រាជធានីភ្នំពេញ៖ ទស្សនិកជនតែងតែ សម្លឹងឃើញអ្នកសិល្បៈហាក់មានភាពសប្បាយរីករាយរហូត និងមានភាពហ៊ឺហា សម្ញែងទៅកាន់មហាជន ។ តើជីវិតអ្នកសិល្បៈសប្បាយ ហ៊ឺហារហូតឬ ? ក្នុងកាលៈទេសៈណាក៏ដោយ…
រាជធានីភ្នំពេញ៖ ទស្សនិកជនតែងតែ សម្លឹងឃើញអ្នកសិល្បៈហាក់មានភាពសប្បាយរីករាយរហូត និងមានភាពហ៊ឺហា សម្ញែងទៅកាន់មហាជន ។ តើជីវិតអ្នកសិល្បៈសប្បាយ ហ៊ឺហារហូតឬ ?
ក្នុងកាលៈទេសៈណាក៏ដោយ នៅពេលតារាទាំងអស់ដែលត្រូវសម្តែងឲ្យមហាជនបានទស្សនានោះ ពួកគេមិនអាចយកភាពឈឺចាប់ឬការលំបាកវេទនាផ្ទាល់ខ្លួនមង្ហាញមហាជននោះឡើយ ។ ក្នុងនាមជាអ្នកសិល្បៈគឺត្រូវធ្វើយ៉ាងណាផ្តល់ភាពសប្បាយរីករាយដល់មហាជន ព្រោះសិល្បៈគឺសម្រាប់កំដរអារម្មណ៍ និងផ្តល់ភាពស្រស់ស្រាយដល់អ្នកទស្សនា មិនអាចបង្ហាញនូវភាពលំបាកផ្ទាល់ខ្លួនទៅឲ្យអ្នកទស្សនាដឹងនោះឡើយ ។ រូបភាពខាងក្រៅផ្សេង តែនៅពីក្រោយឆាកសម្តែងរបស់អ្នកសិល្បៈមានរឿងរ៉ាវច្រើនដែលមនុស្សភាគតិចបានដឹង ដោយរឿងរ៉ាវទាំងអស់នេះវាស្រដៀងគ្នាទៅនឹងមនុស្សទូទៅដែរ ។
តារាសម្តែង និងបង្ហាញម៉ូដទឹម រដ្ឋា បានលើកឡើងកាលពីពេល ថ្មីៗកន្លងមកថា «ក្នុងនាមជាអ្នកសិល្បៈយើងត្រូវផ្តល់ភាពសប្បាយដល់អ្នកទស្សនា ដោយយើងមិនអាចបង្ហាញបញ្ហាផ្ទាល់ខ្លួនដល់ពួកគាត់នោះឡើយ ។ ពេលខ្លះបើសិនជាយើងបានបង្ហាញនូវទុក្ខលំបាកចេញមក ទស្សនិកមួយចំនួនគាត់មិនជឿយើងឡើយ ហើយច្បាស់ណាស់គាត់នឹងគិតថានោះជាការសម្តែងប៉ុណ្ណោះ ។ អ្នកសិល្បៈក៏ដូចជាមហាជនទូទៅដែរ គឺតែងតែមានទុក្ខលំបាកដូចគ្នា ហើយទុក្ខលំបាកនោះវាមានផ្សេងគ្នា ដូចជាបញ្ហាស្នេហា លុយ និងបញ្ហាជាច្រើនទៀតដែលមនុស្សទូទៅបានពើបប្រទះ ដូចៗគ្នា។
ពេលខ្លះកុំឃើញអ្នកសិល្បៈឡើងច្រៀងរាំសប្បាយ ហ៊ឺហាលើឆាក គឺគ្មានអ្វីកើតឡើង ប៉ុន្តែនៅពីក្រោយខ្នងអ្នកសិល្បៈក៏មានទុក្ខលំបាកដូចគ្នា គ្រាន់តែមិនបញ្ចេញប៉ុណ្ណោះ»។
អ្នកនាងខាត់ សុឃីម លើកឡើងថា «អ្នកសិល្បៈ ទម្រាំទទួលបានលុយពីការសម្តែងអ្វីមួយនោះគឺមានការហត់នឿយខ្លាំងណាស់ដែរ។ មានអ្នកសិល្បៈខ្លះឃើញពួកគាត់ឡូយឆាយ ហ៊ឺហានៅក្នុងពេលសម្តែង ប៉ុន្តែនៅក្រៅឆាកសម្តែងវិញគឺពួកគាត់មានការលំបាកណាស់ ប៉ុន្តែពួកគាត់មិនជាបង្ហាញឲ្យទស្សនិកជនបានដឹងនោះឡើយ »។
