រាជធានីភ្នំពេញ ៖ ស្របពេលជំងឺប៉េស្តជ្រូកអាហ្វ្រិកបាននិងកំពុងកើតឡើងលើសត្វជ្រូកកម្ពុជា ពោលគឺបានកើតនៅស្រុកអូរយ៉ាដាវ ខេត្តរតនគីរី បណ្ដាប្រទេសជាច្រើនបានដាក់បំរាមមិនអោយមានការនាំចូលសាច់ជ្រូកពីកម្ពុជាឡើយ ហើយមានប្រទេសខ្លះបានដាក់ចេញច្បាប់អោយមានការជាប់គុកផងដែរ បើសិនជារកឃើញមានជនណានាំយកសាច់ជ្រូកពីកម្ពុជា ក្នុងទំរង់ណាមួយក៏ដោយ ។…
រាជធានីភ្នំពេញ ៖ ស្របពេលជំងឺប៉េស្តជ្រូកអាហ្វ្រិកបាននិងកំពុងកើតឡើងលើសត្វជ្រូកកម្ពុជា ពោលគឺបានកើតនៅស្រុកអូរយ៉ាដាវ ខេត្តរតនគីរី បណ្ដាប្រទេសជាច្រើនបានដាក់បំរាមមិនអោយមានការនាំចូលសាច់ជ្រូកពីកម្ពុជាឡើយ ហើយមានប្រទេសខ្លះបានដាក់ចេញច្បាប់អោយមានការជាប់គុកផងដែរ បើសិនជារកឃើញមានជនណានាំយកសាច់ជ្រូកពីកម្ពុជា ក្នុងទំរង់ណាមួយក៏ដោយ ។
ថ្មីៗនេះមន្ត្រីគយរបស់ចិនបានអះអាងថា ប្រទេសចិននឹងហាមឃាត់ការនាំចូលជ្រូក ជ្រូកព្រៃនិងផលិតផលដែលពាក់ព័ន្ធនឹងសាច់ជ្រូកពីប្រទេសកម្ពុជា បន្ទាប់ពីកម្ពុជាត្រូវបានរាយការណ៍ថាមានករណីដំបូងនៃជំងឺបេស្តជ្រូកអាហ្វ្រិក ដែលជាជំងឺឆ្លងខ្ពស់មួយនោះ។ ព្រោះថាបញ្ហាជំងឺនេះកំពុងកើតមាននៅពេលប្រទេសចិន ហើយចិនកំពុងប្រយុទ្ធប្រឆាំងវីរុសនេះយ៉ាងខ្លាំងក្លា បន្ទាប់ពីវាបានរីករាលដាលទៅកាន់គ្រប់ខេត្តនិងតំបន់នៅលើដីគោករបស់ខ្លួនចាប់តាំងពីដំបូងត្រូវបានគេរកឃើញនៅទីនោះកាលពីដើមខែសីហា។ ប្រទេសកម្ពុជាបានរាយការណ៍ពីការផ្ទុះជំងឺគ្រុនផ្តាសាយជ្រូកអាហ្វ្រិកដំបូងរបស់ខ្លួននៅខេត្តរតនគិរីកាលពីចុងខែមីនា កន្លងទៅនិងបានសម្លាប់សត្វជ្រូកអ្នកស្រុករាប់រយក្បាលបង្កជាការខាតបង់យ៉ាងធ្ងន់ធ្ងរ។
បើតាមលោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានមានប្រសាសន៍ថា កម្ពុជាមិនដែលនាំចេញជ្រូកទៅកាន់ទីផ្សារក្រៅប្រទេសជាផ្លូវការនោះទេ ពីព្រោះសាច់ជ្រូកកម្ពុជាផ្គត់ផ្គង់មិនគ្រប់គ្រាន់លើទីផ្សារខ្លួនឯងផង ផ្ទុយទៅវិញកម្ពុជាមានតែនាំចូលជ្រូកពីទីផ្សារក្រៅប្រទេសមកផ្គត់ផ្គង់ ដើម្បីបំពេញតាមតម្រូវការពលរដ្ឋ ។ លោកបានបន្តថា « ការដាក់បំរាមរបស់ប្រទេសផ្សេងៗមកលើសាច់ជ្រូកកម្ពុជា គឺជាការត្រឹមត្រូវណាស់ ក្នុងពេលជ្រូកក្នុងស្រុកយើងកំពុងផ្ទុះជំងឺប៉េស្តជ្រូកអាហ្វ្រិកនៅខេត្តរតនគីរី តែខ្ញុំសូមបញ្ជាក់ថា បច្ចុប្បន្នយើងនាំចូលជ្រូកពីក្រៅប្រទេសជាង១០០តោនឯណោះ ដើម្បីមកបំពេញតម្រូវការលើទីផ្សារ ដូច្នេះយើងមិនមានលទ្ធភាពឯណានាំចេញជាឯសារនោះទេ»។ លោកបន្តថា ការហាមមិនអោយនាំចូលជ្រូកទៅកាន់ប្រទេសដទៃពីសំណាក់អាជ្ញាធរគេនេះ អាចមានអ្នកដំណើរចង់ហូបសាច់ជ្រូកខ្មែរ ហើយលួចយកពីរបីគីឡូតាមខ្លួន ទៅហូបនៅស្រុកគេ ដូចជានៅប្រទេសចិន និងប្រទេសថៃជាដើម ។
បើនៅប្រទេសថៃវិញ គេបានដាក់បំរាម លើពលករខ្មែរ ឬជនណាមួយលួចនាំចូលសាច់ជ្រូកពីកម្ពុជា ដាក់ទោសជាប់គុក២ខែ ឯណោះ ។ សម្រាប់ការផ្ទុះជំងឺប៉េស្តជ្រូកអាហ្វ្រិកនៅខេត្តរតនគីរី លោកប្រធានសមាគមបានលើកឡើងផងដែរថាអាជ្ញាធរ បានធ្វើកិច្ចការល្អប្រសើរ ដោយបានទប់ស្កាត់មិនអោយរីករាលធំ ហើយបើធៀបនឹងប្រទេសជិតខាងយើង រឺប្រទេសដែលមានផ្ទុះជំងឺនេះ លើសត្វជ្រូក វាបានរីកធំខ្លាំងណាស់ហើយ តែយើងបានទប់នៅនឹងនរល្អណាស់ ។ នៅរសៀលថ្ងៃទី០៦ ឧសភា ២០១៩នេះមិនអាចទាក់ទងលោកតាន់ ផាន់ណារ៉ាបានទេ ដោយសារលោកជាប់ប្រជុំ តែលោកធ្លាប់បានលើកឡើងថា គ្រាន់តែបានលឺដំនឹងផ្ទុះជំងឺប៉េស្តជ្រូកអាហ្វ្រិកនៅខេត្តរតនគីរី លោកបានចាត់កម្លាំងអោយចុះទៅជាបន្ទាន់ ដើម្បីទប់ស្កាត់ការរីករាលដាលទៅកាន់តំបន់ផ្សេងទៀត ហើយត្រូវតាមដានរកជំងឺនេះលើសត្វជ្រូកផ្សេង និងត្រូវកំទេចចោលអោយអស់ នៅក្នុងតំបន់ផ្ទុះជំងឺនោះ។ លោកបន្តថា ក្រសួងក៏បានចាត់ទុកតំបន់ផ្ទុះជំងឺនោះ ជាកន្លែងហាមឃាត់ ដោយមិនអោយមានការចរាចរណ៍ ចេញចូលសាច់ជ្រូកឡើយ ដើម្បីកុំអោយចម្លងទៅកានជ្រូកក្នុងតំបន់ផ្សេងទៀត។ គួរបញ្ជាក់ផងដែរ បច្ចុប្បន្ននេះ កម្ពុជានាំចូលជ្រូកពីប្រទេសជិតខាងមកផ្គត់ផ្គង់លើទីផ្សារក្នុងស្រុក ក្នុងបរិមាណ ប្រមាណ១២០០ក្បាល ហើយភាគច្រើននាំចូលប្រទេសថៃ ខណៈវៀតណាម ក៏មានផ្ទុះជំងឺប៉េស្តជ្រូកអាហ្វ្រិកដូចគ្នា និងត្រូវបានហាមឈ្មួញមិនអោយនាំពីវៀតណាមបន្តទៀតនោះទេ។
ចំណែកថ្នាក់ដឹកនាំខេត្តមណ្ឌលគីរី បានឲ្យដឹងផងដែរថាបើទោះបីជាមានព្រំប្រទល់ជាប់នឹងខេត្តដែលមានផ្ទុះជំងឺបេស្តជ្រូកអាហ្វ្រិកក៏ពិតមែន ប៉ុន្តែគិតរហូតមកដល់ដើមខែឧសភាឆ្នាំ ២០១៩ សម្រាប់ខេត្តមណ្ឌលគិរីមិនទាន់មានការឆ្លងជំងឺបេស្តជ្រូកអាហ្វ្រិកនោះទេ ខណៈអាជ្ញាធរកំពុងតាមដាន និង ដាក់វិធានការទប់ស្កាត់ការឆ្លងជំងឺនេះ ។
