រាជធានីភ្នំពេញ ៖ សហគមន៍សិល្បៈចាប៉ីដងវែង ត្រៀមខ្លួនចេញសម្តែងជាលើកដំបូងនៅរាត្រីថ្ងៃទី២៥ កុម្ភៈ ឆ្នាំ២០១៤ ក្នុងកម្មវិធី «រាត្រីសិល្បៈខ្មែរ» រៀបចំធ្វើទ្បើងនៅភោជនីយដ្ឋាន និងកន្លែងតន្ត្រី The Doors ដ៏មានប្រជាប្រិយភាព ស្ថិតនៅកាច់ជ្រុងផ្លូវលេខ៨៤ និងលេខ៤៧ សង្កាត់ស្រះចក ខណ្ឌដូនពេញ រាជធានីភ្នំពេញ ។
នេះជាលើកដំបូងហើយ ដែលក្រុមសិល្បករវ័យក្មេងទទួលបានការបណ្តុះបណ្តាលនៅសិល្បៈខ្មែរអមតៈ នឹងសម្តែងសិល្បៈចាប៉ីដងវែង ជាទម្រង់សិល្បៈដ៏ចំណាស់របស់ខ្មែរ បន្ទាប់ពីពួកគេបានបង្កើតជាក្រុមឯករាជ្យមួយមានឈ្មោះថា «សហគមន៍សិល្បៈចាប៉ីដងវែង» ដឹកនាំដោយលោកគ្រូ ពេជ សារ៉ាត់ ។ បច្ចុប្បន្ននេះ ពួកគេខិតខំប្រឹងប្រែងហាត់សម និងស្វែងរកទីផ្សារសម្តែងឱ្យបានកាន់តែច្រើនទាំងក្នុង និងក្រៅប្រទេស ដើម្បីឱ្យក្រុមមាននិរន្តរភាព ជាពិសេសគឺដើម្បីរក្សាទម្រង់សិល្បៈមួយនេះឱ្យនៅគង់វង្ស និងមានអ្នកបន្តវេនតទៅថ្ងៃអនាគត ។
គាត សុគីម ជាសមាជិកម្នាក់នៅក្នុងក្រុមបានសម្តែងក្តីសប្បាយរីករាយ ហើយបានចាត់ទុកការសប្បាយមួយនេះមិនចំពោះតែរូបលោកម្នាក់ទេ គឺក្រុមទាំងមូលតែម្តង ។ សុគីម និយាយថា គ្រប់សិល្បករគឺតែងតែសប្បាយរីករាយជានិច្ចជាមួយការសម្តែង ព្រោះបានបង្ហាញនូវអ្វី ដែលបានសិក្សារៀនសូត្រអស់ជាច្រើនឆ្នាំដល់មហាជន ជាពិសេសគឺផ្សព្វផ្សាយពីលក្ខណៈពិសេសនៃសិល្បៈ ។
ការសម្តែងនៅរាត្រីថ្ងៃទី២៥ កុម្ភៈនោះ គាត សុគីម ឱ្យដឹងថា មិនមែនមានតែក្រុមចាប៉ីទេ ប៉ុន្តែបានរួមសហការជាមួយក្រុមតន្ត្រីករមកពីក្រុមកុមារបាសាក់ទៀតផង គឺនឹងសម្តែងរួមគ្នានូវបទចម្រៀង ដែលបាននិពន្ធថ្មី ដោយផ្អែកលើបទភ្លេងបុរាណខ្មែរ ។ សុគីម និយាយថា «ខ្ញុំចង់ឱ្យគ្រប់ភោជនីយដ្ឋាន និងសណ្ឋាគារ ផ្សេងៗទៀត មានរៀបចំកម្មវិធីសិល្បៈខ្មែរឱ្យបានកាន់តែច្រើន ដើម្បីជួយទ្រទ្រង់ដល់សិល្បៈខ្មែរ» ។
ចំណែកចំរើន ជាតន្ត្រីករមកពីក្រុមកុមារបាសាក់ និយាយថា «យើងនឹងនាំយកឧបករណ៍តន្ត្រីបុរាណខ្មែរមួយចំនួនដូចជា រនាតឯក ទ្រសោ ខ្លុយ ស្គរដៃ ស្គរសម័យ តាខេ ប៉ីអ និងឧបករណ៍សម័យមួយ គឺហ្គីតា ប្រគំឧបករណ៍ភ្លេងទាំងនេះរួមជាមួយចាប៉ីដងវែង ដើម្បីបង្កើតទម្រង់ភ្លេងចម្រុះសម័យថ្មីមួយតាមរយៈឧបករណ៍ភ្លេងខ្មែរ អមជាមួយបទចម្រៀងដ៏ពីរោះរណ្តំ ។ យើងព្យាយាមបង្កើត និងច្នៃប្រឌិតនូវអ្វីដែលថ្មី ដេើម្បីធ្វើឱ្យសិល្បៈខ្មែរកាន់តែសម្បូរបែប ដោយផ្អែកលើទម្រង់តន្ត្រីបុរាណ និងឈរទៅលើពំនោលមួយថា «បុរាណមិនយឺត សម័យមិនបរទេស » ។ នេះជាការច្នៃប្រឌិត » ។
ចាប៉ី អាចសម្តែងបាននៅគ្រប់កម្មវិធីបុណ្យ ឬពិធីមង្គលការ ហើយអ្នកដេញចាប៉ី គឺជាមនុស្សដែលពូកែសំនួនវោហារស័ព្ទ ដែលអាចសម្តែងទោល ឬជាមួយដៃគូច្រៀងឆ្លើយឆ្លងបែបកំប្លុកកំប្លែង ដែលញ៉ាំងបរិយាកាសឱ្យកាន់តែសប្បាយរីករាយ ហើយអត្ថន័យក្នុងចម្រៀងចាប៉ី គឺបង្កប់ទៅដោយការអប់រំយ៉ាងជ្រាលជ្រៅ ជាពិសេសគឺការអប់រំពីចរិយាធម៌ គុណធម៌ និងសីលធម៌ ។
ទស្សនិកជនអាចចូលទស្សនាបាននៅភោជនីយដ្ឋាន The Doors ក្នុងតម្លៃសំបុត្រ៣ដុល្លារ ហើយប្រាក់ដែលនឹងទទួលបាន មួយផ្នែកគឺជាការជំរុញលើកទឹកចិត្ត និងលើកស្ទួយដល់វិស័យសិល្បៈបុរាណខ្មែរ ៕
ចែករំលែកព័តមាននេះ