រាជធានីភ្នំពេញ ៖ បន្ទាប់ពីហាមឃាត់ជនបរទេសមិនឲ្យប្រកបមុខរបរមួយចំនួន ស្រាប់តែកាលពីពេលថ្មីៗនេះ ក្រសួងការងារនិងបណ្តុះបណ្តាលវិជ្ជាជីវៈ បានប្រកាសអនុញ្ញាតឲ្យជនបរទេសប្រកបមុខរបរគ្រប់ប្រភេទឡើងវិញ ដោយអះអាងថា មានតម្រូវការជំនាញនៅក្នុងប្រទេស ។ យោងតាមសេចក្តីជូនដំណឹងរបស់ក្រសួងការងារនិងបណ្តុះបណ្តាលវិជ្ជាជីវៈ…
រាជធានីភ្នំពេញ ៖ បន្ទាប់ពីហាមឃាត់ជនបរទេសមិនឲ្យប្រកបមុខរបរមួយចំនួន ស្រាប់តែកាលពីពេលថ្មីៗនេះ ក្រសួងការងារនិងបណ្តុះបណ្តាលវិជ្ជាជីវៈ បានប្រកាសអនុញ្ញាតឲ្យជនបរទេសប្រកបមុខរបរគ្រប់ប្រភេទឡើងវិញ ដោយអះអាងថា មានតម្រូវការជំនាញនៅក្នុងប្រទេស ។
យោងតាមសេចក្តីជូនដំណឹងរបស់ក្រសួងការងារនិងបណ្តុះបណ្តាលវិជ្ជាជីវៈ ស្តីពីការអនុញ្ញាតឡើងវិញ
នៃសកម្មភាពស្វ័យនិយោជន៍ដោយជនបរទេស ចេញផ្សាយនៅថ្ងៃទី៥ ខែតុលា ឆ្នាំ២០១៩ បានលើកឡើង
ថា «សហគ្រាសគ្រឹះស្ថាន និងជនបរទេសដែលធ្វើសកម្មភាពស្វ័យនិយោជន៍ជ្រាបថា យោងតាមតម្រូវការកម្លាំងពលកម្មជំនាញនៃជនបរទេសក្នុងវិស័យសេវាកម្ម និងដើម្បីលើកទឹកចិត្តដល់ការវិនិយោគក្នុងព្រះរាជាណាចក្រកម្ពុជា ក្រសួងការងារនិងបណ្តុះបណ្តាលវិជ្ជាជីវៈ បានអនុញ្ញាតឡើងវិញនូវគ្រប់សកម្មភាព
ស្វ័យនិយោជន៍ដោយជនបរទេស» ។
គួររំឭកថា ក្រសួងការងារនិងបណ្តុះបណ្តាល វិជ្ជាជីវៈ កាលពីសីហា ឆ្នាំ២០១៩ បានចេញប្រកាសដោយដាក់កំហិតមិនឲ្យជនបរទេសប្រកបមុខរបរចំនួន១០ប្រភេទនៅព្រះរាជាណាចក្រកម្ពុជា ។ ប្រកាសរបស់ក្រសួងការងារនិងបណ្តុះបណ្តាលវិជ្ជាជីវៈ ចុះថ្ងៃទី២៨ ខែសីហា ឆ្នាំ២០១៩ បានលើកឡើងថា មុខរបរដែលស្ថិតក្នុងបម្រាមទាំងអស់នោះរួមមាន ការលក់ដូរដោយមធ្យោបាយថ្មើរជើង ឬយានជំនិះគ្រប់ប្រភេទ ម៉ាស្សា និងចាប់សរសៃតាមទីសាធារណៈ កាត់សក់អ៊ុតសក់ ថែរក្សាសម្ផស្ស ប៉ះកង់ ជួសជុលយានយន្ត កាត់ដេរ សេវាកម្មដេរ និងសម្អាតស្បែកជើង ផលិតវត្ថុអនុស្សាវរីយ៍ខ្មែរ ផលិតឧបករណ៍ភ្លេងខ្មែរ ផលិតបាត្រលោក ព្រះពុទ្ធរូប ជាងទងនិងជាងច្នៃត្បូងពេជ្រ ។
ក្រសួងនឹងមិនផ្តល់ឬមិនបន្តសុពលភាពប័ណ្ណ សៀវភៅការងារដល់ជនបរទេស ដែលកំពុងប្រកបមុខរបរ និងការងារដូចបានកំណត់ខាងលើនោះទេ ។ ជនណាដែលប្រព្រឹត្តផ្ទុយនឹងបទប្បញ្ញត្តិនៃប្រកាសនេះ នឹងត្រូវធ្វើការពិន័យជាប្រាក់ និងផ្តន្ទាទោសតាមបទប្បញ្ញត្តិនៃច្បាប់ស្តីពីការងារ និងបទប្បញ្ញត្តិជាធរមាន ។
បើតាមរបាយការណ៍របស់ក្រសួងការងារ និងបណ្តុះបណ្តាលវិជ្ជាជីវៈ ចេញកាលពីខែមីនា ឆ្នាំ២០១៩ ឲ្យដឹងថា ក្នុងឆ្នាំ២០១៨ក្រសួងបានផ្តល់ប័ណ្ណនិងសៀវភៅការងារដល់ជនបរទេសចំនួន១៣៥.២០១នាក់ ៕
ចែករំលែកព័តមាននេះ