ប្រទេសកូរ៉េខាងជើង ៖ ប្រទេសកូរ៉េខាងជើងកាលពីថ្ងៃទី៩ ឧសភា បានបាញ់មីស៊ីល២គ្រាប់ថ្មីទៀត ដែលប្រហែលជាមីស៊ីលរយៈខ្លី។ នេះជាការអះអាងរបស់សេនាធិការដ្ឋានកងទ័ពកូរ៉េខាងត្បូង ប៉ុន្មានថ្ងៃបន្ទាប់ពីសមយុទ្ធបាញ់គ្រាប់ពិតមួយ ដែលប្រព្រឹត្តទៅក្រោមការតាមដានពិនិត្យរបស់លោកគីមជុងអ៊ុន។
ការបាញ់សាកអាវុធទាំងនេះ ធ្វើឡើងខណៈលោកSTEPHEN BIEGUN បេសកជនអាមេរិកសម្រាប់កូរ៉េខាងជើង ស្ថិតនៅទីក្រុងសេអ៊ូល ដើម្បីជួបជាមួយរដ្ឋមន្ត្រីការបរទេសកូរ៉េខាងត្បូង លោកស្រី KANG KYUNG WHA។
មីស៊ីលដំបូងគេបាញ់ចេញនាវេលាម៉ោង១៦និង២៩នាទីម៉ោងក្នុងស្រុក ហើយហោះហើរក្នុងចម្ងាយ៤២០គីឡូម៉ែត្រ។ ចំណែកមីស៊ីលទី២បាញ់ចេញនាវេលាម៉ោង១៦និង៤៩នាទី។ មីស៊ីលទាំង២គ្រាប់ដែលហោះហើរក្នុងកម្ពស់៥០គីឡូម៉ែត្រ ត្រូវបានបាញ់ឆ្ពោះទៅទិសខាងកើត ចេញពីទីតាំងមួយស្ថិតនៅជិតស៊ីណូរី ជាមូលដ្ឋានមួយនាភាគពាយ័ព្យប្រទេស។
វិមានប្រធានាធិបតីកូរ៉េខាងត្បូងដែលចាត់ទុកការបាញ់មីស៊ីលទាំងនោះថា គួរឲ្យព្រួយបារម្ភ ក្នុងសេចក្ដីប្រកាសមួយយល់ថា បែបនេះពុំមែនជាការសម្រាលភាពតានតឹងឡើយ។ កូរ៉េខាងជើងកាលពីចុងសប្ដាហ៍កន្លងទៅ បានធ្វើសមយុទ្ធបាញ់គ្រាប់ពិត ក្រោមការត្រួតពិនិត្យរបស់មេដឹកនាំខ្លួន លោកគីមជុងអ៊ុន ដោយហៅសមយុទ្ធនោះថា ជាការហ្វឹកហ្វឺនជាទម្លាប់ហើយមានលក្ខណៈការពារសុទ្ធសាធ។
នាឱកាសនោះគ្រាប់រ៉ុក្កែតហ្វូងធុនធ្ងន់ជាច្រើនគ្រាប់និងមីស៊ីលបាលីស្ទិករយៈខ្លី យ៉ាងតិច១គ្រាប់ត្រូវបានបាញ់។ ប្រធានាធិបតីអាមេរិកលោកដូណាល់ត្រាំថ្លែងថា យើងតាមដានពិនិត្យរឿងនេះយ៉ាងយកចិត្តទុកដាក់ ហើយមីស៊ីលទាំងនោះជាមីស៊ីលតូចៗនិងមីស៊ីលរយៈខ្លី៕
ចែករំលែកព័តមាននេះ