ប្រទេសថៃ៖ ភ្នាក់ងារសារព័ត៌មាន Bangkok Post បានឲ្យដឹងកាលពីថ្ងៃទី៤ ឧសភា កន្លងមកថា ធនាគារអភិវឌ្ឍន៍អាស៊ី (ADB) បានចាប់ផ្តើមគម្រោងតម្លៃ៥ប៊ីលានដុល្លារដើម្បីសម្អាតសមុទ្រសម្រាប់អាស៊ីប៉ាស៊ីហ្វិក ។
គម្រោងសម្រាប់សុខភាពសមុទ្រ និងសេដ្ឋកិច្ចសមុទ្រចិរភាពនឹងបង្កើនជំនួយហិរញ្ញវត្ថុនិងបច្ចេកទេសសម្រាប់គម្រោងសុខភាពសមុទ្រ និងសេដ្ឋកិច្ចសមុទ្រមកស្មើ៥ប៊ីលានដុល្លារចាប់ពីឆ្នាំ ២០១៩ ដល់២០២៤។
លោក Bambang Susantono ដែលជាអនុប្រធានគ្រប់គ្រងចំណេះដឹងនិងការអភិវឌ្ឍន៍ចិរភាពបាននិយាយថា «បម្រែបម្រួលបរិយាកាស ការនេសាទដោយមិនមានចិរភាព កំណើនការអភិវឌ្ឍន៍តាមឆ្នេរសមុទ្រដែលមិនត្រូវបានគ្រប់គ្រងល្អ និងកង្វក់បរិស្ថានកំពុងតែផ្តល់ការគម្រាមកំហែងមិនត្រឹមតែដល់សមុទ្រយើងទេ តែដល់ភាពរុងរឿងនិងចិរភាពនៃការអភិវឌ្ឍន៍ក្នុងតំបន់យើងទៀត»។
ក្រោមគម្រោងនេះ ធនាគារខាងលើនឹងចាប់ផ្តើមការផ្តួចផ្តើមផ្តល់ហិរញ្ញវត្ថុសមុទ្រដើម្បីបង្កើនឱកាសសម្រាប់វិស័យឯកជនដើម្បីវិនិយោគលើគម្រោងដូចជាទេសចរណ៍មានចរិភាព និងនេសាទជាដើម ។ ការផ្តួចផ្តើមនេះនឹងផ្តល់ជាជំនួយផ្នែកបច្ចេកទេស និងហិរញ្ញវត្ថុពី ADB និងម្ចាស់អំណោយដទៃដើម្បីកាត់បន្ថយហានិភ័យផ្នែកបច្ចេកទេសនិងហិរញ្ញវត្ថុនៃគម្រោងទាំងនោះ។
លោក Bruce Dunn ដែលជានាយកផ្នែកអភិវឌ្ឍន៍មានចិរភាព និងបម្រែបម្រួលបរិយាកាសនៅ ADB បាននិយាយថា «បញ្ហាមួយដែលពួកយលងកំពុងជួបប្រទះគឺកង្វះការវិនិយោគមានចរិភាពលើសេដ្ឋកិច្ចសមុទ្រ។ ការផ្តួចផ្តើមហិរញ្ញវត្ថុសមុទ្រមានគោលបំណងប្រមូលថវិកាពីប្រភពខុសៗគ្នាដែលរួមមាន ADB ផងដែរ និងសហការជាមួយនឹងវិស័យឯកជនដើម្បីអាចបង្កើនការវិនិយោគយើងបាន»។
លោកបានបន្ថែមថា ADB បានវិនិយោគប្រមាណ២ប៊ីលានដុល្លារដើម្បីប្រឆាំងនឹងកង្វក់សមុទ្រហើយ។ គម្រោងខាងលើមានគោលដៅបង្កើនដំណើរការក្នុងរយៈពេល៦ឆ្នាំទៀត។ ADB នឹងលើកតម្កើងកម្មវិធីសហប្រតិបត្តិបច្ចុប្បន្នរបស់ពូកគេដូចជាគម្រោងព្យាបាលទឹកជាដើម ៕
ចែករំលែកព័តមាននេះ