ខេត្តបាត់ដំបង ៖ យោងតាមប្រភពឱ្យដឹងថា ស្ថាប័នអយ្យការអមសាលាដំបូងខេត្ត បានចេញដីកាកោះអញ្ជើញជនរងគ្រោះម្នាក់ និងសាក្សីម្នាក់ឱ្យចូលបំភ្លឺ នៅវេលាម៉ោង៨ព្រឹកថ្ងៃទី១០ មិថុនា នេះ ពាក់ព័ន្ធពីដំណើរឿង«គំរាមកំហែង…
ខេត្តបាត់ដំបង ៖ យោងតាមប្រភពឱ្យដឹងថា ស្ថាប័នអយ្យការអមសាលាដំបូងខេត្ត បានចេញដីកាកោះអញ្ជើញជនរងគ្រោះម្នាក់ និងសាក្សីម្នាក់ឱ្យចូលបំភ្លឺ នៅវេលាម៉ោង៨ព្រឹកថ្ងៃទី១០ មិថុនា នេះ ពាក់ព័ន្ធពីដំណើរឿង«គំរាមកំហែង និងកាន់អាវុធគ្មានការអនុញ្ញាតិ» ដែលជនសង្ស័យត្រូវគេដឹងថា ជាមន្ត្រីជាន់ខ្ពស់មួយរូបនៃរាជរដ្ឋាភិបាលកម្ពុជា ដែលប្រព្រឹត្តនៅក្នុងស្រុកសំឡូត ។
យោងតាមដីកាតុលាការដែលកោះសន្តិភាពទទូលបាន ជនរងគ្រោះនិងសាក្សីដែលត្រូវអយ្យការអញ្ជើញឲ្យចូលបំភ្លឺនៅព្រឹកនេះ មានឈ្មោះផុន វីរ: ភេទប្រុស អាយុ១៧ឆ្នាំ នៅភូមិឆករកា ឃុំសំឡូត ស្រុកសំឡូត ជាសាក្សី និងឈ្មោះហិន ដានី ភេទប្រុស អាយុ៣៧ឆ្នាំ នៅភូមិ-ឃុំជាមួយគ្នាជាដើមបណ្ដឹង ។ ដីកាកោះអញ្ជើញដើមបណ្ដឹងនិងសាក្សីនេះ ចុះថ្ងៃទី២១ ឧសភា ២០១៩ ដោយលោកគឺ ប៉ុណ្ណារ៉ា ព្រះរាជអាជ្ញារងអមសាលាដំបូងខេត្តបាត់ដំបង ។
នៅក្នុងដីកាកោះរបស់លោកគឺ ប៉ុណ្ណារ៉ា ព្រះរាជអាជ្ញារងបានឱ្យដឹងថា ដើមបណ្ដឹងនិងសាក្សីខាងលើនេះនឹងចូលបំភ្លឺនៅក្នុងតុលាការអំពីដំណើរឿង «គំរាមកំហែង និងកាន់អាវុធគ្មានការអនុញ្ញាត» តែដីកាមិនបានប្រាប់ពីព្រឹត្តហេតុ និងជនប្រព្រឹត្តនោះទេ ។ ប៉ុន្តែបើតាមដំណើរឿងនេះ ត្រូវគេដឹងថា គឺជាប់ពាក់ព័ន្ធនឹងសំណុំរឿងលោកសេរី កុសល មន្ត្រីជាន់ខ្ពស់រាជរាដ្ឋាភិបាលកម្ពុជា និងជាតំណាងរាស្ត្រខេត្តបន្ទាយ មានជ័យទៀតផង។
គួរំលឹកផងដែរថា លោកសេរី កុសល មន្ត្រីជាន់ខ្ពស់ខាងលើនេះ ត្រូវបានប្រជាពលរដ្ឋចំនួន៤នាក់ នៅ
ភូមិឆករកា ឃុំសំឡូត ស្រុកសំឡូត ក្នុងនោះ មានទាំងដើមបណ្ដឹងឈ្មោះហ៊ុន ដានី ខាងលើនេះផង បាន
ប្ដឹងចោទប្រកាន់ថា បានប្រើប្រាស់កាំភ្លើងអាកា៤៧ បាញ់គំរាមសម្លាប់ពួមគាត់ កាលពីព្រឹកថ្ងៃទី២០ មេសា ២០១៩ ខណ:ដែលពួកគាត់កំពុងនាំគ្នារើសផ្លែសំរងភ្នំ នៅចំណុចភ្នំរទេះសេះ ស្ថិតក្នុងភូមិឆករកា ឃុំសំ
ឡូត។ ពលរដ្ឋបាននិយាយថា ជាមួយនឹងការបាញ់គំរាមនេះ លោកសេរី កុសល បានចោទប្រកាន់ពួកគាត់ថា ជាអ្នកកាប់រានដីព្រៃ តែតាមពិតលោកសេរី កុសល វិញទេ ដែលជាអ្នករុករានដីព្រៃ ។
ជនរងគ្រោះទាំង៤នាក់ នោះមាន ១-ឈ្មោះហិន ដានី ភេទប្រុស អាយុ៣៧ឆ្នាំ ២-ឈ្មោះមាស រ៉េន ភេទស្រីអាយុ៣៥ឆ្នាំ ៣-ឈ្មោះផុន វីរ: ភេទប្រុស អាយុ១៧ឆ្នាំ (ឪពុក ម្ដាយ កូន) និង៤-ឈ្មោះឡុក ឃឹម ភេទប្រុស អាយុ៦២ឆ្នាំ ។
ពាក់ព័ន្ធនឹងការចូលបំភ្លឺនៅតុលាការនាព្រឹកនេះដែរ បើតាមលោកហិន ដានី ដែលជាដើមបណ្ដឹងបានប្រាប់កោះសន្តិភាពនៅខាងមុខតុលាការថា រូបលោកនិងកូនប្រុស ត្រូវលោកព្រះរាជអាជ្ញាសាកសួរពីដំណើរឿងពាក់ព័ន្ធនឹងលោកសេរី កុសល បាញ់គំរាម កាលពីខែមេសា និងរឿងដីធ្លី ។ ពេលនេះ ការសាកសួរត្រូវបានបញ្ជប់ហើយ តែនៅជនរងគ្រោះ២នាក់ទៀត ដែលនឹងត្រូវចូលបំភ្លឺនាពេលខាមុខនេះជាបន្ត ។ (សម្រួលដោយ៖ ស្រីណា)
ចែករំលែកព័តមាននេះ