ខេត្តបាត់ដំបង៖ នារី២នាក់បានជិះម៉ូតូឌុបគ្នាទៅលេងតំបន់ទេសចរណ៍អាងកំពីងពួយ ហើយត្រូវចោរលួចយកម៉ូតូជិះចេញទៅបាត់ដោយសុវត្ថិភាព កាលពីវេលាម៉ោង៦ល្ងាចថ្ងៃទី១៣ មិថុនា ស្ិតនៅលើសំណង់អាងកំពីងពួយ ក្នុងភូមិតាង៉ែន ឃុំតាគ្រាម ស្រុកបាណន់ ខណ:ដែលនារីទាំង២នាក់កំពុងថតរូបសែលហ្វីលេងជាមួយទិដ្ឋភាព នាពេលថ្ងៃលិច ។
ប្រភពពីប្រជាបលរដ្ឋបានថា ម៉ូតូដែលត្រូវចោរលួចនោះ ម៉ាកហុងដាឌ្រីម ស៊េរីឆ្នាំ២០១៧ ពណ៌ខ្មៅ ពាក់ស្លាកលេខបាត់ដំបង 1X-8528 ដែលម្ចាស់ឈ្មោះវិត កុសល អាយុ១៧ឆ្នាំ រស់នៅភូមិអូរតាញា ឃុំតាគ្រាម ស្រុកបាណន់ ។
ប្រភពដដែលថា នារីគ្រោះនិងមិត្តភក្ដិស្រីរបស់នាងម្នាក់ទៀតបាននាំគ្នាជិះម៉ូតូទៅលេងតំបន់ទេសចរណ៍អាងកំពីងពួយ តែពេលពួកនាងកំពុងថតរូបលេងនៅមាត់ទឹកភ្លេចមើលម៉ូតូ ស្រាប់តែងាកមកវិញបាត់ម៉ូតូទើបភ្ញាក់ផ្អើលតែម្ដង ។
តាមម្ដាយនារីរងគ្រោះប្រាប់កោះសន្តិភាពតាមទូរស័ព្ទ នៅព្រឹកថ្ងៃទី១៤ មិថុនា នេះថា កូនស្រីគាត់ជិះម៉ូតូចេញទៅលេងអាងកំពីងពួយ បន្ទាប់ពីនាងចេញពីសាលារៀនពេលល្ងាច ។ គាត់និយាយថា នាងនិងមិត្ត ភក្ដិ បានជិះទៅឈប់លើសំណង់ទី២នៃអាងកំពីងពួយ ហើយពេលពួកនាងកំពុងថតលេង ត្រូវចោរលួចយកម៉ូតូបាត់ ។ បើតាមព័ត៌មានថា ពេលត្រូវចោរលួចយកម៉ូតូភ្លាម នាពេលនោះ នាងបានរត់ទៅប្ដឹងសមត្ថកិច្ចដែលយាមប្រចាំការនៅលើអាងកំពីងពួយនោះភ្លាមៗដែរតែមិនជួប ហើយក៏ត្រឡប់មកផ្ទះវិញតែម្ដង។
សូមបញ្ជាក់ថា ក្នុងរយ:ពេលកន្លះខែកន្លងទៅនេះ បទល្មើសហាក់បានកើតឡើងផ្ទូនៗគ្នាជាបន្តបន្ទាប់នៅក្នុងភូមិសាស្ត្រ ស្រុកបាណន់ ដែលភាគច្រើនជាបទល្មើសឧក្រិដ្ឋ។ ដោយសារតែបទល្មើសបានកើតឡើងស្អេកស្កះស្ទើរវិលក្បុងដូច្នេះហើយ ទើបបទល្មើសខ្លះត្រូវបានសមត្ថកិច្ចស្រុកនេះ ព្យាយាមបិតបាំងមិនរាយការណ៍ជូនថ្នាក់លើ។
ជាក់ស្ដែង បទល្មើសប្លន់កាលពីយប់ថ្ងៃទី៣០ ឧសភា កន្លងទៅនេះ នៅភូមិថ្កូវ ឃុំឈើទាល ដែលលោកអធិការស្រុកបាណន់ ទទូលបណ្ដឹងហើយមិនចាត់ការ ហើយថែមទាំងព្យាយាមបិទសំណុំរឿងនេះ មិនរាយការណ៍ឱ្យស្នងការដឹងទៀតផង ។
ទោះជាយ៉ាងណា ពាក់ព័ន្ធនឹងករណីកាច់សោ.កលួចម៉ូតូនៅតំបន់ទេសចរណ៍អាងកំពីងពួយខាងលើនេះ លោកឧត្តមសេនីយត្រី ជេត វណ្ណនី បានបញ្ជាក់ថា លោកបានទទូលព័ត៌មាននេះ ក្រោយពេលកើតហេតុ ហើយពេលនេះ កម្លាំងការិយាល័យជំនាញ នៃស្នងការខេត្តកំពុងធ្វើការស៊ើបអង្កេតលើករណីនេះហើយ។ (សម្រួលដោយ៖ ស្រីណា)
ចែករំលែកព័តមាននេះ