រាជធានីភ្នំពេញ ៖ លោកស៊ិន សំនៀង ជាតារាសម្តែងលេចធ្លោគួរសមក្នុងសង្គមសិល្បៈកំពុងតែឱ្យកម្មករសាងសង់ផ្ទះសំណាក់នៅសៀមរាប ។ គិតមកទល់ពេលនេះដំណើរការសាងសង់ពីមួយជំហានទៅមួយជំហាន ខ្ទង់ចំណាយចេះតែហក់ទៅមុខ ដូច្នេះលោកត្រូវខំសន្សំលុយទុកសម្រាប់ចំណាយបន្តទៀតរហូតដល់រួចរាល់ ។
រាជធានីភ្នំពេញ ៖ លោកស៊ិន សំនៀង ជាតារាសម្តែងលេចធ្លោគួរសមក្នុងសង្គមសិល្បៈកំពុងតែឱ្យកម្មករសាងសង់ផ្ទះសំណាក់នៅសៀមរាប ។ គិតមកទល់ពេលនេះដំណើរការសាងសង់ពីមួយជំហានទៅមួយជំហាន ខ្ទង់ចំណាយចេះតែហក់ទៅមុខ ដូច្នេះលោកត្រូវខំសន្សំលុយទុកសម្រាប់ចំណាយបន្តទៀតរហូតដល់រួចរាល់ ។
លោកស៊ិន សំនៀង តាំងពីរវល់មុខរបរថ្មីបើកផ្ទះសំណាក់មក ឧស្សាហ៍ទៅមកភ្នំពេញ-សៀមរាប ព្រោះទៅមើលការខុសត្រូវផ្ទះសំណាក់កំពុងសាងសង់នោះផង និងងាកមកបំពេញការងារសិល្បៈនៅភ្នំពេញផង ដើម្បីរកលុយយកទៅបំពេញលើការសាងសង់ផ្ទះសំណាក់នោះ ។ ព្រោះតែមានចិត្តស្រឡាញ់មុខរបរបើកផ្ទះសំណាក់ដោយរំពឹងទទួលបានជោគជ័យនាពេលខាងមុខ លោកសំនៀង បានខ្ចីបុលធនាគារអស់រាប់ពាន់ដុល្លារ ដើម្បីយកទៅរ៉ាប់រងលើការសាងសង់ ទោះជាត្រូវធ្វើការគ្រប់ច្រកល្ហក និងបង់សងធនាគាររាប់ខែឆ្នាំក៏ព្រមដែរ ធ្វើយ៉ាងណាឱ្យតែបានផលត្រឡប់មកវិញ ។
លោកស៊ិន សំនៀង បានបង្ហាញអារម្មណ៍រីករាយកាលពីពេល ថ្មីៗនេះថា ក្រោយពីលោកប្រកាសប្រាប់គេឯងពីរឿងបើកផ្ទះសំណាក់នៅសៀមរាបមក លោកពិតជាធ្វើមែនគឺអត់លេងសើចទេ ។ បើទោះជាលោកនៅមិនទាន់ធ្វើឱ្យកើតឡើងបានឆាប់ រហូតគេគិតថា មិនអាចទៅរួច ឬលោកនិយាយកុហក់ក្តី លោកនៅតែពុះពារជាមួយការងារនេះរហូតបានសម្រេច ។ ទោះជារវល់ការងារសិល្បៈបែបណាក្តី ក៏លោកនៅតែព្យាយាមសាងសង់ផ្ទះសំណាក់ឱ្យបានមិនឱ្យសន្លប់ទៅវិញទេ ខ្លាចខ្មាសគេ ។
តារាសម្តែងទទួលបានពានរង្វាន់អប្សរាឆ្នាំ២០១៣ ផ្នែកសម្តែងបែបកម្សត់ឆ្នើម និងជាប់ពានរង្វាន់គោរពពេលវេលាល្អរូបនេះ ថ្លែងទៀតថា «ដំណាក់កាលនេះប្រៀបដូចជាហែលទឹកកាន់តែ ជ្រៅទៅៗអីុចឹង ចង់ងាកត្រឡប់ក្រោយមកវិញក៏ហត់ ។ បើជ្រុលហត់ទៅហើយនោះ មានតែប្រឹងជ្រោងឱ្យដល់ត្រើយតែម្តងទៅ ។ ដោយមើលឃើញពីតំបន់ខេត្តសៀមរាប ជាតំបន់ទេសចរណ៍ល្បីឈ្មោះ ទើបមានកម្លាំងចិត្តថា នឹងធ្វើគម្រោងរកស៊ីមួយនេះឱ្យកើតឡើងក្នុងពេលខាងមុខ ទោះជាត្រូវអស់លុយចំណាយអ្វីបន្តទៀតក៏ខ្ញុំមិនបោះបង់ចោលដែរ ។ មានតែអាជីពសិល្បៈនេះប៉ុណ្ណោះ ដែលខ្ញុំខំធ្វើការដើម្បីយកប្រាក់កម្រៃមកប្រើការមុខរបរថ្មី ។ ក្នុងពិភពសិល្បៈមានគេស្គាល់ច្រើន ឱ្យតែគេទាក់ទងគឺទទួលសម្តែងមិនចោលទេ ទោះទៅទីជិតឆ្ងាយអត់ងងុយមុខឡើងជ្រុងក៏មិនគិតទេ ឱ្យតែបានលុយមករកស៊ីទាន់នៅក្មេង ទុកចាស់ទៅមានមុខរបរច្បាស់លាស់» ។
សព្វថ្ងៃនេះលោកស៊ិន សំនៀង មិនសូវបានសម្តែងតាមទូរទស្សន៍ទេ តែបើនិយាយពីខ្សែរឿងវិញគឺលោកទទួលសម្តែងជាបន្តបន្ទាប់រកពេលដកឃ្លាមិនទាន់ ។ បើស្បើយពីសម្តែងលោកអាចឡើងច្រៀងតាមទូរទស្សន៍ដូចមុនមិនចោលឡើយ ។
ឆ្នាំថ្មីនេះលោកស៊ិន សំនៀង សង្ឃឹមថា ប្រជាប្រិយភាពរបស់លោកនឹងស្ទុះទៅមុខជាបន្តទៀត និងរំពឹងថា មហាជននៅតែគាំទ្រការសម្តែងរបស់លោកដើម្បីឱ្យលោកនៅតែមានទឹកចិត្តបម្រើអារម្មណ៍តាមរយៈសិល្បៈសម្តែង ៕
ចែករំលែកព័តមាននេះ