ហាណូយ៖ យោងតាមក្រសួងសុខាភិបាលវៀតណាមបានឱ្យដឹងថា កំណត់ត្រាសុខភាពអេឡិចត្រូនិកសម្រាប់ពលរដ្ឋវៀតណាមទាំងអស់ នឹងត្រូវបានអនុម័តនៅទូទាំងប្រទេសនៅខែក្រោយ។ ថ្លែងនៅឯសិក្ខាសាលាមួយស្តីពីកំណត់ត្រាវេជ្ជសាស្ត្រអេឡិចត្រូនិកដែលរៀបចំឡើងនៅថ្ងៃទី១៧ ខែមិថុនានៅទីក្រុងហូជីមិញ លោក Tran Quy Tuong នាយកនាយកដ្ឋានបច្ចេកវិទ្យាពត៌មានរបស់ក្រសួង បាននិយាយថា នាយកដ្ឋាននេះត្រូវបានចាត់តាំងឱ្យបង្កើតកម្មវិធីវេជ្ជសាស្ត្រអេឡិចត្រូនិចនៅចុងឆ្នាំមុន។
កម្មវិធីនេះ ប្រើប្រាស់ទិន្នន័យស្តីពីគ្រួសារដែលចូលរួមក្នុងប្រព័ន្ធធានារ៉ាប់រងសុខភាពជាតិ ជាមួយនឹងទិន្នន័យដែលផ្តល់ដោយសន្ដិសុខសង្គមវៀតណាម។ រហូតមកដល់ពេលនេះកម្មវិធីដែលរួមបញ្ចូលព័ត៌មានអំពីប្រវត្តិសុខភាពរបស់អ្នកជំងឺត្រូវបានគេយកទៅប្រើប្រាស់នៅតាមមណ្ឌលសុខភាពក្នុងខេត្តក្រុងចំនួន៣១។
លោកបាននិយាយថាកំណត់ត្រាវេជ្ជសាស្ត្រផ្ទាល់ខ្លួននឹងត្រូវបានធានាដោយមន្ទីរសុខាភិបាលនិងសហគ្រាសព័ត៌មានវិទ្យាដែលផ្តល់និងគ្រប់គ្រងកម្មវិធី។ នាយកដ្ឋានកំពុងធ្វើការជាមួយសហគ្រាសសង្គមកិច្ចវៀតណាម ដើម្បីបង្កើតច្បាប់និងបទបញ្ជាក៏ដូចជាគណនីអ្នកប្រើប្រាស់។
បច្ចុប្បន្ននេះ មានសហគ្រាសខាងបច្ចេកវិទ្យាជាច្រើនផ្តល់ កម្មវិធីកត់ត្រាវេជ្ជសាស្ត្រអេឡិចត្រូនិច ប៉ុន្តែគ្មានការតភ្ជាប់រវាងកម្មវិធីផ្សេងៗទេ។ បទបញ្ញត្តិស្តីពីការប្រើនិងការធ្វើបច្ចុប្បន្នភាពកំណត់ត្រាវេជ្ជសាស្ត្រអេឡិចត្រូនិចស្ថិ តនៅក្នុងដំណើរការអភិវឌ្ឍន៍។
លោកង្វៀនហ៊ុនសឺន អនុរដ្ឋមន្ត្រីក្រសួងសុខាភិបាល បាននិយាយថាការអនុម័តកំណត់ត្រាវេជ្ជសាស្ត្រអេឡិចត្រូនិចបានជួយបង្កើនការគ្រប់គ្រងសុខភាពប្រជាជន។ លោកបាននិយាយបន្តថាប្រជាពលរដ្ឋគ្រប់រូបនឹងមានកំណត់ត្រាសុខភាពមួយជីវិត ដែលអាចប្រើដោយវេជ្ជបណ្ឌិត ដើម្បីជួយធ្វើឱ្យទាន់ពេលវេលានិងសមស្របតាមការណែនាំអំពីការថែទាំអ្នកជំងឺ។
វិស័យសុខាភិបាលវៀតណាមកំពុងបង្កើតប្រព័ន្ធថែរក្សាសុខភាពទំនើបដោយផ្អែកលើបីប្រភេទគឺការគ្រប់គ្រងឆ្លាតវៃ មន្ទីរពេទ្យឆ្លាតវៃ និងការគ្រប់គ្រងទិន្នន័យវេជ្ជសាស្ត្រដ៏ឆ្លាតវៃ។ ក្រសួងនេះកំណត់គោលដៅគ្របដណ្តប់លើកំណត់ត្រាវេជ្ជសាស្ត្រអេឡិចត្រូនិចដែលឈានដល់៩០% នៃប្រជាជននៅឆ្នាំ២០២៥។ (សម្រួលដោយ៖ ស្រីណា)
ចែករំលែកព័តមាននេះ