រាជធានីភ្នំពេញ ៖ កំពូលតារាចម្រៀង ព្រាប សុវត្ថិ ធ្លាប់នាំ១គ្រួសារព្រមទាំងក្រុមរាំរបស់លោកផងធ្លាប់ទៅចូលរួមប្រគំតន្ត្រីឲ្យក្រុមហ៊ុនរបស់លោក ឧកញ៉ា ឡេង ណាវ៉ាត្រា ម្ដងរួចមកហើយ…
រាជធានីភ្នំពេញ ៖ កំពូលតារាចម្រៀង ព្រាប សុវត្ថិ ធ្លាប់នាំ១គ្រួសារព្រមទាំងក្រុមរាំរបស់លោកផងធ្លាប់ទៅចូលរួមប្រគំតន្ត្រីឲ្យក្រុមហ៊ុនរបស់លោក ឧកញ៉ា ឡេង ណាវ៉ាត្រា ម្ដងរួចមកហើយ នៅប្រទេសកូរ៉េ កាលចុងឆ្នាំ២០១៨ ដែលកាលនោះកំពូលតារាចម្រៀងរូបនេះធ្លាប់សន្យា និងអ្នកគាំទ្រលោកនៅទីនោះថា ប្រសិនបើលោកមានឱកាសបានចេញទៅច្រៀងនៅប្រទេសកូរ៉េជាលើកទី២ លោកនឹងនាំទាំងក្រុមភ្លេងមកជាមួយថែមទៀត ដើម្បីឲ្យការប្រគំតន្ត្រីមានភាពទាក់ទាញ ត្បិតអីការឡើងទៅច្រៀងកាលពីលើកទី១ នោះ គឺច្រៀងដោយចាក់ភ្លេង ហាក់ដូចជា សប្បាយមិនអស់ដៃ ។
ដូចបានសន្យានៅថ្ងៃទី១៣ ខែកញ្ញា ឆ្នាំ២០១៩ កំពូលតារាចម្រៀងរូបនេះនឹងចេញទៅច្រៀងរាំនៅប្រទេសទេសកូរ៉េម្ដងទៀតហើយដោយការប្រគំតន្ត្រីខ្នាតធំ មិនធ្លាប់មាននេះមានតារាចម្រៀងជាច្រើនក្នុងនោះមានក្រុមចចកសមុទ្រដែលជាក្រុមភ្លេងល្បីឈ្មោះជាងគេ នៅក្នុងប្រទេសកម្ពុជាទៅជាមួយផងទាំងនេះក៏ព្រោះតែឧកញ៉ា ឡេង ណាវ៉ាត្រា គឺជាអ្នកឧបត្ថម្ភផ្ដាច់មុខលើការប្រគំតន្ត្រីនេះ ។
កន្លងមកក្រុមហ៊ុនបុរីឡេងណាវ៉ាត្រា ធ្លាប់បានចាយទុនធានាយកតារាខ្មែរទៅច្រៀងរួមគ្នានៅក្នុងប្រទេសកូរ៉េ ប៉ុន្តែការប្រគំតន្ត្រីទាំងនោះមិនធ្លាប់មាន ប្រគំដោយផ្ទាល់ពីក្រុមតន្ត្រីករ ដែលគេហៅថា Live Band នោះទេ ។ អ្វីដែលកាន់តែពិសេស គឺការប្រគំតន្ត្រីលើកនេះ Live Band ដោយក្រុមចចកសមុទ្រដែលជាក្រុមល្បីល្បាញនៅកម្ពុជា និងកំពូលតារាចម្រៀងជាច្រើនដួងទៀត ។
លោកឧកញ៉ា ឡេង ណាវ៉ាត្រា អគ្គនាយកបុរីឡេងណាវ៉ាត្រា បានប្រកាសជាសាធារណៈថា ដើម្បីឲ្យការប្រគំតន្ត្រីនៅក្នុងប្រទេសកូរ៉េ ទទួលបានការចាប់អារម្មណ៍ជាងមុន លោកសម្រេចអញ្ជើញក្រុមចចកសមុទ្រយកទៅកាន់ឧបករណ៍តន្ត្រីដោយផ្ទាល់ ដោយមិនតម្រូវឲ្យសិល្បករបកស្រាយចម្រៀង ដោយការចាក់សាច់ភ្លេងទៀតទេ ។ លោកថា ការប្រគុំតន្ត្រី Live Band និងចាក់ភ្លេង មានភាពរស់រវើកមិនដូចគ្នាទេ ដោយការប្រគំតន្ត្រីមានភ្លេងនឹងជួយឲ្យការសម្ដែងរបស់ក្រុមសិល្បករ និងពិធីករមានភាពរលូន និងទាក់ទាញជាង ។ ការប្រគំតន្ត្រីខ្នាតធំ មិនធ្លាប់មាននេះនឹងរៀបចំឡើងនៅក្រុងអាន់សាន់ នៅថ្ងៃទី១៣ ខែកញ្ញា ដោយការប្រគំតន្ត្រីលើកនេះ គឺលោកនឹងធ្វើឲ្យកក្រើកតែម្ដង ។
តារាល្បីៗដែលលោកយកទៅនៅក្នុងឆ្នាំនេះរួមមាន លោក ព្រាប សុវត្ថិ កូនប្រុសទាំង៣របស់លោកព្រាប សុវត្ថិ, លោក ប៉ែន ចំរ៉ុង, លោក ខេម, កញ្ញា អ៊ីវ៉ា,លោកគូម៉ា និងតារាល្បីៗជាច្រើនផ្សេងទៀត ៕ អត្ថបទសហការ (កែសម្រួលដោយ ៖ សុឃាក់)
ចែករំលែកព័តមាននេះ