ខេត្តកំពង់ឆ្នាំង ៖ ក្នុងថ្ងៃបុណ្យភ្ជុំបិណ្ឌត្រូវនឹងថ្ងៃទី២៨ ខែកញ្ញា ឆ្នាំ២០១៩ មានមនុស្សរហូតដល់ទៅ៣នាក់បានលង់ទឹកស្លាប់ ក្នុងករណី៣ផ្សេងគ្នា ខណៈជនរងគ្រោះបានចុះទៅលេងទឹកកម្សាន្តនៅរមណីយដ្ឋាននានាក្នុងខេត្តកំពង់ឆ្នាំង ។
ករណីទី១- នៅរមណីយដ្ឋានទំនប់២០ឧសភា ស្ថិតក្នុងព្រុំប្រទល់ជាប់គ្នារវាង ភូមិថ្មកែវ ឃុំស្វាយជ្រុំ ស្រុករលាប្អៀរ និងភូមិស្រះកែវ ឃុំមេលំ ស្រុកបរិបូរណ៍ មានយុវជនម្នាក់បានលង់ទឹកស្លាប់នៅពេលចុះលេងទឹកជាមួយមិត្តភក្តិ ដែលហេតុការណ៍នេះបានកើតឡើងកាលពីវេលាម៉ោង៤និង៣០នាទីរសៀលថ្ងៃទី២៨ កញ្ញា ។
ជនរងគ្រោះដែលស្លាប់ឈ្មោះ យ៉េត ស្រស់ ភេទប្រុស អាយុ២១ឆ្នាំ មានទីលំនៅភូមិស្មែត ឃុំស្វាយជ្រុំ ស្រុករលាប្អៀរ (ជនរងគ្រោះជាកូនកំព្រារស់នៅ៣នាក់បងប្អូន) ។
តាមប្រភពពីអ្នកឃើញហេតុការណ៍នៅកន្លែងកើតហេតុបានឲ្យដឹងថា មុនពេលកើតហេតុ ជនរងគ្រោះខាងលើ និងមិត្តភក្កិបីនាក់ទៀតបាននាំគ្នាទៅលេងទំនប់ 20 ឧសភា ហើយក៏មានការផឹកស៊ីផងដែរ ក្រោយពេលផឹកស៊ីហើយ ជនរងគ្រោះខាងលើ និងមិត្តភក្កិបាននាំគ្នាចុះងូតទឹក ប៉ុន្តែចៃដន្យក៏ត្រូវទឹកហូរទាញយកទៅកន្លែងទឹកជ្រៅហើយបណ្ដាលឲ្យលង់ ។
តាមប្រភពដដែលបានបន្តថា ពេលនោះជនរងគ្រោះបានព្យាយាមលើកដៃហៅអោយគេជួយដែរ តែគ្មានអ្នកចាប់អារម្មណ៍ចុះជួយទាន់ពេលវេលា ទើបបណ្តាលអោយលង់ស្លាប់តែម្តង។
ក្រោយពេលកើតហេតុ គណៈកម្មការគ្រប់គ្រងទំនប់ទឹក២០ ឧសភា ក៍បានបិទទ្វារទឹកនៅកន្លែងកើតហេតុដើម្បីចុះរាវរក អស់រយៈពេលប្រមាណជាង១ម៉ោង ទាំងការរៀបចំបិទទ្វារទឹក និងទាំងការចុះរាវរក ទើបរកសពជនរងគ្រោះឃើញ ។ បច្ចុប្បន្ន សពជនរងគ្រោះត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី។
ករណីទី២-នៅរមណីយដ្ឋានខ្សាច់ស ស្ថិតក្នុងព្រុំប្រទល់២ជាប់គ្នាដែរ គឺភូមិអញ្ជាញរូង ឃុំអញ្ចាញរូង ស្រុកបរិបូរណ៌ និងភូមិតាំងត្រពាំង ឃុំពេជចង្វា ស្រុកបរិបូរណ៌ មានករណីកុមារាម្នាក់បានលង់ទឹកស្លាប់ ខណៈកុមារារងគ្រោះចុះលេងទឹកជាមួយបងប្អូន៣នាក់ ប៉ុន្តែ២នាក់ទៀតត្រូវបានជួយសង្គ្រោះទាន់ ដែលហេតុការណ៍នេះបានកើតឡើងកាលពីវេលាម៉ោង១២ថ្ងៃត្រង់ថ្ងៃទី២៨ កញ្ញា ឆ្នាំ២០១៩ ។
តាមប្រភពពីសមត្ថកិច្ចនៅកន្លែងកើតហេតុបានបញ្ជាក់ថា កុមារារងគ្រោះដែលស្លាប់ឈ្មោះ ធា សុខលី អាយុ១៣ឆ្នាំ មានទីលំនៅតាខ្មៅ ខេត្តកណ្តាល ។
