សហរដ្ឋអាមេរិក-កូរ៉េខាងជើង ៖ ប្រធានាធិបតីអាមេរិក លោកដូណាល់ត្រាំំប្រកាសកាលពីថ្ងៃទី១១ មិថុនាថា លោកបានទទួលសារលិខិតដ៏ល្អមួយច្បាប់ពីមេដឹកនាំកូរ៉េខាងជើងលោកគីមជុងអ៊ុន។
មុនពេលចេញដំណើរទៅកាន់រដ្ឋអៃយ៉ូវ៉ា លោកត្រាំអះអាងទៅកាន់សារព័ត៌មានថា លោកបានទទួលលិខិតដ៏កក់កក្តៅ និងល្អបំផុតនោះ កាលពីថ្ងៃទី១០មិថុនាតែលោកពុំបានផ្ដល់ភាពលម្អិតពីរឿងនេះឡើយ។ លោកត្រាំក៏អះអាងជាថ្មីដែរ ពីទំំនាក់ទំនងល្អរបស់លោក ជាមួយលោកគីមជុងអ៊ុន ព្រមទាំងពីសក្ដានុពលដ៏មហិមារបស់កូរ៉េខាងជើង។
លោកត្រាំនិងលោកMIKE POMPEO រដ្ឋមន្ត្រីការបរទេសរបស់លោក ត្រូវមកកាន់ប្រទេសជប៉ុននិងកូរ៉េខាងត្បូង នាដំណាច់ខែមិថុនាដើម្បីពិភាក្សាពីការរំសាយនុយក្លេអ៊ែរនៅឧបទ្វីបកូរ៉េ ជាមួយមេដឹកនាំនៃប្រទេសទាំង២ ជាសម្ព័ន្ធមិត្តសហរដ្ឋអាមេរិក។ នេះជាការអះអាងរបស់អ្នកនាំពាក្យក្រសួងការបរទេសអាមេរិក លោកMORGAN ORTAGUS។ អ្នកនាំពាក្យរូបនោះអះអាងទៀតថា ក្រុងវ៉ាសិុនតោននឹងនៅតែបើកចំហ សម្រាប់ការចរចាជាមួយក្រុងព្យុងយ៉ាងតែគូសបញ្ជាក់ថា បណ្ដាទណ្ឌកម្មសេដ្ឋកិច្ចប្រឆាំងកូរ៉េខាងជើងនឹងមិនដកចេញឡើយ។
ការចរចាស្ដីពីការរំសាយនុយក្លេអ៊ែររវាងសហរដ្ឋអាមេរិកនិងកូរ៉េខាងជើង ធ្លាក់ក្នុងភាពទ័លច្រក ចាប់តាំងពីការជួបគ្នាកំពូលលើកទី២ របស់មេដឹកនាំប្រទេសទាំង២ នៅក្រុងហាណូយទទួលបរាជ័យមក៕ (កែសម្រួលដោយ ៖ បុប្ផា)
ចែករំលែកព័តមាននេះ