ខេត្តបាត់ដំបង ៖ សេចក្តីរាយការណ៍បានបន្តឱ្យដឹងទៀតថា បច្ចុប្បន្ន បុរសរងគ្រោះបាននិងកំពុងសង្គ្រោះនៅក្នុងមន្ទីរពេទ្យបង្អែកខេត្តបាត់ដំបង ព្រឹកថ្ងៃទី០៨ សីហា នេះ ដោយអាការៈគាត់គឺត្រូវក្រុមគ្រូពេទ្យ ធ្វើការតាមដានពីស្ថានភាពអាការគាត់យ៉ាងយកចិត្តទុកដាក់បំផុត…
ខេត្តបាត់ដំបង ៖ សេចក្តីរាយការណ៍បានបន្តឱ្យដឹងទៀតថា បច្ចុប្បន្ន បុរសរងគ្រោះបាននិងកំពុងសង្គ្រោះនៅក្នុងមន្ទីរពេទ្យបង្អែកខេត្តបាត់ដំបង ព្រឹកថ្ងៃទី០៨ សីហា នេះ ដោយអាការៈគាត់គឺត្រូវក្រុមគ្រូពេទ្យ ធ្វើការតាមដានពីស្ថានភាពអាការគាត់យ៉ាងយកចិត្តទុកដាក់បំផុត ក៏ប៉ុន្តែគាត់ស្ថិតក្នុងសុវត្ថិភាពល្អទេ ។ គួរ បញ្ជាក់ថា ការជួយសង្គ្រោះជនរងគ្រោះបានចេញរូងភ្នំនោះ គឺនៅត្រឹមវេលាម៉ោង០៦និង៣៥នាទីយប់ថ្ងៃទី០៧ សីហា របស់ក្រុមជួយសង្គ្រោះ៧១១ដោយបានធ្វើការបំបែកផ្ទាំងថ្មនោះ ក្រោយយកគាត់បានហើយ គឺកម្លាំងទាំងអស់មានក្តីរំភើបនិងរំជួលចិត្តអាណិតគាត់ជាខ្លាំង ហើយបាននាំគ្នាសែងដាក់រថយន្តសង្គ្រោះបញ្អូនទៅកាន់មន្ទីរពេទ្យភ្លាមៗ ។ នៅក្នុងប្របត្តិការណ៍យ៉ាងជោគជ័យនេះ ក៏សូមអរគុណនិងសាទរដល់កម្លាំងសង្គ្រោះទាំងអស់ ដែលខំពុះពារយ៉ាងសស្រាក់សស្រាំ ដើម្បីជួយជនរងគ្រោះឱ្យបានផងនេះ។
គួរបញ្ជាក់ទៀតថា គិតត្រឹមម៉ោង០៤ និង៣០នាទីរសៀលថ្ងៃទី០៧ សីហា បុរសម្នាក់ដែលធ្លាក់ជាប់គាំងក្នុងកន្លៀតថ្មអស់ គឺ៣យប់៤ថ្ងៃ ដោយសារស្វែងរកអាចម៍ប្រចៀវ នៅក្នុងរូងភ្នំមួយកន្លែង នៅក្នុងស្រុកភ្នំព្រឹក ពេលនេះ គឺនៅមានសុវត្ថិភាពនៅឡើយ ខណៈកម្លាំងជំនាញគ្រប់អង្គភាព និងគ្រប់ស្ថាប័នរដ្ឋ កំពុងប្រឹងប្រែងយ៉ាងខ្លាំងក្នុងការជួយសង្គ្រោះ។ នេះបើយោងតាមសេចក្ដីរាយការណ៍ពីប្រភពនានានៅកន្លែងកើតហេតុ ។
នៅក្នុងកិច្ចប្រតិបត្តិការជួយសង្គ្រោះនេះ គេមិនអាចទំនាក់ទំនងសុំការបំភ្លឺពីមន្ត្រីនគរបាលមូលដ្ឋានណាម្នាក់នៅទីនោះបានទេ។ មូលហេតុដែលមន្ត្រីមិនអាចបំភ្លឺបាន គឺមានហេតុផល២យ៉ាង គឺទី១- នៅទីនោះសេវ៉ាទូរស័ព្ទជួបការលំបាកក្នុងការទំនាក់ទំនង និងទី២-ប្រព័ន្ធទូរស័ព្ទទំនាក់ទំនងបានហើយ តែមន្ត្រីនៅទីនោះ មិនហ៊ានផ្ដល់ព័ត៌មានអំពីព្រឹត្តិការណ៍នោះដល់អ្នកសារព័ត៌មាន ព្រោះខ្លាចត្រូវទណ្ឌកម្មលោកស្នងការខេត្តដែលប៉ុន្មានថ្ងៃមុននេះ លោកស្នងការបានព្រមានថា នឹងដាក់ទណ្ឌកម្មលើមន្ត្រីរូបណា ដែលល្មើសនឹងលក្ខន្តិកៈនៃក្របខណ្ឌមន្ត្រីនគរបាលជាតិ គឺមាត្រា២២, ២៣ និងមាត្រា២៤ ដែលហាមដាច់ខាតចំពោះ
