ស្ត្រីជនជាតិអ៊ូហ្គង់ដាអាយុ៣៩ឆ្នាំម្នាក់មានកូន៤៤នាក់ ក្រោយពីរៀបការនៅអាយុ១២ឆ្នាំ ។ បច្ចុប្បន្នកូនស្លាប់ចំនួន៦នាក់ ដូច្នេះត្រូវចិញ្ចឹមបីបាច់៣៨នាក់តែម្នាក់ឯងព្រោះប្ដីមានប្រពន្ធថ្មី ។
«Mail Online» របស់អង់គ្លេសកាលពីពេល ថ្មីៗកន្លងមកបានផ្សាយពីខ្សែជីវិតរបស់ស្ត្រីឈ្មោះរីមីរីយ៉ាម ណាបាតានហ្ស៊ី (Miriam Nabatanzi) ជនជាតិអ៊ូហ្គង់ដាអាយុ៣៩ឆ្នាំ ទទួលបន្ទុកចិញ្ចឹមកូនដល់ទៅ៣៨នាក់ ដោយពួកគេទាំងអស់បានស្នាក់នៅក្នុងផ្ទះតូចចំនួន៤ខ្នងនៅជាយក្រុងកំប៉ាឡា ។
រីមីរីយ៉ាម ណាបាតានហ្ស៊ី រៀបរាប់ថាតាំងពីរៀបការក្នុងអាយុ១២ឆ្នាំនាងចាប់ផ្ដើមមានកូនភ្លោះ២នាក់លើកដំបូង ។ រៀបការបាន១ឆ្នាំ នាងបានទៅពិគ្រោះជាមួយគ្រូពេទ្យ ។ គ្រូពេទ្យបានបញ្ជាក់ថានាងមានស្បូនធំជាងមនុស្សទូទៅថែមទាំងមិនណែនាំឲ្យប្រើថ្នាំពន្យារកំណើតទេ ព្រោះអាចប៉ះពាល់ដល់សុខភាព។
ចាប់តាំងពីពេលនោះមករូបនាងមានកូនជាបន្តបន្ទាប់ ។ នាងមានកូនភ្លោះ២ចំនួន៦លើកសម្រាលបាន១២នាក់ កូនភ្លោះ៣ចំនួន៤លើកមានកូនសរុប១២នាក់ និងសម្រាលកូនភ្លោះ៤ចំនួន៥លើកមានកូន២០នាក់ ។ សរុបមានកូន៤៤នាក់ ប៉ុន្តែ៦នាក់ស្លាប់ នៅសល់៣៨នាក់ ខណៈពេលកូនប្រុសច្បងមានអាយុ២៣ឆ្នាំ ។
បច្ចុប្បន្នរីមីរីយ៉ាម ណាបាតានហ្ស៊ី ត្រូវទទួលបន្ទុកចិញ្ចឹមកូនតែម្នាក់ឯង ព្រោះប្ដីទៅរៀបការប្រពន្ធថ្មីកាលពី៣ឆ្នាំមុន ។ នាងស៊ីឈ្នួលធ្វើការងារគ្រប់បែបយ៉ាងមានទាំងធ្វើការក្នុងចំការកាហ្វេ ស៊ីឈ្នួលធ្វើសក់ រើសអេតចាយលក់ និងបម្រើការងារគ្រប់យ៉ាងដើម្បីបានប្រាក់ចិញ្ចឹមកូន ៕
ចែករំលែកព័តមាននេះ