រាជធានីភ្នំពេញ៖ ប្រធានប្រតិបត្តិសមាគមរោងចក្រកាត់ដេរនៅកម្ពុជា ហៅកាត់ថា GMAC បានឱ្យដឹងថា គ្រប់រោងចក្រទាំងអស់ចង់ប្រើប្រាស់បច្ចេកវិទ្យាទំនើបជំនាន់ ៤.០ ប៉ុន្តែបច្ចេកវិទ្យាទាំងនោះវាមានតម្លៃថ្លៃ ជាហេតុធ្វើឱ្យរោចក្រមួយចំនួនទ្រាំប្រើបច្ចេវិទ្យាជំនាន់ចាស់ ។…
រាជធានីភ្នំពេញ៖ ប្រធានប្រតិបត្តិសមាគមរោងចក្រកាត់ដេរនៅកម្ពុជា ហៅកាត់ថា GMAC បានឱ្យដឹងថា គ្រប់រោងចក្រទាំងអស់ចង់ប្រើប្រាស់បច្ចេកវិទ្យាទំនើបជំនាន់ ៤.០ ប៉ុន្តែបច្ចេកវិទ្យាទាំងនោះវាមានតម្លៃថ្លៃ ជាហេតុធ្វើឱ្យរោចក្រមួយចំនួនទ្រាំប្រើបច្ចេវិទ្យាជំនាន់ចាស់ ។ តែទោះជាយ៉ាងនេះក្តីមានរោងចក្រមួយចំនួនបាននាំយកបច្ចេកវិទ្យាជំនាន់ ៤.០មកប្រើនៅក្នុងរោងចក្ររបស់ខ្លួនជាបន្តបន្ទាប់នាពេលចបច្ចុប្បន្ន ។
លោក លី តេកហេង ប្រធានប្រតិបត្តិសមាគមរោងចក្រកាត់ដេរនៅកម្ពុជាមានប្រសាសន៍ប្រាប់អ្នកសារព័ត៌មានកាលពីថ្ងៃទី ២៣ ខែកក្កដាមកនេះថា បច្ចេកវិទ្យាជំនាន់ ៤.០ នៅក្នុងឧស្សាហកម្មកាត់ដេរមានការប្រើប្រាស់ច្រើន ។ កាលពីមុនៗពេលយើងចង់បានម៉ូដខោអាវអ្វីមួយទាមទារឱ្យយើងធ្វើគំរូច្រើន ដើម្បីយកមកបង្ហាញគេតែមកដល់សព្វថ្ងៃនេះគេគ្រាន់តែធ្វើនៅប្រទេសគេ (គំរូ) រួចផ្ញើរមកតាមអនឡាញ គឺរោងចក្រអាចផលិតបាន» ។ លោកលើកឡើងថា «សម្រាប់រោងចក្រដែលបានបោះទុនវិនិយោគរយៈពេលយូរឆ្នាំហើយនោះ ពួកគាត់ប្រើប្រាស់ម៉ាស៊ីន ឬបច្ចេកវិទ្យាស៊េរីចាស់មិនទាន់មានការបោះបង់ចោល១០០% ទេ ប៉ុន្តែបច្ចេកវិទ្យាថ្មីខ្លះៗបានចូលទៅក្នុងរោងចក្ររបស់គាត់ជាបន្តបន្ទាប់» ។
លោកបន្តថា «និយាយជារួមរោងចក្រទាំងអស់ពួកគាត់ចង់ប្រើប្រាស់ម៉ាស៊ីនទំនើប ចង់មានការផ្លាស់ប្តូរបច្ចេកវិទ្យាចាស់មកថ្មី ព្រោះវាជួយឱ្យផលិតភាពខ្ពស់របស់ក្រុមហ៊ុន ។ ម៉ាស៊ីនដេរសម្លៀកបំពាក់នៅជំនាន់មុនៗមកដល់សព្វថ្ងៃនេះដេរមិនទាន់ម៉ាស៊ីនដេរសម័យថ្មីនេះ ហើយថ្នេរខោអាវចេញមកក៏ល្អទៀត ពេញចិត្តអ្នកប្រើ ។ ចង់បានអាវ ឬក៏ថ្នេរអាវស្អាតទាល់តែយើងមានម៉ាស៊ីនដេរមានគុណភាពល្អ» ។
បើតាមប្រធានប្រតិបត្តិ បច្ចុប្បន្នរោងចក្រនីមួយៗចង់ផ្លាស់ប្តូរប្រើបច្ចេកវិទ្យាគ្រប់គ្នា ប៉ុន្តែគ្រប់ផលិតផលថ្មីទាំងនោះវាមានតម្លៃថ្លៃ ។ ដូចនេះធ្វើឱ្យក្រុមហ៊ុនខ្លះបង្ខំប្រើបច្ចេកវិទ្យាជំនាន់មុន ។ ម្យ៉ាងទៀតមានរោងចក្រខ្លះបានដឹងពីការវិវត្តន៍នៃបច្ចេកវិទ្យាតែក្នុងនោះក៏មានរោងចក្រខ្លះក៏បានដឹងពីការរីកចម្រើននៃបច្ចេកវិទ្យានេះដែរ ។