ការផ្ដល់ព័ត៌មានដែលជាការសម្ងាត់ខាងវិជ្ជាជីវៈរបស់នគរបាលជាតិទៅតតីជនដោយគ្មានការអនុញាតិ ។ ដោយសារតែការព្រមាននេះហើយ ទើបមន្ត្រីនគរបាលគ្រប់ជាន់ថ្នាក់ស្ថិតក្រោមលោកស្នងការខេត្ត មិនហ៊ានផ្ដល់ព័ត៌មាន… មិនថា ព័ត៏មានស្ដីពីអំពើចោរកម្មឬព័ត៏មានលើកសរសើរអំពីស្នាដៃកងកម្លាំងនោះទេ។
បើទោះជាគ្មានព័ត៌មាននេះ ពីមន្ត្រីនគរបាលក្ដី ប៉ុន្តែបើតាមសេចក្ដីរាយការណ៍បានឲ្យដឹងថា នៅកន្លែងសង្គ្រោះនោះ គឺមានមន្ត្រីមកពីអង្គភាពនានាច្រើនណាស់ រាប់ទាំងអង្គភាពយោធា អង្គភាពកងរាជអាវុធ ហត្ថ និងស្ថាប័នរដ្ឋផង ដែលកំពុងប្រឹងប្រែងជួយសង្គ្រោះជនរងគ្រោះ។ មន្ត្រីកងរាជអាវុធហត្ថដែលបានចូលរួមក្នុងកិច្ចប្រតិ្តការនេះបានឲ្យដឹងថា ជនរងគ្រោះដែលជាប់ក្នុងកន្លៀតថ្មភ្នំព្រឹកនោះ ឈ្មោះសុំ បូរ៉ា អាយុ២៩ឆ្នាំ ។
គាត់បានរអិលជើងធ្លាក់ចូលទៅក្នុងចន្លោះផ្ទាំងថ្មដា រួចជាប់គាំងនៅក្នុងកន្លៀតថ្មនោះតែម្ដង ពេលដែលគាត់ព្យាយាមស្វែងរកអាចម៍ប្រចៀវ នៅក្នុងរូងភ្នំមួយកន្លែងនៅទីនោះ ។ មន្ត្រីដដែលបានប្រាប់ថា បុរសនេះ ត្រូវបានអ្នកភូមិប្រទះឃើញ បន្ទាប់ពីបានឮសំឡេងស្រែកឲ្យជួយពីក្នុងរូងភ្នំនោះ នៅវេលាម៉ោង៨ព្រឹកថ្ងៃទី០៧ សីហា ហើយគេក៏បានរាយការណ៏ប្រាប់អាជ្ញាធរមូលដ្ឋាន ដើម្បីឲ្យជួយសង្គ្រោះ។
បើតាមក្រុមគ្រួសារបាននិយាយថា សុំ បូរ៉ា បានចេញទៅរកអាចម៍ប្រចៀវនៅក្នុងល្អាងភ្នំនោះ កាលពីយប់ថ្ងៃទី៤ សីហា ហើយគាត់ក៏ជួបគ្រោះថ្នាក់នៅយប់នោះតែម្ដង ហើយបើគិតត្រឹមថ្ងៃអ្នកភូមិប្រទះឃើញ គឺបុរសនេះ បានជាប់គាំងនៅក្នុងកន្លៀតថ្មនោះ អស់រយៈពេល៤យប់ ៣ថ្ងៃហើយ ។ បុរសនេះតែងចេញទៅរកកើបអាចម៍ប្រចៀវនៅទីនោះ ដើម្បីលក់យកកំរៃចិញ្ចឹមជីវភាពគ្រួសារ តែអកុសលទៅលើកចុងក្រោយនេះ ស្រាប់តែភ្លាត់ស្នៀតជួបគ្រោះថ្នាក់តែម្ដង។
