តារាចម្រៀង​ជប៉ុន​លុតជង្គង់​ក្បាល​ដល់​ដី​ចំពោះ​អ្នកគាំទ្រ (​មាន​វី​ដេ​អូ​)


បន្ទាប់​ពី​ត្រូវ​បាន​ដោះ​លែង​ពី​ការ​ឃុំឃាំង​ដោយសារ​ការ​ប្រើប្រាស់​កញ្ឆា តារាចម្រៀង​ប៉ុប​ជប៉ុន​បាន​សុំ​ទោស​អ្នកគាំទ្រ​របស់​គាត់​ដោយ​លុតជង្គង់​នៅ​ពីមុខ​ស្ថានីយ​ប៉ូ​លី​ស​ក្នុង​តំបន់ ។ លោក Junnosuke Taguchi ដែល​ជា​សមាជិក​ស្ថាបនិក​នៃ​ក្រុម Japanese boy band KAT-TUN ត្រូវ​បាន​ចាប់ខ្លួន​កាលពី​ខែ​មុន​ជាមួយ​មិត្ត​ស្រី​របស់​លោក​ដែល​ជា​អតីត​តារា​សម្តែង​ស្រី​ឈ្មោះ Rena Komine ក្នុង​ខុន​ដូរ​បស់​ពួក​គេ​នៅ​ក្រុង​តូ​ក្យូ ពី​បទ​បំពាន​ច្បាប់​គ្រប់គ្រង​កញ្ឆា ។

គូស្នេហ៍​នេះ​ត្រូវ​បាន​គេ​ចាប់ខ្លួន​នៅ​ឯ​តំបន់ Wangan Precinct ក្រុង​តូ​ក្យូ បន្ទាប់​ពី​ប៉ូ​លី​ស​ក្រុង​តូ​ក្យូ​ត្រូវ​បាន​គេ​រាយការណ៍​ថា​បាន​រក​ឃើញ​កញ្ឆា​ចំនួន ២,២ ក្រាម ។ របាយការណ៍​របស់ SoraNews24 បាន​រាយការណ៍​ថា​ប្រាក់​ធានា​របស់​ពួក​គេ​ត្រូវ​បាន​កំណត់​ចំនួន ៣ លាន​យ៉េន ស្មើនឹង ២៧.៦៦៩ ដុល្លារ ។ កាលពី​ដើមខែ​នេះ​លោក Taguchi បាន​និយាយ​ទៅ​កាន់​ប្រព័ន្ធ​ផ្សព្វផ្សាយ​ដោយ​កាយវិការ​សុភាព​រាបសា​បន្ទាប់​ពី​លោក និង​មិត្ត​ស្រី Komine ត្រូវ​បាន​ដោះ​លែង​ពី​មណ្ឌល​ឃុំឃាំង Wangan Precinct ។

ស្ថិត​ក្នុង​សម្លៀក​បំពាក់​ឈុត​ខ្មៅ​ធម្មតា​តារា​ល្បី​វ័យ ៣៣ ឆ្នាំ​រូប​នេះ​បាន​ចេញ​សេចក្តីថ្លែងការណ៍​មួយ​នៅ​ចំពោះ​មុខ​អ្នកកាសែត​ដែល​កំពុង​រង់ចាំ​គាត់​នៅ​ខាងក្រៅ ។ បន្ទាប់​មក​គាត់​បាន​លុតជង្គង់​ចុះ​ហើយ​ឱនក្បាល​ដាក់​ថ្ងាស​របស់​គាត់​ទៅ​លើ​ផ្លូវថ្នល់​ក្នុង​រយៈពេល ១៩ វិនាទី ។ លោក Taguchi បាន​សារភាព​ចំពោះ​អាជ្ញាធរ​ថា​លោក​បាន​ជក់​កញ្ឆា​អស់​រយៈពេល ១០ ឆ្នាំ ហើយ​បាន​ប្តេជ្ញា​ថា​នឹង​ចាក​ចេញពី​វា​បន្ទាប់​ពី​ការ​ចាប់ខ្លួន ។

លោក Taguchi ត្រូវ​បាន​គេ​ដកស្រង់​សម្តី​ដែល​បាន​និយាយ​ថា «​ខ្ញុំ​សុំ​ទោស​ពី​ដួងចិត្ត​របស់ខ្ញុំ​ទៅ​អ្នកគាំទ្រ​របស់ខ្ញុំ​ដែល​រីករាយ​ចំពោះ​ខ្ញុំ​ជា​រៀងរាល់ថ្ងៃ និង​ដល់​មនុស្ស​ទាំងអស់​ដែល​ពាក់ព័ន្ធ​នឹង​អាជីព​របស់ខ្ញុំ ។ ខ្ញុំ​សូម​សន្យា​ថា​ខ្ញុំ​នឹង​មិន​ឱ្យ​មាន​ស្នាម​ប្រឡាក់​ជាមួយ​គ្រឿងញៀន​ខុសច្បាប់ ឬ​សកម្មភាព​ឧក្រិដ្ឋ​ទៀត​ទេ ។ ក្នុង​រយៈពេល​មួយ​ខ្ញុំ​នឹង​ព្យួរ​សកម្មភាព​ឧស្សាហកម្ម​កម្សាន្ត​របស់ខ្ញុំ ដើម្បី​កែខ្លួន​យ៉ាង​ហ្មត់ចត់ និង​ធ្វើ​ឱ្យ​មានការ​ប្រែចិត្ត​សម្រាប់​អំពើ​បាប​របស់ខ្ញុំ​» ។

Taguchi បាន​បន្ថែម​ថា «​ខ្ញុំ​នឹង​ធ្វើ​អ្វី​ដែល​ខ្ញុំ​អាច​ធ្វើ​បាន ដើម្បី​រស់នៅ​ក្នុង​ជីវិត​របស់ខ្ញុំ​តាម​របៀប​ដែល​ខ្ញុំ​អាច​ទទួល​បាន​នូវ​ទំនុកចិត្ត​របស់​អ្នក ។ ខ្ញុំ​ពិតជា​សោកស្តាយ​ណាស់​» ។ ដោយឡែក​មិត្ត​ស្រី Komine មិន​បាន​និយាយ​ទៅ​កាន់​អ្នក​យក​ព័ត៌មាន​ទេ ហើយ​នាង​បាន​ចាកចេញ​ដោយ​ស្ងៀមស្ងាត់​តាម​ច្រកចេញ​ខាងក្រោយ ៕

ប្រភព​៖ nextshark , កែសម្រួល​ដោយ ៖ សំណាង

Facebook Google Twitter Email

សិល្បៈ​និងវប្ប​​​ធម៌

អត្រាប្តូរប្រាក់

អត្រាប្តូរប្រាក់ផ្សេងទៀត

Live

Sponsored News

ការស្ទង់មតិគេហទំព័រថ្មី




សូម​អរគុណ