លោក សុង ឃាង ប្រធានមន្ទីរកសិកម្មរុក្ខប្រមាញ់និងនេសាទខេត្តមណ្ឌលគិរី បានឲ្យដឹងថា ក្រោយជំងឺបេស្តជ្រូកអាហ្វ្រិកផ្ទុះឡើងនៅខេត្តរតនគិរី រដ្ឋបាលសាលាខេត្តមណ្ឌលគិរីបានបើកកិច្ចប្រជុំ និងបានចេញ លិខិតអន្តរាគមន៍ទៅគ្រប់ច្រកព្រំដែនទាំងអស់មិនឲ្យមានការនាំសត្វជ្រូក ឬសាច់ជ្រូកពីប្រទេសវៀតណាមចូលមកនោះទេ ។ លោកក៏បានបញ្ជាទៅជំនាញពេទ្យសត្វឲ្យចុះតាមដានសកម្មភាពការចិញ្ចិមជ្រូករបស់កសិករគ្រប់កន្លែងដែរ និងឲ្យ ពួកគាត់រាយការណ៍ភ្លាម ប្រសិនមានករណីជ្រូកឈឺ ឬសង្ស័យថាមានផ្ទុកជំងឺបេស្តជ្រូកអាហ្វ្រិក ដើម្បីមានវិធានការទប់ ស្កាត់ទាន់ពេលវេលា ។ លោក សុង ឃាង បន្តថា ការចរាចរសត្វជ្រូកពីខេត្តផ្សេងចូលមកខេត្តមណ្ឌលគិរី ក៏មានការ ត្រួតពិនិត្យសុខភាពពីសំណាក់ពេទ្យសត្វ និងបាញ់ថ្នាំសម្លាប់មេរោគផងដែរមុនយកចូលកន្លែងសត្តឃាត ។
កសិករចិញ្ចិមសត្វជ្រូកលក្ខណៈគ្រួសារប្រមាណ៧០ក្បាល នៅភូមិអូរស្ពាន ក្រុងសែនមនោរម្យ លោក មាស រិទ្ធី បានប្រាប់ដែរថា ជំងឺបេស្តជ្រូកអាហ្វ្រិកនេះពិតជាកាចសាហាវណាស់ វាអាចសម្លាប់សត្វជ្រូកក្នុងរយៈពេលដ៏ខ្លី ហើយក្រោយមានករណីរីករាលដាលជំងឺប្រភេទនេះនៅខេត្តមណ្ឌលគិរី លោកបានបង្កើនការមើលថែសត្វជ្រូក និងបាញ់ថ្នាំ សម្លាប់មេរោគច្រើនជាងធម្មតា ប៉ុន្តែទោះជាយ៉ាងណាលោកមិនបារម្ភអំពីជំងឺបេស្តជ្រូកអាហ្វ្រិកប៉ុន្មានទេ ព្រោះការចិញ្ចិមជ្រូករបស់លោក មិនបាននាំជ្រូកពីខាងក្រៅចូលថ្មីទេ ដូចនេះមានហានិភ័យឆ្លងតិចតួចបំផុត ។
កសិករដដែលបានប្រាប់ទៀតថា អ្វីដែលធ្វើឲ្យលោកព្រួយបារម្ភនោះគឺបញ្ហាអាកាសធាតុទៅវិញទេ ព្រោះមួយរយៈចុងក្រោយនេះ អាកាសធាតុប្រែប្រួលលឿន ម្ដងក្ដៅ-ម្ដងត្រជាក់ អាចធ្វើឲ្យកូនជ្រូកងាយនិងប្រឈមជាមួយជំងឺផ្សេងៗ ។
សូមបញ្ជាក់ថា បើតាមលោក ប៉ែន ប្រុស ប្រធានការិយាល័យពេទ្យសត្វបានឲ្យដឹង ជំងឺប៉េស្តជ្រូកអាហ្វ្រិក មិនបង្កឲ្យឆ្លងដល់មនុស្សទេ វាគ្រាន់តែឆ្លងទៅសត្វដូចគ្នាបណ្តាលឱ្យស្លាប់ភ្លាមៗបាន និងធ្វើឲ្យប្រជាពលរដ្ឋដែលចិញ្ចឹមជ្រូកមានការខាតបង់តែប៉ុណ្ណោះ ហើយមន្ត្រីជំនាញពេទ្យសត្វខេត្តក៏កំពុងយកចិត្តទុកដាក់តាមដានបញ្ហានេះដែរ បង្ការមិនឲ្យ មានកើតឡើងនូវជំងឺប្រភេទនេះ ។ លោកបញ្ជាក់ថា បច្ចុប្បន្ននៅខេត្តមណ្ឌលគិរី មានជ្រូកចិញ្ចឹមប្រហែល ១,១២៩០ ក្បាល ប្រហាក់ប្រហែលនិងឆ្នាំមុន និងមានតែការចិញ្ចិមជ្រូកលក្ខណៈគ្រួសារប៉ុណ្ណោះ ៕
ចែករំលែកព័តមាននេះ