រាជធានីភ្នំពេញ ៖ បទចម្រៀងជាស្នាដៃរបស់កវីលោកគង្គ ប៊ុនឈឿន មានចំណងជើងថា «នឹកភូមិភ្នំធំ» ត្រូវក្រសួងវប្បធម៌ និងវិចិត្រសិល្បៈប្រគល់ឲ្យភរិយារបស់លោកគឺអ្នកស្រីតាត គីមលន ជាអ្នកគ្រប់គ្រង ។ ការសម្រេចរបស់ក្រសួងវប្បធម៌បានធ្វើឡើង បន្ទាប់ពីភរិយារបស់លោកគង្គ ប៊ុនឈឿន បានដាក់ពាក្យបណ្តឹងទៅកាន់ក្រសួង បន្ទាប់ពីបទនេះត្រូវគេយកទៅកែខុសពីលក្ខណៈដើម ។
ដោយយោងតាមពាក្យបណ្តឹង និងការបង្ហាញភស្តុភាងមួយចំនួនពីបទចម្រៀងនេះ ក្រសួងវប្បធម៌ និងវិចិត្រសិល្បៈបានចេញសេចក្តីប្រគល់បទ«នឹកភូមិភ្នំធំ» ទៅឲ្យអ្នកស្រីតាត គីមលន ជាអ្នកគ្រប់គ្រងលើកម្មសិទ្ធិបញ្ញា។ បើយោងតាមសេចក្តីសម្រេចរបស់ក្រសួងដែលចុះហត្ថលេខាដោយលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈកាលពីថ្ងៃទី២១ ខែឧសភា ឆ្នាំ២០១៩ ឲ្យដឹងថា លោកស្រីតាត គីមលន ជាភរិយារបស់លោក គង្គ ប៊ុនឈឿន ជាកវីនិពន្ធបទចម្រៀងជំនាន់ដើមក្នុងនោះមានបទភ្លេង និងទំនុកច្រៀង បានស្នើសុំគ្រប់គ្រងចម្រៀងមួយបទជាស្នាដៃនិពន្ធរបស់ស្វាមីលោកស្រី គឺបទ«ថ្ងៃដែលអូនចុកឈាម»ដែលគេច្រឡំហៅថាបទ«នឹកភូមិភ្នំធំ»។
ផ្អែកតាមការពិនិត្យ និងសិក្សារបស់ក្រសួងវប្បធម៌ និងវិចិត្រសិល្ប:ទាំងភស្តុតាង និងសាក្សី ក្រសួងបានសម្រេចអនុញ្ញាតប្រគល់ជូនលោកស្រីគាត គឹមលន ដើម្បីគ្រប់គ្រងនូវបទចម្រៀងមួយបទនេះ ។ សេចក្តីសម្រេចនេះ គឺក្រសួងវប្បធម៌ និងវិចិត្រសិល្បៈ មានបំណងចង់ឲ្យទាយាទនៃអ្នកនិពន្ធដទៃទៀត ធ្វើយ៉ាងណាខិតខំស្វែងរកឯកសារ និងភស្តុតាងដើម្បីស្នើសុំគ្រប់គ្រងសិទិ្ធនូវបទចម្រៀង ឬស្នាដៃ គ្មានអ្នកទទួលមរតក ឬគ្មានមរតកសាសន៍ពីក្រសួងផងដែរ។
«នឹកភូមិភ្នំធំ» ដែលជាស្នាដៃរបស់កវីស្ទឹងសង្កែលោកគង្គ ប៊ុនឈឿន ត្រូវបានផលិតកម្មសាន់ដេយកមកផលិតជាបទចម្រៀងថ្មីដែលមានចំណងជើងថា «អូនជាអ្នកមាន» សមនឹងអ្នកមានដូចគ្នា ដែលត្រូវបានបកស្រាយដោយតារាចម្រៀងនាយចឺម ។ ក្រោយពីបទចម្រៀងនេះបានចេញផ្សាយនៅបណ្តាញយូធូបក៏មានការរិះគន់យ៉ាងខ្លាំងចំពោះការយកបទចម្រៀងដែលជាមរតកដើមកាឡៃទំនុកថ្មី ជាមួយការច្រៀងបែបស្រែកខុសពីលក្ខណៈដើម ។ បញ្ហានេះបានធ្វើឲ្យក្រុមគ្រួសាររបស់លោកគង្គ ប៊ុនឈឿន កើតទុក្ខមិនសុខចិត្ត និងបានដាក់ពាក្យប្តឹងទៅក្រសួងមានចំណាត់ការឲ្យផលិតកម្មសាន់ដេបញ្ឈប់នូវការចាក់ផ្សាយនូវបទនាយចឺម តាមគ្រប់រូបភាពជាបន្ទាន់ ។
បន្ទាប់ពីមានភាពចម្រូងចម្រាសនេះកើតឡើង ផលិតកម្មសាន់ដេបានលុបបទចម្រៀងនេះចោលវិញទាំងស្រុង ខណៈពេលដែលអ្នកនិពន្ធបទនេះឲ្យនាយចឺម ច្រៀងបានចេញសូមទោសជាសាធារណៈផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