តាមប្រភពពីសមត្ថកិច្ចបានបន្តថា មុនពេលកើតហេតុ កុមាររងគ្រោះខាងលើបានធ្វើដំណើរចេញមកភ្ជុំបិណ្ឌនៅវត្តថ្មកែវ ជាស្រុកកំណើត នៅខេត្តកំពង់ឆ្នាំង ជាមួយនឹងម្តាយ ព្រមទាំងក្រុមគ្រួសារ ដោយមានរថយន្តចំនួន៣គ្រឿង ។ លុះពេលចេញពីវត្ត ក្រុមគ្រួសារខាងលើបានទៅកាន់រមណីយដ្ឋានស្ទឹងខ្សាច់ស ។
តាមប្រភពពីសមត្ថកិច្ចបានបន្តថា ពេលទៅដល់រមណីយដ្ឋានខ្សាច់សនៅវេលាម៉ោង១២ថ្ងៃត្រង់ ថ្ងៃដដែលនោះ មិនទាន់មានប្រជាពលរដ្ឋទៅលេងនៅឡើយទេ ចំណែកសមត្ថកិច្ចនិងប្រជាការពារ ក៍មិនទាន់ទៅដល់ដែរ។ ពេលដល់ភ្លាមៗនោះ កុមារងគ្រោះ និងបងប្អូន២នាក់ទៀត បានរត់ចេញពីរថយន្តសំដៅចុះទឹកលេង បណ្តាលអោយលង់តែម្តង សូម្បីតែម្តាយក៍មិនដឹងផង ព្រោះនៅរថយន្តនៅឡើយ ។
តាមប្រភពដដែលបានបញ្ជាក់ថា ពេលលង់នោះគឺលង់ទាំង៣នាក់តែម្តង ប៉ុន្តែ២នាក់ត្រូវបានជួយសង្គ្រោះទាន់ ចំណែកកុមារារងគ្រោះជួយមិនទាន់ឡើយ ព្រោះទឹកជ្រៅនិងហូរខ្លាំងពេក។ សពកុមាររងគ្រោះនៅមិនទាន់រកឃើញនៅឡើយទេ គិតរហូតដល់វេលាម៉ោង១០ព្រឹកថ្ងៃទី២៩ ខែកញ្ញានេះ ។
ករណីទី៣-នៅចំណុចលេខផ្លូវ៥០c ដែលស្ថិតនៅភូមិកង្កែប ឃុំច្រណូក ស្រុកកំពង់លែង ខេត្តកំពង់ឆ្នាំង ជាផ្លូវតភ្ជាប់ទៅខេត្តកំពង់ធំវិញ ក៍មានករណីកុមារាអាយុ៩ឆ្នាំម្នាក់បានស្លាប់ដោយសារលង់ទឹកដែរ ដែលហេតុការណ៍នេះបានកើតឡើងនៅថ្ងៃទី២៨ កញ្ញា ។
កុមារារងគ្រោះដែលស្លាប់ឈ្មោះសុវណ្ណ ដាវីន អាយុ៩ឆ្នាំ មានឪពុកឈ្មោះ ម៉ន សុវណ្ណ អាយុ៣១ឆ្នាំ និងម្តាយឈ្មោះ ហាក់ ស្រ៊ន អាយុ៣០ឆ្នាំ ។ គ្រួសារនេះរស់នៅភូមិធ្លក ឃុំច្រណូក ។
តាមប្រភពព័ត៌មានបានឱ្យដឹងថា មុនពេលកើតហេតុ កុមារារងគ្រោះត្រូវបានឪពុកម្តាយនាំទៅលេងទឹកនៅចំណុចកើតហេតុខាងលើ ដែលមានទឹកកំពុងហូរកាត់ផ្តាច់ដោយទឹកជំនន់ ។ ពេលនោះកុមាររងគ្រោះ និងកេ្មងៗដទៃទៀត រួមទាំងមនុស្សចាស់ផងបាននាំគ្នាចុះលេងទឹក ស្រាប់តែត្រូវទឹកហូរទាញយកកុមារារងគ្រោះធ្លាក់ទៅកន្លែងទឹកជ្រៅបណ្តាលអោយលង់ ទម្រាំតែមានអ្នកដឹង និងរាវរកឃើញ គឺកុមារារងគ្រោះបានស្លាប់បាត់ទៅហើយ។
បច្ចុប្បន្ន សពកុមាររារងគ្រោះត្រូវបានក្រុមគ្រួសារដឹកមកលំនៅដ្ឋានដើម្បីធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