រាជធានីភ្នំពេញ ៖ តាមរយៈនៃគោលនយោបាយគាំពារសង្គម ក្នុងរយៈពេល១ខែកន្លងមកនេះស្ត្រីមានផ្ទៃពោះទៅពិនិត្យផ្ទៃពោះ ហើយទទួលបានថវិកាវិញមានចំនួនជិត២ម៉ឺននាក់ ។ នេះបើតាមសម្តេចតេជោ ហ៊ុន សែន នាយករដ្ឋមន្ត្រី ។
សម្តេចតេជោហ៊ុន សែន នាយករដ្ឋមន្ត្រីបានឲ្យដឹងក្នុងពិធីផ្ទេរការគ្រប់គ្រងសាលាពិការ គ ថ្លង់ឱ្យស្ថិតក្រោមការគ្រប់គ្រងរបស់ក្រសួងអប់រំ យុវជន និងកីឡាវិញ នាព្រឹកថ្ងៃទី០១ ខែកក្កដានេះ ថា កម្មវិធីគោលគាំពារសង្គមរបស់រាជរដ្ឋាភិបាលទៅលើបញ្ហាស្ត្រីមានផ្ទៃពោះបាននឹង កំពុងអនុវត្តហើយ ក្នុងរយៈពេល១ខែមកនេះ ។ សម្តេចថា សម្តេចបញ្ជាឲ្យលោក អ៊ិត សំហេងរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈបានផ្ញើរបាយការណ៍មកសម្តេចផ្ទាល់អស់រយៈពេលមួយឆ្នាំហើយ ។ តែរយៈពេលមួយខែគិតពីម្សិលមិញ ថ្ងៃទី៣០ ខែមិថុនា មានស្ត្រីដែលទៅពិនិត្យផ្ទៃពោះឆ្លងទន្លេ និងអ្នកដែលមានកូនក្រោមអាយុ២ឆ្នាំ មានចំនួន១៨៧២៥ករណី ។
សម្តេចបន្ថែមថា ស្ត្រីផ្ទៃពោះដែលត្រូវទទួលបានថវិកាតាមគោលនយោបាយគាំពារសង្គមមានបីផ្នែកគឺទី១-អ្នកមានផ្ទៃពោះភ្លាមត្រូវពិនិត្យ៤ដង ។ ពិនិត្យម្តងទទួលបានប្រាក់ដែលខុសពីមុន ទៅពិនិត្យគេទាលុយឥឡូវទៅពិនិត្យគេឲ្យលុយមកផ្ទះ ។ ការពិនិត្យផ្ទៃនេះ ដើម្បីធានាថាសុខភាពកុមារនោះជាផ្នែកមួយនៃអាហារូបបត្ថម្ភមុនពេលសម្រាល ។ ទី២-ដល់ថ្ងៃសម្រាលឧត្តម្ភម្តងទៀត ។ ទី៣ -បន្ទាប់ពីសម្រាល ហើយត្រូវឧបត្ថម្ភ៨ដង។
សម្តេចបញ្ជាក់ថា ៖«អីញ្ចឹងខ្ញុំគិតថា ចំនួនអ្នកដែលបានកើតឡើងហើយមានបញ្ញាស្មារតីទន់ខ្សោយ ឬក៏មានការយសម្បទាទន់ខ្សោយ និងកាត់បន្ថយតាមគោលនយោបាយការពារសង្គម នេះ ។ មិនមែនជាការចៃដន្យមកអនុវត្តនោះ ប៉ុន្តែយើងចង់ពលរដ្ឋមានសុខភាពល្អ ។ នេះជារឿងដែលយើងត្រូវទទួលខុសត្រូវចំពោះពលរដ្ឋរបស់យើង» ។
សូមជម្រាបថា កាលពីពេលថ្មីៗកន្លងមកនេះក្រសួងសេដ្ឋកិច្ច និងហេរញ្ញវត្ថុ រួមទាំងក្រសួងសុខាភិបាលបានចេញសេចក្តីប្រកាសរួមគ្នាអំពីកម្មវិធីឧបត្ថម្ភសាច់ប្រាក់ដល់ស្ត្រីមានផ្ទៃពោះ និងកូនអាយុក្រោម២ឆ្នាំ នៃគ្រួសារដែលមានប័ណ្ណសមធម៌ ឬប័ណ្ណអាទិភាពសំដៅលើកកម្ពស់សុខមាលភាពមាតា និងទារក ព្រមទាំងរួមចំណែកដោះស្រាយបញ្ហាកង្វះអាហារូបត្ថម្ភរបស់កុមារ ក្នុងគ្រួសារក្រីក្រចាប់តាំងពីកូន ក្នុងផ្ទៃរហូតដល់អាយុ២ឆ្នាំ ដើម្បីជំរុញការលូតលាស់ទាំងកាយសម្បទា និងបញ្ញាស្មារតី ។
ប្រាក់ឧបត្ថម្ភត្រូវបានផ្តល់ជូននៅពេលស្ត្រីមានផ្ទៃពោះមកទទួលសេវានៅមូលដ្ឋានសុខាភិបាលសាធារណៈជាដំណាក់កាលដូចខាងក្រោម ៖ ១-ដំណាក់កាលទីមួយ ផ្តល់ការឧបត្ថម្ភចំនួន ៤០ ០០០រៀលសម្រាប់ការមកទទួលសេវាពិនិត្យផ្ទៃពោះម្តងៗដែលផ្តល់ជូនជាអតិបរមាចំនួន ៤ដង មុនពេលសម្រាលកូន ។ ២-ដំណាក់កាលពីរ ៖ ផ្តល់ការឧបត្ថម្ភចំនួន២០០ ០០០រៀលតែម្តងគត់នៅពេលសម្រាលកូន ។ ៣ – ដំណាក់កាលបី ផ្តល់ការឧបត្ថម្ភចំនួន៤០០០០រៀល ក្នុង១ដង ដែលផ្តល់ជាអតិបរមានចំនួន១០ដង ដែលក្នុងនោះ៣ដងសម្រាប់ពេលមកពិនិត្យសុខភាព ក្រោយពេលសម្រាលកូន និង៧ដងសម្រាប់ពេលយកកូនមកចាក់ថ្នាំបង្ការរហូតដល់២ ឆ្នាំ ។
ការឧបត្ថម្ភប្រាក់សម្រាប់ស្ត្រីមានផ្ទៃពោះទាំងមុន និងក្រោយសម្រាលនេះនឹងចាប់ដំណើរការពីថ្ងៃទី០១ ខែមិថុនា ឆ្នាំ២០១៩ កន្លងមក ៕ កែសម្រួលដោយ ៖ សុឃាក់
ចែករំលែកព័តមាននេះ