ទោះជាយ៉ាងណាក្តីបើតាមអ្នកនាងខាត់ សុឃីម ការលើកឡើងខាងលើនេះគឺកើតមានចំពោះអ្នកសិល្បៈមួយចំនួនប៉ុណ្ណោះ ដោយសារមានអ្នកសិល្បៈខ្លះទៀតក៏គេមានបានដោយសារតែសិល្បៈដែរ ។ អ្នកនាងនិយាយថា «បើយើងថា សិល្បៈមិនអាចធ្វើឲ្យយើងមានបាននោះក៏វាមិនត្រឹមត្រូវដែរ ព្រោះមានអ្នកសិល្បៈយើងមួយចំនួនដែលមានភាពល្បីល្បាញខ្លាំងគឺពួកគាត់មានបានហ៊ឺហាដោយអាជីពមួយនេះ។ អ្នកសិល្បៈមិនអាចយកអាជីពសិល្បៈតែមួយមុខមកធ្វើជាដើមទុននោះឡើយ ពោលគឺត្រូវចេះរៀបចំបង្កើតមុខរបរថ្មីបន្ថែម នោះទើបឲ្យយើងអាចជីវភាពមួយសមរម្យ បើទោះជាយើងមិនអាចប្រឡូកក្នុងសិល្បៈបានទៀតក៏ដោយ»។
តារាសម្តែងអ្នកស្រីច័ន្ទ សោភ័ណ្ឌ ឲ្យដឹងថា ជីវិតអ្នកសិល្បៈមិនមែនមានតែភាពសប្បាយរីករាយរហូតនោះឡើយ ពោល គឺពេលខ្លះក៏មានការពិបាកដូចជាមនុស្សទូទៅដែរ ។ អ្នកស្រីបញ្ជាក់ថា «ពេលខ្លះបញ្ហាវាបានកើតឡើងខុសគ្នា ដូចជាខ្ញុំគឺមានផលិតករខ្មែរនៅមិនទាន់ទូទាត់លុយឲ្យគ្រប់នៅឡើយទេ បើទោះបីជាបានថតចប់សព្វគ្រប់ហើយក៏ដោយ ។ ជីវិតអ្នកសិល្បៈគឺមានភាពរញ៉េរញ៉ៃណាស់ អ្នកខ្លះឃើញសប្បាយរីករាយពេលនៅលើឆាកទេ ប៉ុន្តែចុះពីលើឆាកវិញគឺកើតទុក្ខ លំបាកដូចគ្នា ។ សប្បាយពេលដែលយើងទៅថតដំណើរការបានល្អ ទៅដោយរលូននិងសហការគ្នា ហើយអ្វីដែលពិបាកនោះគឺផលិតករខ្លះថតហើយជំពាក់លុយតួតែម្តងមិនថាគិតជាថ្ងៃ ឬគិតរឿងនោះទេ »។
តារាចម្រៀងលោកសុះ ម៉ាច បានលើកឡើងថា «ជីវិតអ្នកសិល្បៈខ្លះគឺមិនខុសអ្វីទៅនឹងតួស្តេចល្ខោនដែលពេលសម្តែងគឺមានសព្វបែបយ៉ាងមើលទៅអស្ចារ្យ តែពេលចប់ការសម្តែងចុះមកវិញគឺជិះម៉ូតូឌុបទៅផ្ទះ។
អ្នកសិល្បៈមិនប្រាកដតែហ៊ឺហាគ្រប់ពេលនោះឡើយ តួយ៉ាងជាក់ស្តែងមានសិល្បករយើងមួយចំនួនពេលដែលពួកគាត់ធ្លាក់ខ្លួនឈឺគឺរកតែលុយព្យាបាលសឹងតែមិនបានផង ។ សិល្បករខ្លះរកផ្ទះនៅមិនបាន ហើយការស្លៀកពាក់ហ៊ឺហារបស់ពួកគាត់គឺគ្រាន់តែជាការសម្តែងនៅក្នុងភាពយន្តឬលើឆាកតន្ត្រីប៉ុណ្ណោះ ធាតុពិតអ្នកសិល្បៈខ្លះក៏មានការខ្វះខាតមុខក្រោយផងដែរ»។
យ៉ាងណាក្តីលោកសុះ ម៉ាច មិនជំទាស់ទេដែលថា អ្នកសិល្បៈខ្លះមានភាពហ៊ឺហាក៏ដោយសារចំណូលពីសិល្បៈនេះដែរ ព្រោះសិល្បៈសម័យនេះខុសពីសម័យមុន គឺបើល្បីឈ្មោះអាចរកប្រាក់បានច្រើន ៕ (កែសម្រួលដោយ ៖ បុប្ផា)
ចែករំលែកព័តមាននេះ