ទើបតែបានបង្ហាញខ្លួនទាំងគ្រួសារក្នុងកម្មវិធីសំនៀងខ្មែរ អ្នកនាង សឿ សុធារ៉ា ហើយធ្វើឱ្យគេចាប់ អារម្មណ៍ថា អ្នកនាង និងស្វាមី អាចនឹងត្រលប់មកកាន់វិថីសិល្បៈជាថ្មី។ ផ្ទុយពីការប៉ាន់ស្មាន…
ទើបតែបានបង្ហាញខ្លួនទាំងគ្រួសារក្នុងកម្មវិធីសំនៀងខ្មែរ អ្នកនាង សឿ សុធារ៉ា ហើយធ្វើឱ្យគេចាប់ អារម្មណ៍ថា អ្នកនាង និងស្វាមី អាចនឹងត្រលប់មកកាន់វិថីសិល្បៈជាថ្មី។ ផ្ទុយពីការប៉ាន់ស្មាន អ្នកនាងបែរជាអះអាងថា ខ្លួន និងលោក សាពូន មីដាដា អត់មានបំណងត្រឡប់ថយក្រោយនោះទេ ប៉ុន្តែអ្វីដែលគ្រួសារអ្នកនាងទទួលឡើងក្នុងកម្មវិធីនោះ គឺដោយសារតែចង់ប្រកាសបំណងមួយជាមួយសម្ដេចនាយករដ្ឋមន្ត្រី និងលោកជំទាវ។
អ្នកនាង សឿ សុធារ៉ា និយាយថា ដោយសារតែនឹករលឹកដល់ទស្សនិកជន និងនឹករលឹកដល់សម្ដេចនាយករដ្ឋមន្ត្រី ដែលអ្នកនាងតែងហៅថា សម្ដេចតេជោមហាវិរៈបិតាសន្តិភាពជាតិខ្មែរ ទើបអ្នកនាងទទួលច្រៀងក្នុងកម្មវិធីនោះ ព្រោះដឹងថា សម្ដេចតែងចូលទស្សនាក្នុងកម្មវិធីនោះរាល់ពេលផ្សាយផ្ទាល់។ អ្នកនាងថា ខ្លួន និងគ្រួសារមានអារម្មណ៍រំភើបយ៉ាងខ្លាំង នៅពេលដែលអ្នកនាង និងស្វាមីបកស្រាយបទចម្រៀង ហើយត្រូវបានសម្ដេចនាយករដ្ឋមន្ត្រីចូលទស្សនា និងចូល Comment សួរសុខទុក្ខអ្នកនាង និងស្វាមី ព្រមទាំងកូនទាំង២នៅក្នុងថ្ងៃនោះ។ អ្នកនាងថា នេះជាអ្វីដែលអ្នកនាង និងស្វាមីចង់បាន ខណៈដែលអ្នកនាងប្រកាសថា ខ្លួន និងគ្រួសារ នៅមានបំណងធំមួយទៀត គឺបានថតរូបជាមួយសម្ដេចនាយកដ្ឋមន្ត្រី និងលោកជំទាវ ជាលក្ខណៈគ្រួសារដើម្បីតាំងនៅផ្ទះ។
អ្នកនាងថា ក្នុងឆ្នាំ២០១៩ ពោលគឺចាប់តាំងពីកូនប្រុសរបស់អ្នកនាងកាន់តែចម្រើនវ័យ អ្នកនាង និងលោក សាពូន មីដាដា តែងនឹកស្រមៃជាប្រចាំថា បើបានថតរូបរូបទាំងប្ដីទាំងប្រពន្ធ និងកូនទាំង២ ជាមួយសម្ដេចនាយករដ្ឋមន្ត្រី និងលោកជំទាវទុកដាក់តាំងផ្ទះ មិនដឹងថាមានសុភមង្គលយ៉ាងណា។
អ្នកនាងថា ក្នុងឆ្នាំ២០១៩នេះ បើអ្នកនាង និងគ្រួសារ មិនមានឱកាសបានថតរូបជាគ្រួសារជាមួយសម្ដេចនាយករដ្ឋមន្ត្រី និងលោកជំទាវ ដើម្បីមកផ្ដិតតាំងផ្ទះនោះអ្នកនាង នឹងមិនអស់ចិត្តនោះទេ។ អ្នកនាងចង់បានរូបថតមួយសន្លឹកជួបជុំគ្រួសារមួយជាមួយសម្ដេច និងលោកជំទាវ ដើម្បីឱ្យកូនទាំង២បានមើល និងទុកមើលជាអនុស្សាវរីយ៍។ អ្នកនាង សឿ សុធារ៉ា ថា នេះគឺជាបំណងធំតែមួយគត់ ដែលអ្នកនាងចង់បានក្នុងឆ្នាំ២០១៩។
យ៉ាងណាមិញអ្នកនាងថា មិនដឹងថាអ្វីដែលអ្នកនាងនឹកស្រម៉ៃអាចក្លាយជាការពិតឆាប់ៗ ឬ យ៉ាងណានោះទេ ក្នុងពេលដែលអ្នកនាងថា អ្នកនាង និងស្វាមី ខានជួបដោយផ្ទាល់ជាមួយសម្ដេចនាយករដ្ឋមន្ត្រី និងលោកជំទាវ ជាលក្ខណៈជាកូនជាចៅប្រមាណជាយូរឆ្នាំមកហើយ៕
ចែករំលែកព័តមាននេះ