រាជធានីភ្នំពេញ ៖ គណប្រតិភូព្រះសង្ឃប្រទេសស្រីលង្កា របាននិមន្តមកបំពេញទស្សនកិច្ចនៅប្រទេសកម្ពុជា ដើម្បីស្វែងយល់អំពីការវិវត្តិរីកចម្រើន និងការគោរពប្រតិបត្តិព្រះពុទ្ធសាសនានៅកម្ពុជា និងដើម្បីផ្លាស់ប្ដូរទស្សនៈក៏ដូចបទពិសោធន៍ទៅវិញទៅមកសំដៅរួមកម្លាំងថែរក្សាព្រះពុទ្ធសាសនាឲ្យបានស្ថិតស្ថេរគង់វង្សសម្រាប់ជាម្លប់នៃការគោរពប្រតិបត្តិរបស់ពុទ្ធសាសនិកជនគ្រប់ៗរូប។
គណៈប្រតិភូព្រះសង្ឃប្រទេសស្រីលង្ការនេះ ដឹកនាំដោយព្រះតេជគណសាស្ត្រាចារ្យបណ្ឌិត K.RahuLa រាហុល នាយកវិទ្យាស្ថានក្រោមឧត្ដមនៃភាសាបាលី និងពុទ្ធិកសិក្សានៃសកលវិទ្យាល័យកល្យាណីយ៍នៃប្រទេសស្រីលង្ការ បាននិមន្តមកកម្ពុជាកាលពីថ្ងៃទី៧កក្កដាឆ្នាំ២០១៩។
ដោយឡែកនៅរសៀលថ្ងៃទី៧ កក្កដានេះដែរ គណៈប្រតិភូបាននិមន្តចូលក្រាបបង្គំគាល់សម្ដេច ព្រមហសុមេធាធិបតីនន្ទ ង៉ែត នៅវត្តបុទវត្តី ដើម្បីបានយល់កាន់តែច្បាស់អំពីការរីកចម្រើនធំធាត់នៃវិស័យព្រះពុទ្ធសាសនានៅកម្ពុជា រួមទាំងវប្បធម៌ប្រពៃណីដែលកម្ពុជាផងដែរ។
ទាក់ទងវិស័យព្រះពុទ្ធសាសនាសម្ដេចព្រះមហសុមេធាធិបតីនន្ទ ង៉ែត មានព្រះបន្ទូលថា វិស័យព្រះសាសនានៅកម្ពុជា ត្រូវបានបាត់បង់ទាំងស្រុងនៅក្នុងបរបខ្មែរក្រហម។ ប៉ុន្តែជាបុណ្យកុសលបានរស់រានមានរូបរាងឡើងវិញ នៅក្រោយថ្ងៃរំដោះ៧មករាឆ្នាំ១៩៧៩ ក្រោមការគាំពារពីរដ្ឋាភិបាលកម្ពុជា ពិសេសនោះ គឺការជឿជាក់ និងការរួមចំណែកយ៉ាងសកម្មពីប្រជាពលរដ្ឋកម្ពុជាទូទាំងប្រទេស ទើបវិស័យសាសនានៅកម្ពុជា ទទួលបានការរីកចម្រើនដូចសព្វថ្ងៃនេះ។ មិនតែប៉ណ្ណោះក៏ត្រូវបានរាជរដ្ឋាភិបាលចាត់ទុកជាសាសនារបស់រដ្ឋថែមទៀតផង។ ហើយបច្ចុប្បន្ននេះនៅក្នុងជួរមន្ត្រីសង្ឃ គឺមានព្រះសង្ឃដែលមានសមត្ថភាពប្រកបដោយចំណេះទាំងផ្នែកព្រះពុទ្ធសាសនា និងចំណេះដឹងទូទៅជាច្រើនសម្រាប់បន្តដឹកនាំវិស័យព្រះពុទ្ធសាសនានៅកម្ពុជាឲ្យកាន់រីកចម្រើននិងរឹងមាំទ្វេថែមទៀតផង។
ចំពោះចំណងនៃកិច្ចសហការរវាងព្រះសង្ឃប្រទេសកម្ពុជា និងព្រះសង្ឃស្រីលង្ការ លើវិស័យព្រះពុទ្ធសាសនានេះព្រះតេជគុណ យ៉ន កុសល្យ ដែលកំពុងសិក្សាថ្នាក់បរិញ្ញនៅប្រទេសស្រីលង្ការមានពុទ្ធិកាឲ្យដឹងថា បច្ចុប្បន្នមានព្រះសង្ឃខ្មែរដែលកំពុងស្នាក់នៅសិក្សានៅប្រទេសស្រីលង្ការមានជាង១០០អង្គកំពុងសិក្សាលើផ្នែកទស្សនវិជ្ជាព្រះពុទ្ធសានា ,ភាសាបាលី និងសំស្ត្រឹតចាប់ពីថ្នាក់បឋមសិក្សា អនុវិទ្យាល័យ វិទ្យាល័យ និង ថ្នាក់បរិញ្ញា។
ព្រះតេជគណបានឲ្យទៀតថា ការសិក្សារបស់ព្រះសង្ឃកម្ពុជា នៅស្រីលង្ការទាំងអស់ គឺទទួលបានមកពីការជួយឧបត្ថម្ភពីមន្ត្រីសង្ឃកម្ពុជាតាមបណ្ដាវត្តនានាដែលមានលទ្ធភាព បញ្ជួនទៅក្នុងនោះមួយចំនួនបានមកពីការជួយឧបត្ថម្ភប្រកបដោយសុទ្ធាជ្រះថ្លារពីឯកឧត្ដមជា ចាន់តូ និង លោកជំទាវ ខៀវស៊ីណាដែលជាពុទ្ធសាសនូបត្ថម្ភដ៏សំខាន់មួយដែលជានិច្ចកាលតែងតែបានចូលរួមយ៉ាងសកម្មក្នុងការរួមចំណែកដល់ការលើកកម្ពស់វិស័យព្រះពុទ្ធសាសនានិងការកសាងសមិទ្ធផលនានាតាមទីវត្តអារាមនោះផងដែរ។
សូមបញ្ជាក់ថា នេះជាលើកទី៤ហើយដែលគណៈប្រតិភូព្រះ សង្ឃប្រទេសស្រីលង្ការបាននិមន្តមកបំពេញទស្សនកិច្ចនៅកម្ពុជា។ ហើយលើកនេះក៏ដូចលើកមុនៗដែរក្រៅការពីធ្វើសិក្សាស្វែងយល់វិស័យព្រះពុទ្ធសាសនានៅកម្ពុជានោះ ក៏បាននិមន្តទៅកាន់ទឹកដីខេត្តសៀមរាប ដើម្បីស្វែងយល់ពីសម្បត្តិវប្បធម៌ និងប្រាសាទនានា ពិសេសប្រាសាទអង្គរកម្ពុជាផងដែរ។ ចំណែកសម្រាប់ប្រតិភូមន្ត្រីសង្ឃកម្ពុជាក៏បាននិមន្តទៅបំពេញទស្សនកិច្ចសិក្សាជាបន្តបន្ទាប់ផងដែរ ដើម្បីរៀនសូត្រលើផ្នែកធ៌មវិន័យនិងភាសាបាលី សំស្ក្រឹត៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