រាជធានីភ្នំពេញ ៖ ជនសង្ស័យម្នាក់ឃើញគ្រោះថ្នាក់ចរាចរណ៍រវាងម៉ូតូបុកជាមួយរថយន្តធ្វើឲ្យម្ចាស់ម៉ូតូដួលសន្លប់ ស្រាប់តែធ្វើជាចិត្តល្អជួយមើល ហើយលើកយកម៉ូតូជនរងគ្រោះជិះទៅសង្ងំលាក់ខ្លួនក្នុងផ្ទះសំណាក់ ក៏ត្រូវសមត្ថកិច្ចតាមរកឃើញឃាត់ខ្លួនយកមកសួរនាំ បង្កឱ្យមានការភ្ញាក់ផ្អើលកាលពីម៉ោង12និង30នាទីរំលងអធ្រាត្រឈានចូលថ្ងៃទី1 ខែមិថុនា ឆ្នាំ2019 តាមបណ្តោយផ្លូវ86 នៅចំណុចផ្ទះសំណាក់យីហោ លីលី ស្ថិតក្នុងសង្កាត់ស្រះចក ខណ្ឌដូនពេញ ។
ជនរងគ្រោះមានឈ្មោះ ជាប ឌីណា ភេទប្រុស អាយុ28ឆ្នាំ ជិះម៉ូតូម៉ាកស្មាសវី ពណ៌ខ្មៅ ពាក់ស្លាកលេខភ្នំពេញ1BD4078 ស្នាក់នៅសង្កាត់ឬស្សីកែវ ខណ្ឌឬស្សីកែវ ចំណែកជនសង្ស័យឈ្មោះ ពៅ សុភ័ក្រ ភេទប្រុស អាយុ25ឆ្នាំ ស្នាក់នៅមិនពិតប្រាកដ មានស្រុកកំណើតនៅខេត្តកំពង់ឆ្នាំង ។
តាមសាក្សីឃើញហេតុការណ៍ឱ្យដឹងថា មុនកើតហេតុ គេឃើញបុរសម្នាក់បើកម៉ូតូមួយគ្រឿងម៉ាកស្មាសវី ពណ៌ខ្មៅ តាមបណ្តោយផ្លូវព្រះមុនីវង្សពីត្បូងទៅជើង ខណៈបើកមកដល់ចំណុចកើតហេតុ ដោយសារតែម្ចាស់ម៉ូតូស្រវឹងស្រាក៏ជិះទៅបុកគូទរថយន្តមួយគ្រឿងមិនចាំម៉ាក បណ្តាលឱ្យដួលសន្លប់ស្តូកស្តឹងនៅនឹងកន្លែងកើតហេតុ រីឯម្ចាស់រថយន្តមិនស្គាល់ម៉ាកនោះទេ ហើយក៏មិនបានរករឿងអីដែរ ក៏ជិះចេញទៅបាត់ស្រមោល ។
ប្រភពដដែលបន្តថា ភ្លាមៗនោះជនសង្ស័យឃើញឱកាសល្អ ហើយធ្វើជាចិត្តល្អជួយជនរងគ្រោះ រួចលើកយកម៉ូតូជិះទៅបាត់ស្រមោល ។ ពេលជនរងគ្រោះដឹងខ្លួនវិញ អត់ឃើញម៉ូតូក៏បានប្តឹងសមត្ថកិច្ច ទើបសមត្ថកិច្ចប៉ុស្តិ៍វត្តភ្នំសហការគ្នាជាសមត្ថកិច្ចប៉ុស្តិ៍ស្រះចកធ្វើការស្រាវជ្រាវអស់រយៈពេលជិត២ម៉ោង ក៏ទៅដល់ផ្ទះសំណាក់យីហោ «លីលី» ស្រាប់តែឃើញជនសង្ស័យទៅសង្ងំលាក់ខ្លួននៅក្នុងនោះជាមួយម៉ូតូជនរងគ្រោះ ក៏ធ្វើការឃាត់ខ្លួនភ្លាមៗយកទៅសួរនាំនៅប៉ុស្តិ៍វត្តភ្នំតែម្តង ។
ក្រោយពេលកើតហេតុ ជនរងគ្រោះបានទៅដាក់ពាក្យបណ្តឹងនៅប៉ុស្តិ៍វត្តភ្នំ ដើម្បីឱ្យសមត្ថកិច្ចកសាងសំណុំរឿងបញ្ជូនជនសង្ស័យទៅកាន់អធិការដ្ឋាននគរបាលខណ្ឌដូនពេញ ចាត់ការទៅតាមនីតិវិធី ៕ (កែសម្រួលដោយ ៖ បុប្ផា)
ចែករំលែកព័តមាននេះ