ខេត្តសៀមរាប៖ ក្រៅពីប្រាង្គប្រាសាទបុរាណជាច្រើន រមណីយដ្ឋានអង្គរក៏មានព្រៃឈើធម្មជាតិដែលមានអាយុកាលរាប់រយឆ្នាំ ។ ម្យ៉ាងទៀតព្រៃឈើទាំងនោះ ផ្តល់ជាម្លប់ ជាជម្រកសត្វព្រៃ និងផ្តល់ជាអនុផលព្រៃឈើយ៉ាងច្រើនដល់សហគមន៍រស់នៅជុំវិញរៀងរាល់ថ្ងៃ ។
ផេកហ្វេសប៊ុកក្រសួងវប្បធម៌ និងវិចិត្រសិល្បៈផ្សាយថា ជាភ័ព្វសំណាងដែលប្រជាជនបានរស់នៅក្បែរដើមឈើដែលមានអាយុកាលរាប់រយឆ្នាំ តែផ្ទុយទៅវិញសព្វថ្ងៃព្រៃឈើជាច្រើនកន្លែងផ្សេងគ្នាកំពុងរងនូវការកាប់បំផ្លាញពីជនខិលខូចមួយចំនួនដែលមិនបានយល់ពីតម្លៃ និងមានតួនាទីសំខាន់សម្រាប់បរិស្ថាន ហើយហេតុការណ៍នេះអាជ្ញាធរជាតិអប្សរាតែងតែព្យាយាមទប់ស្កាត់នូវសកម្មភាពនានាដែល គំរាមកំហែងដល់ព្រៃឈើ ។
ជាក់ស្តែងកាលពីពេល ថ្មីៗកន្លងមកលោក ឃុន រ៉ើន ប្រជាជនរស់នៅភូមិត្រពាំងសេះ សង្កាត់គោកចក ខេត្តសៀមរាប បានកាប់លះមែកអម្ពិលមួយដើមដែលមានអាយុកាលជាងរយឆ្នាំមកហើយ ។ បន្ទាប់ពីបានទទួលបានព័ត៌មាននេះ នាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាននៃអាជ្ញាធរជាតិអប្សរា សហការជាមួយអាជ្ញាធរមូលដ្ឋានបានទៅហាមឃាត់ និងឲ្យធ្វើកិច្ចសន្យាហាមប៉ះពាល់ដើមអម្ពិលជាបន្តទៀត ។ រាល់ការកាប់លះមែកឈើក្នុងតំបន់អង្គរ ត្រូវសុំច្បាប់អនុញ្ញាតពីអាជ្ញាធរពាក់ព័ន្ធជាមុន ។
អាជ្ញាធរជាតិអប្សរាស្នើឱ្យអាជ្ញាធរមូលដ្ឋានជួយអប់រំប្រជាជន និងទប់ស្កាត់បទល្មើសព្រៃឈើកុំឱ្យមានករណីនេះកើតមានជាបន្តទៀត ៕ (កែសម្រួលដោយ ៖ បុប្ផា)
ចែករំលែកព័តមាននេះ