រាជធានីភ្នំពេញ ៖ លោកហេង ប៊ុនលាភ តាំងពីចូលរោងការមក ចាកចេញពីអាជីពសិល្បៈដែលធ្លាប់ល្បីឈ្មោះ ដោយងាកទៅចាប់មុខរបរផ្សេងវិញ ។ ថ្មីៗនេះ លោកហេង ប៊ុនលាភ បានប្រកាសជាលក្ខណៈបើកចំហនៅតាមកញ្ចក់ទូរទស្សន៍អប្សរាថា លោកនឹងវិលមកចាប់អាជីពសិល្បៈដូចដើមវិញ មកពីចិត្តមិនដាច់អាល័យពីសិល្បៈ ។
រាជធានីភ្នំពេញ ៖ លោកហេង ប៊ុនលាភ តាំងពីចូលរោងការមក ចាកចេញពីអាជីពសិល្បៈដែលធ្លាប់ល្បីឈ្មោះ ដោយងាកទៅចាប់មុខរបរផ្សេងវិញ ។ ថ្មីៗនេះ លោកហេង ប៊ុនលាភ បានប្រកាសជាលក្ខណៈបើកចំហនៅតាមកញ្ចក់ទូរទស្សន៍អប្សរាថា លោកនឹងវិលមកចាប់អាជីពសិល្បៈដូចដើមវិញ មកពីចិត្តមិនដាច់អាល័យពីសិល្បៈ ។
ការប្រកាសរបស់លោកហេង ប៊ុនលាភ នោះ នៅក្នុងកម្មវិធី «ប្រស្នាតារា» ដែលលោកចូលរួមជាតារាកិត្តិយស និងតម្រូវឱ្យលោកលាតត្រដាងខ្សែជីវិតពិត មុននិងក្រោយពេលក្លាយជាតារាចែងចាំងម្នាក់មានការទទួលស្គាល់ពីមហាជន ។ ក្នុងពេលលោកប៊ុនលាភ ឡើងបង្ហាញមុខជាលើកដំបូងតាមកញ្ចក់ទូរទស្សន៍ក្រោយឃ្លាតឆ្ងាយជាយូរមកនោះ លោកប្រកាសប្រាប់មហាជនថា ចាប់ពីពេលនេះទៅលោកនឹងវិលមកសម្តែងដូចពីមុនវិញហើយ ព្រោះសិល្បៈគឺជាចំណូលចិត្ត ជាអ្វីដែលលោកស្រឡាញ់ និងជាអាជីពមួយជួយលើកមុខមាត់ឱ្យលោកបានល្បីល្បាញ និងជាកិច្ចការមួយដែលលោកធ្លាប់រែកពន់ទាំងសប្បាយ ទាំងជូរចត់ ។
អាជីពសិល្បៈនេះលោកមានអនុស្សាវរីយ៍មិនអាចបំភ្លេចបានទេ ដូច្នេះត្រូវតែងាកមកបម្រើប្រិយមិត្តទស្សនិកជនវិញ ដោយមិនទៅណាទៀតទេ ។ ក្នុងកម្មវិធីនោះ លោកហេង ប៊ុនលាភ បានលើកឡើងឱ្យដឹងដែរថា ថ្មីៗនេះលោកត្រូវគេបង្ខូចឈ្មោះតាមប្រព័ន្ធហ្វេសប៊ុកដោយបន្លំប្រើឈ្មោះលោក ហើយខ្ចីលុយពីតារាមួយចំនួន ។ ដោយសារបែបនោះហើយលោកអំពាវនាវឱ្យអ្នកបន្លំប្រើឈ្មោះលោកនោះបញ្ឈប់ទៅ ។ ជនក្លែងបន្លំនោះបានខ្ចីលុយអ្នកនាងម៉ៅ សីុណាត និងកញ្ញាលី ច័ន្ទសីហា តាមហ្វេសប៊ុក ។ ពេលអ្នកទាំងពីរនោះទូរស័ព្ទសួរនាំធ្វើឱ្យលោកភ្ញាក់ខ្លួន ព្រោះមិនបានដឹងសោះ ។ អ្នកលេងហ្វេសប៊ុកគួរតែលេងក្នុងភាពត្រឹមត្រូវ កុំឱ្យអ្នកដទៃមានបញ្ហាដោយសារខ្លួន មិនល្អទេ ។