ពាក់ព័ន្ធនឹងករណីនេះ បើតាមមន្ត្រីនគរបាលមួយរូបដែលសុំមិនប្រាប់ឈ្មោះ បានស្រង់សំដីជនរងគ្រោះ ហើយប្រាប់កោះសន្តិភាពបន្តថា នៅយប់កើតហេតុនោះ គាត់បានដើរទៅកាន់កន្លែងអាចម៏ប្រចៀវនៅចង្កេះភ្នំនោះដូចសព្វដងដែរ ។ ប៉ុន្តែពេលនោះស្រាប់តែគាត់ធ្វើឲ្យជ្រុះពិល ហើយពេលដែលគាត់អោនរកពិល ចៃដន្យស្រាប់តែរអិលជើងដួលធ្លាក់ចូលក្នុងចន្លោះផ្ទាំងថ្មដ៏ជ្រៅនោះតែម្ដង ។ មន្ត្រីដដែលបានបញ្ជាក់ថា នៅខាងក្រោមគំនាបថ្មនោះជាល្អាងមួយជ្រៅណាស់ ហើយប្រសិនបើជនរងគ្រោះមិនជាប់គាំងត្រិមគំនាបថ្មនោះទេ ជនរងគ្រោះអាចធ្លាក់ចូលក្នុងល្អាងនោះ ហើយអាចនឹងមានគ្រោះថ្នាក់ធ្ងន់ធ្ងរតែម្ដង។
ជាមួយនឹងកិច្ចប្រតិបត្តិការដ៏រន្ធត់នេះ កោះសន្តិភាព បានព្យាយាមទំនាក់ទំនងតាមទូរស័ព្ទច្រើនលើក ច្រើនសារនៅរសៀលថ្ងៃដដែលនេះ ទៅកាន់លោកសុង សុភ័ក្រ អភិបាលស្រុកភ្នំព្រឹក ដើម្បីសុំការអត្ថាធិប្បាយបន្ថែមលើករណី តែមិនអាចទំនាក់ទំនងបានឡើយ។ ប៉ុន្តែប្រភពនានា នៅកន្លែងជួយសង្គ្រោះបានឲ្យដឹងថា គេឃើញមានកម្លាំងសមត្ថកិច្ច និងកម្លាំងយោធាជាច្រើននាក់ រួមទាំងក្រុមគ្រួពេទ្យផង បានប្រឹងប្រែងគ្រប់មធ្យោបាយ គ្រប់វិធីសាស្ត្រ ដើម្បីជួយសង្គ្រោះជនរងគ្រោះឲ្យចេញពីក្នុងគំនាបថ្មដ៏គ្រោះថ្នាក់នោះ។ រថយន្តសង្គ្រោះក៏ត្រូវបានរៀបចំជាស្រេចនៅក្បែរជើងភ្នំនោះដែរ ដើម្បីចាំដឹកជនរងគ្រោះទៅកាន់មន្ទីរ ពេទ្យ ។
ជុំវិញការប្រឹងប្រែងនេះដែរ បើតាមប្រភពពីមន្ត្រីយោធភូមិភាគទី៥ ដែលដឹកនាំដោយលោកឧត្តមសេនីឯក ឯក សំអូន មេបញ្ជាការយោធភូមិភាគនេះ ដែលកំពុងជួយសង្គ្រោះផងដែរ បានឲ្យប្រាប់កោះសន្តិភាពថា គិតត្រិមម៉ោង៥ល្ងាចថ្ងៃដដែលនេះ ក្រុមជួយសង្គ្រោះរបស់អង្គភាព៧១១ ដែលដឹកនាំដោយឯកឧត្តម គន់ គីម ប្រធានអាជ្ញាធរជាតិ គ្រប់គ្រងគ្រោះមហន្តរាយ បានធ្វើដំណើរទៅដល់កន្លែងកើតហេតុហើយ ដោយមានឧបករណ៏សម្រាប់ជួយសង្គ្រោះគ្រប់បែបយ៉ាង ។
មន្ត្រីយោធាដដែលនេះបានបញ្ជាក់ថា ពេលនេះ ក្រុមជួយសង្គ្រោះបាននិងកំពុងដុតដៃដុតជើងយ៉ាងខ្លាំង ព្រោះមេឃកាន់តែងងឹត ខណៈជនរងគ្រោះហាក់មានកម្លាំងធ្លាក់ខ្យោយបន្តិច ម្ដងបាត់មាត់ ម្ដងឮមាត់វិញ។ ប៉ុន្តែទោះជាមេឃងងឹត ឬ រហូតដល់យប់ ក៏ក្រុមជួយសង្គ្រោះនៅតែបន្តកិច្ចប្រតិបត្តិការជួយសង្គ្រោះដែរ ព្រោះក្រុមជួយសង្គ្រោះមានសម្ភារៈគ្រប់គ្រាន់ ទាំងបំពង់អុកហ្ស៊ីសែន ទាំងភ្លើងបំភ្លឺ និងឧបករណ៍ដទៃទៀត ។ (សម្រួលដោយ៖ ស្រីណា)
ព័ត៌មានបន្ថែម កោះសន្តិភាពនឹងមានផ្សាយជួនបន្ត ។
ចែករំលែកព័តមាននេះ