ខេត្តប៉ៃលិន ៖ កាលពីព្រឹកថ្ងៃទី០១ ខែមិថុនា ឆ្នាំ២០១៩ កន្លងទៅបុគ្គលិកកាស៊ីណូហ្គ្រែន ជេ អឹម ប្រមាណជាង១០០នាក់បានលើកគ្នាតវ៉ាទាមទារឱ្យថៅកែបើកប្រាក់ខែជូនពួកគេឡើងវិញ ខណៈពួកគេខិតខំធ្វើការងារទាំងយប់ទាំងថ្ងៃស្ទើរមិនហ៊ានឈប់សម្រាក ស្រាប់តែថៅកែមិនប្រាក់ប្រាក់កម្រៃជូនពួកគេក៏ផ្ទុះការប្តឹងតវ៉ាតែម្តង ។ ប៉ុន្តែក្រោយមកមានការអន្តរាគមន៍ពីអាជ្ញាធរ និងមន្ត្រីពាក់ព័ន្ធទើបមានការដោះស្រាយភ្លាមៗតែម្តង ។
ក្នុងការបើកប្រាក់ខែនេះបុគ្គលិកទាំងអស់នោះស្ទើរក្អួតឈាម ដោយសារតែថៅកែរងរបស់កាស៊ីណូម្នាក់ឈ្មោះ ថេត បានប្រើពាក្យសំដីអសុរោះ មើលងាយពួកគេជាខ្លាំងដោយថា ពួកគេសុទ្ធតែមនុស្សខួរក្បាលបង្កង និងជាក្រពើវង្វេងបឹងជាដើម ។ ប្រភពបន្តទៀតថា ក្នុងការបើកប្រាក់ខែឲ្យបុគ្គលិកទាំងនេះ គឺស្ថិតនៅក្នុងផ្ទះថៅកែ ក្នុងភូមិអូររអិល ឃុំស្ទឹងកាច់ ស្រុក សាលាក្រៅ ដោយមានប្រធាន និងអនុប្រធានមន្ទីរការងារសម្របសម្រួល និងមានការឈរយាមពីសមត្ថកិច្ចប៉ុស្តិ៍ ប្រជាការពារភូមិ តាំងពីផ្លូវចូលរហូតដល់ខាងក្នុងផ្ទះផងដែរ ។
ប្រភពព័ត៌មានពីបុគ្គលិកកាស៊ីណូខាងលើដែលចូលរួមបើកប្រាក់ខែកាស៊ីណូខាងលើបានរៀ បរាប់ឲ្យដឹងថា ការបើកប្រាក់ខែឲ្យពួកគាត់ គឺថៅកែមិនបានបើកនៅក្នុងកាស៊ីណូនោះទេ ដោយបើកនៅផ្ទះរបស់គេតែម្តង ហើយបុគ្គលិកដែលទៅបើកប្រាក់ខែទាំងអស់ គឺថៅកែឲ្យចូលតែម្តងពីរនាក់ប៉ុណ្ណោះ ហាមមិនឲ្យចូលក្នុងបន្ទប់គ្នាច្រើននោះឡើយ ។ ប្រភពដដែលបានបន្តថា មុននឹងថៅកែកាស៊ីណូខាងលើបើកប្រាក់ឲ្យ គឺមានថៅកែរងម្នាក់ឈ្មោះ ថេត និយាយពាក្យអសុរោះ មិនល្អចំពោះបុគ្គលិកទាល់តែសោះ ពោល គឺប្រើពាក្យសំដីមើលងាយមើលថោកថា ពួកគាត់សុទ្ធតែជាពួកខួរក្បាលបង្កង និងជាសត្វក្រពើវង្វេងបឹងជាដើម ។
ក្រោយពី ឮពាក្យសំដីបែបដូចនេះ ពួកគាត់ស្ទើរទ្រាំមិនបាន ព្រោះមិននឹកស្មានថា ចិត្តថៅកែដែលមានលុយកាក់វាល់លាន ហើយជាមេគេ បែរជានិយាយពាក្យមិនល្អ ចំពោះបុគ្គលិកដែលក្រីក្រ និងគ្មានចំណេះយ៉ាងនេះទៅវិញ ។ ពួកគាត់បញ្ជាក់ដែរថា បន្ទាប់ពីបើកប្រាក់ខែរួចហើយកាស៊ីណូ ខាងលើមិនដំណើរនោះទេ គឺបិទទ្វារតែម្តង ដោយសារមិនមានភ្ញៀវចូលទៅលេងដូចសព្វដង ។
ពួកគាត់បន្ថែមថា គ្រាន់តែមកបើកប្រាក់ខែសោះមានទាំងមន្ត្រីប៉េអិម ប៉ូលិសប៉ុស្តិ៍ និងប្រជា ការពារភូមិឈរយាមកាម តាំងពីផ្លូវចូលរហូតដល់ខាងក្នុងផ្ទះធ្វើឲ្យពួកគាត់មួយចំនួនស្ទើរតែមិនហ៊ានចូល ។ ប៉ុន្តែដោយសារមិនមានបញ្ហាអ្វីកើតឡើងទើបពួកគាត់ចូលទៅបើកប្រាក់ទាំងអស់គ្នាតែម្តង ។ ពាក់ព័ន្ធនឹងបញ្ហាខាងលើលោក អ៊ុំ ដារី អនុប្រធានមន្ទីរការងារ និងបណ្ដុះបណ្ដាលវិជ្ជាជីវៈបានឲ្យដឹងថា បុគ្គលិកកាស៊ីណូ បានបើកប្រាក់ខែអស់ហើយ ដោយចាប់បើកពីវេលាម៉ោង៩ព្រឹករហូតដល់ម៉ោង១២ថ្ងៃត្រង់ទើបរួចរាល់ ។
ទន្ទឹមនឹងនោះក៏មានបញ្ហាខ្លះៗកើតឡើងដែរ ដោយសារតែមានករណីប្រើពាក្យសំដីមិនល្អរវាងថៅកែរងម្នាក់ជាមួយនឹងកម្មករ ។ ប៉ុន្តែមិនមានអ្វីធំដុំនោះទេ ព្រោះមានការសម្របសម្រួលពីមន្ទីរការងារ និងបណ្ដុះបណ្ដាលវិជ្ជាជីវៈខេត្ត ។ លោកបន្តថា ការប្រើពាក្យសំដីមិនល្អនេះ គឺយើងបានសម្របសម្រួលគ្នារួចរាល់ហើយដែរដោយឲ្យភាគីទាំងពីរធ្វើការសុំទោសគ្នាទៅវិញទៅមក ជាពិសេសភាគីថៅកែតែម្ដង ៕ កែសម្រួលដោយ ៖ សុឃាក់
ចែករំលែកព័តមាននេះ