ក្នុងជំហានវិលមកវិថីសិល្បៈវិញនេះ លោកប៊ុនលាភ បានលាតត្រដាងជីវិតតស៊ូប្រាប់មហាជនថា ក្នុងពិភពសិល្បៈអ្នកណាក៏ឆ្លងកាត់ការតស៊ូដែរ តែក៏មានអ្នកសិល្បៈខ្លះជាកូនអ្នកធូរធារដែរ ។ ភាគច្រើនអ្នកសិល្បៈគឺជាអ្នកក្រីក្រ ។ ករណីដូចលោកពេលមកដល់ភ្នំពេញដំបូងបាននៅជាមួយឪពុកម្តាយធម៌នៅម្តុំកៀនស្វាយ ។ មុនពេលចូលពិភពសិល្បៈលោកគឺជាអ្នកដុនដាបបំផុតដូចជាទៅរកក្តាមខ្យង បេះត្រកួនយកទៅលក់ សល់ខ្លះទុកធ្វើម្ហូប និងពេលខ្លះទៀតលោកឆ្លៀតពេលសុំគេទៅកាត់ជីរណារ និងជីរខ្លះទៀតពីម្ចាស់ចម្ការដើម្បីបានប្រាក់កម្រៃទិញបាយ ហូប ។ លោកមិនដែលមានចិត្តចង់លាតត្រដាងពីជីវិតផ្ទាល់ខ្លួនលើកញ្ចក់ទូរទស្សន៍ទេ តែនេះមកពីកម្មវិធីតម្រូវ ព្រោះលោកយល់ថាមនុស្សយើងអ្នកណាក៏លំបាកដែរ ។ លើសពីនេះលោកចង់ឱ្យមនុស្សមួយចំនួនស្តាប់ទៅទុកជាបទពិសោធន៍ថា មនុស្សត្រូវតែតស៊ូ ។ ដូចរូបលោកមុននឹងល្បីឈ្មោះ និងបានជួបលោកហ្វៃ សំអាង ជួយយឹតយោងគឺលំបាកណាស់ ។
ប្រវត្តិពេលច្រៀងតាមបៀរហ្គាដិន លោកប៊ុនលាភ អះអាងថា លោកជួបការលំបាកដោយពេលខ្លះរកលុយជិះម៉ូតូឌុបមិនបានផង ។ លោកច្រៀងមួយយប់បានប្រាក់កម្រៃ២ដុល្លារ ឬលើសនេះបន្តិចបន្តួច ហើយមានពេលមួយបៀរហ្គាដិនបិទពីរបីថ្ងៃ ធ្វើឱ្យលោកដាច់បាយល្ងាច ព្រោះអត់លុយទិញ ហើយផ្ទះដែលលោកនៅគឺជាកន្លែងស្ងាត់អត់មានអីលក់ ។ បើបានទៅច្រៀងពេលយប់គឺលោកបានញាំុបាយ តែបើគេបិទហាងគឺអត់បាយមិនខាន ។ ពេលច្រៀងដើម្បីបំពេញចិត្តភ្ញៀវលោកតែងតែចូលរួមផឹកស្រា និងអង្គុយតុជាមួយភ្ញៀវដើម្បីបានប្រាក់កម្រៃខ្លះ ។ បើគិតតែច្រៀងមិនយកចិត្តភ្ញៀវ គឺច្បាស់ជាមិនបានលុយធីបទេ ។
លោកហេង ប៊ុនលាភ ដឹងគុណជានិច្ចអ្នកដែលជួយជីវិតលោកកន្លងមកទាំងឪពុកម្តាយធម៌នៅកៀនស្វាយ និងលោកហ្វៃ សំអាង ដែលជួយលោកឱ្យបានល្បីឈ្មោះ ។ តាំងពីលោកបានចូលផលិតកម្ម អេសអេសប៊ី របស់លោកហ្វៃ សំអាងមកក៏បានល្បីឈ្មោះរហូតមកទល់ពេលនេះ ។ លោកហេង ប៊ុនលាភ សន្យាថា នៅពេលវិលចូលពិភពសិល្បៈវិញ លោកនឹងពង្រឹងការសម្តែងឱ្យកាន់តែប្រសើរឡើង ដើម្បីបម្រើអារម្មណ៍ប្រិយមិត្តទស្សនិកជនតាមរយៈស្នាដៃរឿង ថ្មីៗទៀត ដោយសង្ឃឹមថាមហាជននៅតែផ្តល់កម្លាំងចិត្តដល់រូបលោក ៕
ចែករំលែកព័តមាននេះ