ខេត្តបាត់ដំបង ៖ ពលរដ្ឋម្នាក់ដែលរួចផុតពីការស្លាប់ដោយសារការរលំបាក់ដីភ្នំសង្កត់ ហើយត្រូវបានកម្លាំងយោធានិងក្រុមគ្រួសារជនរងគ្រោះស្វែងរកឃើញនៅក្នុងទឹកដីនៃប្រទេសថៃនោះ ពេលនេះកំពុងត្រូវបានបញ្ជូនទៅសង្គ្រោះនៅមន្ទីរពេទ្យខេត្តហើយ ។ នេះបើតាមការផ្ដល់ព័ត៌មានឲ្យដឹងពីមន្ត្រីយោធភូមិភាគទី៥ នៅព្រឹកថ្ងៃទី២០ កញ្ញា នេះ ។
មន្ត្រីយោធាបានឲ្យដឹងថា ជនរងគ្រោះឈ្មោះ ឆាង កុយ ហៅ រិទ្ធី អាយុ២៥ឆ្នាំ រស់នៅភូមិអូរត្រែង ឃុំតាតោក ស្រុកសំឡូត។ ជនរងគ្រោះរូបនេះ ត្រូវបានកម្លាំងយោធានៅក្នុងអង្គភាពលេខ៥០២ កម្លាំងផ្នែកសឹករងស្រុកសំឡូត និងសាច់ញាតិជនរងគ្រោះ ដែលមានកិច្ចសហការពីកម្លាំងទាហានថៃផង បានរុករកឃើញនៅវេលាម៉ោង២ និង១៥នាទីរសៀលថ្ងៃទី១៩ កញ្ញា ខណៈដែលជនរងគ្រោះកំពុងសម្ងំនៅក្បែរអូរមួយកន្លែង នៅក្នុងទឹកដី ខេត្តត្រាត ប្រទេសថៃ ចម្ងាយពីព្រំដែនប្រហែលជិត១គីឡូម៉េត្រ ។
ក្រុមជួយសង្គ្រោះដែលមានតែកម្លាំងយោធាខ្មែរ-ថៃ និងក្រុមគ្រួសារជនរងគ្រោះ បានសែងជនរងគ្រោះចុះពីភ្នំ ហើយបញ្ជូនចូលទឹកដីខ្មែរ តាមច្រករបៀង«ពាមតា» ស្រិតក្នុងឃុំតាតោក ស្រុកសំឡូត នៅវេលាម៉ោងជាង៥ល្ងាចថ្ងៃដដែល ដែលមានរថយន្តសង្គ្រោះរបស់យោធារងចាំទទូលជាស្រេចនៅក្បែរព្រំដែននោះ។
ដោយឡែក ជនរងគ្រោះម្នាក់ទៀតមិនទាន់មានតម្រុយនៅឡើយទេ ហើយក្រុមជួយសង្គ្រោះកំពុងបន្តស្វែងរកនៅក្នុងព្រៃតំបន់នោះនឡើយ ។ បើតាមជនរងគ្រោះឈ្មោះឆាង កុយ ហៅ រិទ្ធី នេះបានប្រាប់មន្ត្រីយោធាដែលជួយសង្គ្រោះថា ពួកខ្លួនមានបក្សពួកចំនួន៧នាក់បានចូលព្រៃនៅក្បែរព្រំដែន ដើម្បីដាក់អន្ទាក់សត្វព្រៃ តែបានឆ្លងព្រំដែនជ្រុលចូលទឹកដី នៃប្រទេសថៃ ហើយរហូតជួបហេតុការណ៍រលំបាក់ដីភ្នំសង្កត់តែម្ដង ខណៈមានភ្លៀងធ្លាក់យ៉ាងខ្លាំងនៅតំបន់។
ពលរដ្ឋរូបនេះបានបញ្ជាក់ថា ពេលដែលកើតហេតុនោះ ពួកខ្លួនបានរត់បែកគ្នាមិនអ្នកណារស់អ្នកណាស្លាប់នោះទេ ។ ទោះយ៉ាងណា បើតាមប្រភភពពីមន្ត្រីយោធាបានបញ្ជាក់ថា ជនរងគ្រោះត្រូវបានបញ្ជូនភ្លាមៗទៅកាន់មន្ទីរពេទ្យហើយ ខណៈក្រុមជួយសង្គ្រោះ កំពុងបន្តរុករកជនរងគ្រោះម្នាក់ទៀត ដែលមិនទាន់មានដំណឹងតើ ស្លាប់ ឬនៅរស់ ? ។ (សម្រួលដដោយ៖ ស្រីណា)
ចែករំលែកព័តមាននេះ