រាជធានីភ្នំពេញ ៖ តារាសម្តែងជើងចាស់អ្នកស្រី អ៊ឹម ផល្លារ ដែលភាគច្រើនសម្តែងជាតួអង្គម្តាយបានធ្វើឲ្យមហាជនមានការភ្ញាក់ផ្អើលយ៉ាងខ្លាំង បន្ទាប់ពីតារារូបនេះជួបបញ្ហាជីវភាពយ៉ាងធ្ងន់ធ្ងរ មិនអាចដោះស្រាយចេញរហូតប៉ងសម្លាប់ខ្លួន ក្នុងពេលដែលអ្នកស្រីបានបង្ហាញវត្តមានសម្តែងស្ទើរគ្រប់រឿង ។…
រាជធានីភ្នំពេញ ៖ តារាសម្តែងជើងចាស់អ្នកស្រី អ៊ឹម ផល្លារ ដែលភាគច្រើនសម្តែងជាតួអង្គម្តាយបានធ្វើឲ្យមហាជនមានការភ្ញាក់ផ្អើលយ៉ាងខ្លាំង បន្ទាប់ពីតារារូបនេះជួបបញ្ហាជីវភាពយ៉ាងធ្ងន់ធ្ងរ មិនអាចដោះស្រាយចេញរហូតប៉ងសម្លាប់ខ្លួន ក្នុងពេលដែលអ្នកស្រីបានបង្ហាញវត្តមានសម្តែងស្ទើរគ្រប់រឿង ។
តាមរយៈការសម្តែងរបស់អ្នកស្រី អ៊ឹម ផល្លារ គ្មាននរណាម្នាក់គិតទេថា តារារូបនេះជួបបញ្ហាជីវភាពខ្វះខាតនោះទេ ព្រោះអ្នកស្រីហាក់មិនសូវបានលាតត្រដាងពីបញ្ហាជីវភាពជាសាធារណៈនោះឡើយ ។ ធាតុពិតរបស់តារាសម្តែងជើងចាស់រូបនេះ មិនខុសពីតារាសម្តែងចាស់ៗមួយចំនួនទៀតឡើយ ពោលគឺអ្នកស្រី អ៊ឹម ផល្លារ កំពុងស្នាក់នៅផ្ទះជួលជាមួយនឹងជីវភាពខ្វះមុខខ្វះក្រោយ ។
កាន់តែអាណិតខ្លោចចិត្តបន្ថែមទៀតនោះ អ្នកស្រីត្រូវបានម្ចាស់ផ្ទះជួលចាក់សោរមិនឲ្យចូលស្នាក់នៅ ដោយសារអ្នកស្រីមិនបានបង់ថ្លៃជួលរយៈពេល៣ខែមកហើយ ទើបធ្វើឲ្យអ្នកស្រីពិបាកចិត្តគិតអ្វីមិនចេញ រហូតប៉ងសម្លាប់ខ្លួនថែមទៀត ។
តារាសម្តែងលោក អ៊ឹម ជីវ៉ា ដែលបានជួបសម្ភាសន៍ផ្ទាល់ជាមួយអ្នកស្រី អ៊ឹម ផល្លារ បានឲ្យដឹងថា អ្នកមីង ផល្លារ ត្រូវបានម្ចាស់ផ្ទះចាក់សោរមិនឱ្យចូលដោយសារអត់បង់ថ្លៃផ្ទះឱ្យគេ ហើយគាត់ប៊ិះនឹងលោតទឹកសម្លាប់ខ្លួនទៅហើយ ។
លោកបញ្ជាក់ថា អ្នកមីង ផល្លារ រាល់ថ្ងៃជួលបន្ទប់គេនៅជាមួយកូនម្តុំផ្សារកណ្តាលជាន់ទី៣ ដោយអ្នកមីងមានជីវភាពក្រីក្រខ្វះខាត និងមានជំងឺ រហូតកាលពីម្សិលមិញអ្នកមីងមកដល់ផ្ទះខ្ញុំ ហើយស្រែកយំរៀបរាប់ទាំងទឹកភ្នែក ដោយឱ្យជួយផ្សព្វផ្សាយ និងជួយដល់គាត់ផង។
បើតាមលោក អ៊ឹម ជីវ៉ា អ្នកមីង ផល្លារ គឺជាតារាសម្តែងជើងចាស់ដែលទទួលបានការគាំទ្រពីទស្សនិកជន ដោយអ្នកមីងតែងតែថតខ្សែភាពយន្តជាច្រើនរឿងរាប់មិនអស់ ដោយដើរតួជាម្តាយ មេដោះ អ្នកបម្រើ យាយ អក ។ល។ អ្នកមីងតែងតែដើរថតកុនឱ្យគេបានមួយថ្ងៃរស់មួយថ្ងៃ ពេលខ្លះមានផលិតកម្មខ្លះមិនបើកលុយឱ្យអ្នកមីងផងដែរ តែមីង ផល្លារ មិនហ៊ានទារទេ ខ្លាចគេលែងហៅថត សុខចិត្តដើរខ្ចី និងសុំពីមិត្តសិល្បៈពេលទៅថតម្តងៗ ។
លោក អ៊ឹម ជីវ៉ា បានឲ្យដឹងទៀតថា បើទោះបីជាអ្នកមីង អ៊ឹម ផល្លារ សម្តែងរឿងបានច្រើនក៏ពិតមែន ប៉ុន្តែក្នុងនាមជាតួម្តាយ និងតួអ្នកបម្រើ គឺតម្លៃខ្លួននៃការថតមិនបានច្រើននោះឡើយ ។ តម្លៃខ្លួនថតរបស់គាត់ ពេលខ្លះកាត់ថ្លៃធ្វើដំណើរទៅថត និងការហូបចុក សម្លៀកបំពាក់ គឺស្ទើរតែគ្មានសល់នោះឡើយ ខណៈពេលដែលខ្លួនជាស្ត្រីមេម៉ាយចិញ្ចឹមកូនក្នុងបន្ទុកថែមទៀត ។
ទោះជាយ៉ាងណាក៏ដោយ នៅពេលដែលមានការផ្សព្វផ្សាយនូវដំណឹងមួយនេះរួចមកលោក អ៊ឹម ជីវ៉ា បានបញ្ជាក់ថា មានសប្បុរសជន និងអ្នកសិល្បៈដូចគ្នាបានជួយជាថវិកាបានមួយចំនួនជាបន្តបន្ទាប់ សម្រាប់ឲ្យអ្នកមីង អ៊ឹម ផល្លារ ដោះស្រាយបញ្ហាបានមួយរយៈ ៕ (កែសម្រួលដោយ ៖ បុប្ផា)
ចែករំលែកព័តមាននេះ