៣០បទក្រោមសិទ្ធិគ្រប់គ្រងដោយលោកឯល ប៊ុនណា
- ភ្នំពេញ
រាជធានីភ្នំពេញ៖ ក្រសួងវប្បធម៌ និងវិចិត្រសិល្បៈ បានត្រៀមប្រគល់សិទ្ធិគ្រប់គ្រងបទចម្រៀងចំនួន៣០បទ ជូនលោកឯល ប៊ុនណា តាមសំណើរបស់លោកកាលពីពេល ថ្មីៗ កន្លងមក ។…
រាជធានីភ្នំពេញ៖ ក្រសួងវប្បធម៌ និងវិចិត្រសិល្បៈ បានត្រៀមប្រគល់សិទ្ធិគ្រប់គ្រងបទចម្រៀងចំនួន៣០បទ ជូនលោកឯល ប៊ុនណា តាមសំណើរបស់លោកកាលពីពេល ថ្មីៗ កន្លងមក ។
តាមសេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈ កាលពីថ្ងៃទី៣ ខែមិថុនា ឆ្នាំ២០១៩ បញ្ជាក់ថា ក្នុងពេលកន្លងទៅនេះ ក្រសួងបានទទួលសំណើសុំសិទ្ធិគ្រប់គ្រងបទចម្រៀងពីអ្នកនិពន្ធលោក ឯល ប៊ុនណា ។ ឆ្លងតាមការស្រាវជ្រាវ ក្រសួងបានពិនិត្យឃើញថា បទចម្រៀងចំនួន២៨បទ ដែលជាស្នាដៃនិពន្ធបទភ្លេង និងទំនុកច្រៀងដោយលោកឯល ប៊ុនណា និង២បទទៀតជាស្នាដៃសហអ្នកនិពន្ធ សហការជាមួយអ្នកនិពន្ធទំនុកច្រៀង ហើយបានផ្ទេរសិទ្ធិជូនរូបលោកជាតំណាង ។
សេចក្តីជូនដំណឹងរបស់ក្រសួងវប្បធម៌បានបើកផ្លូវនូវរាល់ភាគីពាក់ព័ន្ធទាំងអស់ដែលមានបំណងចង់ប្តឹងជំទាស់នឹងការស្នើសុំសិទ្ធិគ្រប់គ្រងបទចម្រៀងទាំងនោះ គឺអាចដាក់ពាក្យបណ្តឹងទៅនាយកដ្ឋានសិទ្ធិអ្នកនិពន្ធ និងសិទ្ធិប្រហាក់ប្រហែល នៃក្រសួងវប្បធម៌ និងវិចិត្រសិល្បៈ រយៈពេល១ខែគិតចាប់ពីថ្ងៃជូនដំណឹងនេះតទៅ ។
ប្រធាននាយកដ្ឋានសិទ្ធិអ្នកនិពន្ធ និងសិទិ្ធប្រហាក់ប្រហែលនៃក្រសួងវប្បធម៌ និងវិចិត្រសិល្បៈលោកស៊ឹម សត្តា បានអះអាងប្រាប់កោះសន្តិភាពថា បទចម្រៀងទាំង៣០បទនោះលោក ឯល ប៊ុនណា មិនបានសុំសិទ្ធិចុះបញ្ជីកម្មសិទ្ធិបញ្ញានោះឡើយ ពោលគឺលោកសុំសិទ្ធិគ្រប់គ្រងស្នាដៃរបស់លោកពីក្រសួងប៉ុណ្ណោះ។
លោកស៊ឹម សត្តា បញ្ជាក់ថា «បើទោះបីជាលោកឯល ប៊ុនណា នៅរស់រានមានជីវិតមែន ប៉ុន្តែយើងនៅមិនទាន់ច្បាស់ថា បទចម្រៀងទាំងអស់នោះគឺពិតជាស្នាដៃនិពន្ធដោយរូបលោកផ្ទាល់ ឬយ៉ាងណានោះទេ ។ គ្រប់ស្នាដៃទាំងអស់គឺទទួលបានសិទ្ធិគ្រប់គ្រងដោយស្វ័យប្រវត្តិតាមច្បាប់កម្មសិទ្ធិបញ្ញាទាំងការនិពន្ធទំនុកច្រៀង និងបទភ្លេង »។
ប្រភពដដែលបន្ថែមថា តាមរយៈសេចក្តី ជូនដំណឹងនោះគឺក្រសួងមានគោលបំណងឲ្យមានការប្តឹងជំទាស់ពីភាគីណាមួយ ក្នុងរយៈពេលមួយខែ ប្រសិនក្នុងករណីដែលមិនមានការប្តឹងទាស់ទេ នោះនឹងប្រគល់បទទាំង៣០បទទៅឲ្យលោកឯល ប៊ុនណា គ្រប់គ្រងជាផ្លូវការ។
លោកស៊ឹម សឹត្តា បានបញ្ជាក់ នៅពេលក្រសួងចេញសេចក្តីសម្រេចជាផ្លូវការហើយនោះ រាល់ផលិតកម្មណាមួយមានបំណងយកបទចម្រៀងទាំងនោះទៅផលិតថ្មី ឬដាក់នៅក្នុងផ្នែកសោតទស្សន៍ណាមួយនោះ គឺត្រូវសុំសិទ្ធិលោកឯល ប៊ុនណា ៕ (កែសម្រួលដោយ ៖ បុប្ផា)
ចែករំលែកព័តមាននេះ