សម ម៉ា​ណា វិល​ចូល​សិល្បៈ​វិញ ក្រោម​មន្ទិល​បែកបាក់​ស្នេហ៍


រាជធានី​ភ្នំពេញ ៖ តារា​សម្តែង និង​បង្ហាញ​ម៉ូ​ដ​នាង សម ម៉ា​ណា បាន​បង្ហាញខ្លួន​ក្នុង​សិល្បៈ​ជា​ថ្មី​ឡើង​វិញ បន្ទាប់​ពី​អវត្តមាន​អស់​ជា​ច្រើន​ឆ្នាំ​ដោយ​គ្មាន​មូលហេតុ ។ ការ​វិល​មក​វិស័យ​សិល្បៈ​វិញ ដ៏​គួរ​ឱ្យ​ភ្ញាក់ផ្អើល​នា​ពេល​នេះ​បាន​ធ្វើ​ឱ្យ​មហាជន​មួយ​ចំនួន​មាន​មន្ទិល​ថា តារា​រូប​នេះ​ទំនងជា​មាន​បញ្ហា​ជាមួយ​គូស្នេហ៍ ។

គេ​នៅ​ចាំ​ថា កន្លង​មក សម ម៉ា​ណា បាន​រសាត់​ខ្លួន​ឆ្ងាយ​ពី​សិល្បៈ​ស្ទើរ​ទាំងស្រុង ដោយសារ​តែ​គូស្នេហ៍​របស់​នាង​ហាក់​មានការ​ប្រចណ្ឌ​មិន​ឱ្យ​នាង​ប្រឡូក​ក្នុង​អាជីព​សិល្បៈ​នេះ​បន្ត​ទៀត​ឡើយ ។ នាង​ត្រូវ​បាន​គូស្នេហ៍​ថ្នាក់ថ្នម​មិន​ឱ្យធ្វើ​អ្វី​ទាំងអស់ ដោយ​រស់នៅ​ក្នុងផ្ទះ​វីឡា​ដ៏​ត្រជាក់​ល្ហឹម ជាមួយ​រថយន្ត​ទំនើប និង​គ្រឿង​ប្រើប្រាស់​ដែល​មាន​តម្លៃ​ថ្លៃ ។

ជា​ការ​កត់សម្គាល់​បន្ទាប់​ពី​បាត់​មុខ​អស់​ជា​ច្រើន​ឆ្នាំ​មកនេះ ស្រាប់តែ សម ម៉ា​ណា បាន​បង្ហាញមុខ​ក្នុង​សិល្បៈ​ជា​ថ្មី​ឡើង​វិញ ដែល​បាន​ធ្វើ​ឱ្យ​មហាជន​សម្តែង​ការ​ភ្ញាក់ផ្អើល ។ សម ម៉ា​ណា បាន​បង្ហាញមុខ​ក្នុង​កម្មវិធី សោ​ភណ្ឌ​តន្ត្រី របស់​ស្ថានីយទូរទស្សន៍ CTN កាលពី​ចុង​ស​ប្តា​ហ៍​កន្លង​ទៅ ខណៈ​ពេល​នាង​ក៏​បាន​ចេញ​ច្រៀង​នៅ​ក្នុង​វង់​សិល្បៈ​របស់​លោក យ៉ែ​ម សំ​អូន ផង​ដែរ ។ សកម្មភាព​ទាំង​អស់នេះ ត្រូវ​បាន​គេ​មើលឃើញ​ថា សម ម៉ា​ណា អាច​នឹង​វិល​មក​ចាប់​អាជីព​នេះ ជាប់លាប់​ឡើង​វិញ ក្រោយ​រង​គំនាប​ពី​គូស្នេហ៍ ។

ពាក់ព័ន្ធ​បញ្ហា​ខាងលើ​នេះ​តារា​សម្តែង​នាង សម ម៉ា​ណា បាន​អះអាង​ប្រាប់​កោះសន្តិភាព​តាម​សារ​អេ​ឡិច​ត្រូ​និ​ច​ថា ការ​វិល​ចូល​សិល្បៈ​វិញ​នា​ពេល​នេះ គឺ​ដោយសារ​នាង​ហាក់​រយាល​បន្តិច​ពី​ការងារ និង​ការ​រកស៊ី​កន្លង​មកនេះ ។ នាង​បញ្ជាក់​ថា ដោយសារ​មួយ​រយៈ​នេះ​នាង​មមាញឹក​លើ​ការងារ​រកស៊ី និង​ធ្វើការ​ផង ទើប​ខ្លាច​ទស្សនិកជន​ភ្លេចមុខ​បានជា​សម្រេច​ចូល​សិល្បៈ​វិញ​នា​ពេល​នេះ ។

នាង​បន្ថែម​ថា នៅ​ពេល​ដែល​នាង​មាន​បំណង​វិល​ចូល​សិល្បៈ​វិញ​នោះ ចៃដន្យ​លោក យ៉ែ​ម សំ​អូន ចង់​បាន​នាង​ចូលរួម​ក្នុង​ក្រុម​បង្ហាញ​ម៉ូ​ដ​ផង​នោះ​ក៏​ចាប់​តែ​ម្តង ។ យ៉ាងណា​ក៏​ដោយ សម ម៉ា​ណា បាន​ធ្វើការ​បដិសេធ​ថា ការ​វិល​រក​សិល្បៈ​ជា​ថ្មី​នា​ពេល​នេះ គឺ​មិន​មាន​មក​ពី​មាន​បញ្ហា​ជាមួយ​គូស្នេហ៍​នោះ​ទេ ។

នាង​បញ្ជាក់​ថា រូប​នាង និង​គូស្នេហ៍​នៅ​តែ​ល្អ​ដូច​ដើម ពោល​គឺ​មិន​មាន​បញ្ហា​អ្វី​កើតឡើង​ឡើយ ខណៈ​សិល្បៈ​គឺជា​ការ​ចូល​ចិត្ត​របស់​នាង និង​មិន​ចង់ឱ្យ​ប្រិ​យ​មិត្ត​បាត់​មុខ​យូរ​ក៏​សម្រេច​ចូល​វិញ​នា​ពេល​នេះ ។

ទោះជា​យ៉ាងណា​ក៏​ដោយ គេ​នៅ​មិន​ទាន់​ដឹង​ទេ​ថា ការ​ចូល​ប្រឡូក​ក្នុង​សិល្បៈ​របស់ សម ម៉ា​ណា នា​ពេល​នេះ​អាច​នឹង​ធ្វើ​ឱ្យ​នាង​កើន​ប្រជាប្រិយភាព​ឡើង​វិញ ឬ​យ៉ាងណា​នោះ​ទេ ព្រោះ​ទស្សនិកជន​ខ្លះ​ស្ទើរតែ​ភ្លេចមុខ​ទៅ​ហើយ ៕ (​កែសម្រួល​ដោយ ៖ បុប្ផា​)

Facebook Google Twitter Email

សិល្បៈ​និងវប្ប​​​ធម៌

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