ខេត្តតាកែវ ៖ លោកស្រី ប៉ែន សារុំ ដែលមានមុខងារនឹងតួនាទីជាស្នងការរងនគរបាលខេត្តតាកែវ បានប្តឹងអតីតគ្រូបង្រៀនរបស់ខ្លួន រួមនឹងពលរដ្ឋ៥រូបផ្សេងទៀត ដែលរស់នៅឃុំព្រៃស្លឹក ស្រុកទ្រាំង ពីបទជេរប្រមាថជាសាធារណៈ ។
លោក យឹម ណាត ដែលជាអតីតគ្រូបង្រៀននៅសាលាវិទ្យាល័យព្រៃសណ្តែក ហើយបច្ចុប្បន្នបានចូលនិវត្តន៍បានលើកឡើងថា ដំណើរដើមនៃរឿងនេះ គឺក្នុងអំឡុងឆ្នាំ២០១៨ តុលា រូបលោករួមនឹងបងប្អូនប្រជាពលរដ្ឋក្នុងភូមិជាច្រើននាក់ បានធ្វើការដាំបង្គោលនៅចំណុចផ្លូវចូលទៅក្នុងភូមិ និងបានចាក់ដីសម្រាប់ដាំបង្គោលនេះដែរ ។
ប៉ុន្តែក្នុងពេលកំពុងតែដាំបង្គោលនោះ ឈ្មោះ ប៉ែន សារុំ ដែលជាអតីតកូនសិស្សរបស់គាត់បង្រៀននៅវិទ្យាល័យព្រៃសណ្តែក ក្នុងអំឡុងឆ្នាំ១៩៨៨ បានជិះរថយន្តឆ្លងកាត់ ផ្លូវដែលពលរដ្ឋកំពុងតែដាំបង្គោល ពេលនោះពលរដ្ឋសុំគាត់រយៈពេល៥នាទី ដើម្បីដាំបង្ហើយបង្គោលនោះ ប៉ុន្តែបែរជាលោកស្រី ប៉ែន សារុំ ដែលមានតួនាទី បុណ្យស័ក្តិជាស្នង ការរងខេត្តតាកែវ ប្រើសំដី មិនសមរម្យមកលើប្រជាពលរដ្ឋ ពិសេសពលរដ្ឋដែលមានវ័យ ចំណាស់ទៅហើយ ដោយពោលថា៉ ប្រញ៉ាប់ធ្វើទៅងាប់ឯណា បន្ទាប់មកក៏មានការប្រកែក និងតសំដីគ្នាទៅវិញទៅមក ប៉ុន្តែពុំមានប្រជាពលរដ្ឋណាម្នាក់បានជេរប្រមាថទៅលើឈ្មោះ ប៉ែន សារុំ នោះឡើយ មានតែសុំឲ្យគាត់រង់ចាំបន្តិច ព្រោះដាំបង្គោលជិតរួចហើយ ។
លោក យឹម ណាត បន្ថែមទៀតថា មូលហេតុដែលបងប្អូនប្រជាពលរដ្ឋដាំបង្គាល នៅផ្លូវចូលក្នុងភូមិ ក៏ដើម្បីរាំរាំងមិនឲ្យឡានដឹកដីរបស់ឈ្មោះ ពៅ បើកឆ្លងកាត់ភូមិ ព្រោះ វានឹងធ្វើឲ្យផ្លូវលំដីសនេះ ឆាប់ខូច និងមានសភាពហ៊ុយខ្លាំង ដែលអាចនឹងប៉ះពាល់ដល់ សុខភាពពលរដ្ឋនៅទីនេះ ដូច្នោះក៏ដាំបង្គោលដើម្បី
កុំឲ្យឡានដឹកដីចូលតទៅទៀត ។ ឈ្មោះ ប៉ែន សារុំ ដែលមានមុខងារជាស្នងការរងខេត្តតាកែវ គឺមិនដែលឃើញ ហើយក៏ មិនដែលបើកឡានចូលភូមិក្នុងឃុំព្រៃស្លឹកនេះដែរ ប៉ុន្តែមិនដឹងថា នៅថ្ងៃកើតហេតុ រូប គាត់បើកឡាននេះ បំណងទៅណានោះទេ ។
លោក យឹម ណាត បញ្ជាក់ទៀតថា ក្រោយពីមានជម្លោះជាមួយឈ្មោះ ប៉ែន សារុំ ជាមួយនឹងប្រជាពលរដ្ឋ ឈ្មោះប៉ែន សារុំ ក៏បានដាក់ពាក្យបណ្តឹងទៅកាន់តុលាការ ដោយធ្វើការចោទប្រកាន់ពលរដ្ឋ៦រូប ពីបទ ជេរប្រមាថជាសាធារណៈ។
ចែករំលែកព័តមាននេះ