើម្បីឱ្យអាជ្ញាធរ និងសមត្ថកិច្ច បានចុះទៅជួយអន្តរាគមទាន់ពេលវេលា៕ (កែសម្រួលដោយ ៖ បុប្ផា)
ចែករំលែកព័តមាននេះ