ខេត្តក្រចេះ ៖ មហន្តរាយខ្យល់កន្ត្រាក់បានកើតឡើង កាលពីពាក់កណ្តាលយប់ថ្ងៃទី៣០ កក្កដា បានបង្កឲ្យមានលំនៅឋានពលរដ្ឋចំនួនជាង៣០០ខ្នង រងការខូចខាតបាក់រលំ និងប៉ើងដំបូល និងមានទ្រព្យសម្បត្តិរដ្ឋ ដូចជា…
ខេត្តក្រចេះ ៖ មហន្តរាយខ្យល់កន្ត្រាក់បានកើតឡើង កាលពីពាក់កណ្តាលយប់ថ្ងៃទី៣០ កក្កដា បានបង្កឲ្យមានលំនៅឋានពលរដ្ឋចំនួនជាង៣០០ខ្នង រងការខូចខាតបាក់រលំ និងប៉ើងដំបូល និងមានទ្រព្យសម្បត្តិរដ្ឋ ដូចជា សាលារៀន បង្គោលខ្សែភ្លើង ព្រមទាំងដំណាំកសិកម្មឯកជនជាច្រើនហិកតាផ្សេងទៀត ក៏ត្រូវរងការខូចខាត ជាងនេះទៀត គឺមានពលរដ្ឋ៣នាក់បានរងរបួសផងដែរ ។
នេះជាមហន្តរាយគ្រោះធម្មជាតិកើតមានជាលើកទី៤ហើយក្នុងរដូវវស្សាឆ្នាំនេះ ខណៈកន្លងមក គ្រោះធម្មជាតិបានកើតមានជាបន្តបន្ទាប់និងបង្កជាមហន្តរាយធ្ងន់ ស្រាលដូចគ្នា ដូចជា ករណីរន្ទះបាញ់ សម្លាប់មនុស្សនិងសត្វពាហនៈ និងខ្យល់កន្ត្រាក់ និងក៏ធ្លាប់បានកើតមានស្ទើគ្រប់ស្រុក ក្រុងទូទាំងខេត្ត។
បើតាមអាជ្ញាធរខេត្តក្រចេះបានឲ្យដឹងថា លំនៅឋានពលរដ្ឋ និងទ្រព្យសម្បត្តរដ្ឋនិងឯកជនមួយចំនួន នៅតាមស្រុកចំនួន២ គឺស្រុកស្នួលនិងស្រុកឆ្លូងបានរងការខូចខាត ដោយសារខ្យល់កន្ត្រាក់ ដែលបានកើតមានឡើងជាបន្តបន្ទាប់ កាលពីយប់ថ្ងៃទី៣០ កក្កដា ។ នៅស្រុកស្នួលវិញ មានឃុំចំនួន៣ ក្នុងនោះ រួមមានឃុំស្រែចារ ឃុំ២ធ្នូ និងឃុំស្នួល សម្ភារខូចខាតមានដូចជា ផ្ទះឈើតូចធំ៣ខ្នង ត្រូវបានបាក់រាបដល់ដី ក្រៅពីនោះ ក៏នៅមាន១៩៥ខ្នងផ្ទះទៀត បានរងការខូចខាតដូចជាដួលបាក់ទ្រេត និងប៉ើងដំបូល ។ សាលារៀនចំនួន៣ខ្នងក៏ត្រូវ ប៉ើងដំបូល បង្គោលអគ្គីសនី១បង្គោលត្រូវបានដួលបាក់ និងក៏មានដំណាំម្រេចនិងកៅស៊ូជា ច្រើនហិកតាក៏ត្រូវបាក់រលំផងដែរ។
ជាមួយគ្នានោះដែរក៏បណ្តាលឲ្យមានពលរដ្ឋយ៉ាងហោច២នាក់ បានរងរបួសម្នាក់បាក់ដៃ និងម្នាក់របួសចង្កេះដោយសាររលំផ្ទះសង្កត់។អាជ្ញាធរស្រុកឆ្លូងបានឲ្យដឹងដែរថា គ្រោះធម្មជាតិខ្យល់កន្ត្រាក់ក៏បានបង្កជាមហន្តរាយ ដែលបានកើតឡើងកាលពីយប់ថ្ងៃទី៣០ កក្កដា បានបង្កការប៉ះពាល់ដល់ឃុំចំនួន៤នៅក្នុង ស្រុកឆ្លូង រួមមាន ឃុំខ្សាច់អណ្តែត ឃុំកំពង់ដំរី ឃុំដំរីផុង និងឃុំឆ្លូង ។ ក្នុងនោះបង្កឲ្យមានការ ខូចខាតដល់លំនៅឋានរបស់ពលរដ្ឋចំនួន៥ខ្នងផ្ទះ និងបានធ្វើឲ្យពលរដ្ឋម្នាក់ ត្រូវរងរបួសលើ រាងកាយ ដោយសាររងពីការរំលំផ្ទះសង្កត់លើ។
អាជ្ញាធរបានអះអាងថា គ្រោះមហន្តរាយដែលបានកើតមាន ក្រៅពីបង្កមានលំនៅឋាន ជាងជាង៣រយខ្នង បានខូចខាតធ្ងន់ស្រាល គឺមិនមានបង្កឲ្យមានគ្រោះថ្នាក់ដល់អាយុជីវិត មនុស្សនោះទេ ដោយគ្រាន់តែមានពលរដ្ឋ៣នាក់បានរងរបួស៕ (សម្រួលដោយ៖ ស្រីណា)
ចែករំលែកព័តមាននេះ