រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបានប្រកាសសម្រេចដកចេញ«ពន្ធកាត់ទុក១%» ដើម្បីបើកឱកាសឲ្យពាណិជ្ជករចំណេញច្រើន ។ យោងតាមបណ្តាញសង្គមហ្វេសប៊ុកសម្តេចបានលើកឡើងនៅក្នុងសិក្ខាសាលាស្ដីអំពី « បរិយាកាសវិនិយោគនៅកម្ពុជា» ដែលបានធ្វើឡើងនៅក្នុងទីក្រុងតូក្យូ ប្រទេសជប៉ុន នៅព្រឹកថ្ងៃទី២៩ ឧសភានេះ ។
សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចដកចេញនូវ «ពន្ធកាត់ទុក» (១%) ដែលបានតម្រូវអោយពាណិជ្ជករបង់មុន ទោះបីចំណេញ ឬខាតក៏ដោយ ។ សម្តេចបញ្ជាក់ថា «ពន្ធកាត់ទុក» នេះ គឺនឹងត្រូវលុបចោល ព្រោះវាជាប្រភេទបំណុលដែលហាក់ដូចជា រដ្ឋទៅខ្ចីពីក្រុមហ៊ុនឯកជនមកទុក ។ ដូច្នេះការបញ្ចប់ពន្ធកាត់ទុកនេះ គឺវានឹងបញ្ចប់នូវបំណុលរដ្ឋជាមួយនឹងក្រុមហ៊ុនឯកជនចំនួន(១%) ដែលនឹងកាន់តែជួយជំរុញដល់ការប្រកួតប្រជែងក្នុងការឈានឡើងនៃសេដ្ឋកិច្ចរបស់កម្ពុជា ហើយក៏នឹងជួយដល់ផ្នែកឯកជនក្នុងការរក្សាបាននូវទុនបន្ថែម ដើម្បីពង្រីកនូវអាជីវកម្មរបស់ខ្លួនផងដែរ ។
ចំពោះពេលវេលានៃការអនុវត្តសម្ដេចតេជោនាយករដ្ឋមន្ត្រីបានស្នើឲ្យរដ្ឋមន្ត្រីក្រសួងសេដ្ឋកិច្ចហិរញ្ញវត្ថុ សិក្សាផ្ដល់យោបល់ ។ ប៉ុន្តែសម្ដេចតេជោ ហ៊ុន សែន បានមានប្រសាសន៍ថា ការអនុវត្តគួរចាប់ផ្តើមនៅចុងឆ្នាំ២០១៩ ឬក៏ឲ្យបានលឿនជាងនេះតាមដែលអាចធ្វើទៅបាន ។ ទន្ទឹមនឹងការដកចេញនូវ «ពន្ធកាត់ទុក» យើងសង្ឃឹមថា ក្រុមហ៊ុនឯកជននានានឹងរកស៊ីបង់ពន្ធអោយបានត្រឹមត្រូវជូនរដ្ឋាភិបាល ដើម្បីយើងរីកចម្រើនទាំងអស់គ្នា ៕ កែសម្រួលដោយ ៖ សុឃាក់
ចែករំលែកព័តមាននេះ