លោកឧកញ៉ា វ៉ាន់ ស៊ូអៀង ប្រធានសមាគមកាត់ដេរនៅកម្ពុជាធ្លាប់មានប្រសាសន៍ថា «សម័យកាលបច្ចេកវិទ្យាមានការរីកចម្រើននៅក្នុងសង្វាក់ផលិតកម្មកាត់ដេរក៏ត្រូវតែមានបច្ចេកវិទ្យាជំនាន់ទី ៤ នេះ បើរោងចក្រកាត់ដេរអត់មានគឺប្រកួតប្រជែងជាមួយគេអត់ឈ្នះគេទេ» ។
បើតាមរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានឱ្យដឹងថា បដិវត្តន៍ឧស្សាហកម្មទី ៤ រីកចម្រើនបច្ចេកវិទ្យាថ្មីយ៉ាងឆាប់រហ័ស កំពុងជះឥទ្ធិពលដល់ការផ្លាស់ប្តូរយ៉ាងខ្លាំងទៅលើរបៀបរបបនៃប្រតិបត្តិការអាជីវកម្ម និងការងារគ្រប់ប្រភេទ ។
លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈធ្លាប់មានប្រសាសន៍ថា ទោះបីបច្ចេកវិទ្យាថ្មីទាំងនេះអាចឈានទៅបំផ្លាញការងារមួយចំនួនក្តីក៏វានឹងចូលរួមចំណែកក្នុងការបង្កើតការងារថ្មីកាន់តែល្អព្រមទាំងលើកកម្ពស់ផលិតភាព និងប្រាក់ឈ្នួលកាន់តែខ្ពស់ ។ លោកបន្តថា បរិការណ៍នេះទាមទារឱ្យកម្ពុជាមានការបន្ទាន់ចាំបាច់ក្នុងការចាប់យកម៉ូដែល និងយុទ្ធសាស្ត្រកំណើនថ្មី ដើម្បីបន្តការកែប្រែរចនាសម្ព័ន្ធសេដ្ឋកិច្ចជាតិឈានទៅដំណាក់កាលពឹងផ្អែកលើកំណើនដែលជំរុញដោយផលិតភាព ដោយចាកចេញពីដំណាក់កាលនៃកំណើនជំរុញដោយការប្រើប្រាស់កម្លាំងពលកម្ម ដែលបានអនុវត្តជោគជ័យកន្លងមក ។
លោកបណ្ឌិតបញ្ជាក់ថា «ដើម្បីបន្តរក្សាបាននូវភាពប្រកួតប្រជែង យើងត្រូវខិតខំអនុវត្តឱ្យ បានជោគជ័យនូវគោលនយោបាយជាតិដែលបានដាក់ចេញកន្លងមក ជាពិសេសគោលនយោបាយជាតិ ស្តីពីការអភិឌ្ឍន៍ឧស្សាហកម្ម គោលនយោបាយជាតិស្តីពីមុខរបរ និងការងារ ព្រមទាំងគោលនយោបាយជាតិ ស្តីពីការអប់រំបណ្តុះបណ្តាលបច្ចេកទេស និងវិជ្ជាជីវៈ សំដៅសម្រេចឱ្យបាននូវក្តីប្រាថ្នារបស់យើងក្នុងការប្រែក្លាយជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងប្រទេសមានចំណូលខ្ពស់នៅឆ្នាំ ២០៥០» ។
គួររំឭកថា បច្ចុប្បន្នសមាគមរោងចក្រកាត់ដេរនៅកម្ពុជាមានសមាជិកជាង ៦០០ រោងចក្រ ហើយពលរដ្ឋកម្ពុជាកំពុងទទួលបានការងារពីឧស្សាហកម្មមួយនេះមានប្រមាណ ៧០ ម៉ឺននាក់នៅទូទាំងប្រទេស ៕ កែសម្រួលដោយ ៖ សុឃាក់
ចែករំលែកព័តមាននេះ